(1) L’erogaziun dles prestaziuns spezialistiches de ambulatore, y de chëres de reabilitaziun, de diagnosa stromentala y de laboratore, d’assunziun, preodüdes dai livì d’assistënza por i zitadins, vëgn assigurades dales aziëndes sanitares aladô dles diretives dla programaziun y dles desposiziuns dla Provinzia. Danter les prestaziuns spezialistiches él inće chëres psicologiches y psicoterapeutiches.
(2) Por l’erogaziun dles prestaziuns aladô dl coma 1 s’anüza les aziëndes sanitares de sü ospedai, sciöch’inće de d’atres istituziuns sanitares acreditades y de profescionisć lëdi acredità, cun chi che l’Aziënda sanitara à stlüt jö na convenziun. A chisc sogeć ti paia les aziëndes sanitares, sön la basa de raporć basà sön l’acreditamënt, na soma predeterminada por la prestaziun destrigada y eventualmënter n onorar a ores. Le paiamënt di medi de medejina generala y di medi di mituns de lîta lëdia é metü a contrat. Por les prestaziuns dles convenziuns, vëgn i medi de medejina generala y i medi di mituns de lîta lëdia sotmetüs ala prozedöra de acreditamënt.65)
(3) La Junta provinziala, te na manira coerënta ales diretives dla programaziun nazionala y provinziala, determinëia i recuisić di erogadus y les prozedöres por la conzesciun dl acreditamënt, i indicadus y les prozedöres d’ejaminaziun di medemi recuisić, i tëmps eventuai d’adeguamënt en raport cun la sort de recuisić, les sanziuns en caje d’inademplimënt, i caji eventuai de deroga ai recuisić, sciöch’inće i caji y les modalitês olach’al ti vëgn tut ai erogadus de prestaziuns sanitares l’acreditamënt y olach’al vëgn anulè le contrat cun les aziëndes sanitares; ara stabilësc inće les modalitês. En particolar fistidiëia la Junta provinziala dl’istituziun de organns tecnics aposta che se dà jö cun l’inrescimënt y la valutaziun respetan le prinzip de ogetivité, sciöch’inće l’istituziun de n register dles strotöres acreditades. Chësta regolëia inće i raporć danter l’ativité y les funziuns di organns competënć por la conzesciun dl acreditamënt, respetivamënter por le conferimënt dl’autorisaziun aladô dl articul 39, stabilin eventualmënter les tarifes adeguades.66)
(4) Les prestaziuns spezialistiches aladô dl coma 1 mëss gnì prescrites dal mede de medejina generala o dal mede di mituns de lîta lëdia; les spezialisaziuns scrites dant dala Junta provinziala ne n’é nia preodüdes.
(5) Atramënter co preodü ti comesc 1 y 2, inćiaria les aziëndes sanitares le personal sanitar titolar che é sot a contrat tl momënt canche chësta lege va en forza aladô dl Decret dl Presidënt dla Republica di 13 de merz 1992, nr. 261, sciöch’inće aladô dl’acordanza dla Provinzia por le regolamënt di raporć cun i medi spezialisà de ambulatore.
(6) Le tlassamënt di medi spezialistics de ambulatore convenzionà tl organich dles aziëndes sanitares sozed aladô dles desposiziuns statales.