(1) L’Aziënda sanitara dla Provinzia autonoma de Balsan, che vëgn da śëgn inant nominada Aziënda sanitara, é gnüda istituida sciöche ënt stromental dla Provinzia autonoma de Balsan por realisé sü fins istituzionai. L’Aziënda sanitara à personalité iuridica publica y l’autonomia de gestiun.
(2) L’organisaziun y le finanziamënt dl’Aziënda sanitara vëgn regolà cun n at aziendal dl dërt privat, respetan i prinzips y i criters stabilis dala Junta provinziala. Le Diretur general dl’ Aziënda sanitara mëss mëte adöm na proposta de n at aziendal ch’al mëss sotmëte a aprovaziun dla Junta provinziala. L’at aziendal vëgn publiché danter diesc dis dal’aprovaziun da pert dla Junta provinziala. L’ordinamënt aziendal, respetan ći che é gnü stabilì ti articui 2, 9, 11, 12/bis, 12/ter, 12/quater, 12/quinquies y 14, definësc dantadöt la strotöra dl’organisaziun dl’Aziënda sanitara y les strotöres sanitares che alda laprò. Insciö vëgnel assiguré l’eserzize unitar dles funziuns de prevenziun, de diagnosa, de cura y de reabilitaziun, sciöch’inće la coordinaziun y l’integraziun dl’ativité di sorvisc teritoriai te vigni raiun cun l’ativité di ospedai y cun d’atri prestadus de sorvisc publics y privać.
(3) L’Aziënda sanitara surantol les atribuziuns preodüdes por les aziëndes sanitares y le Plann sanitar provinzial. En particolar é l’Aziënda sanitara responsabla por l’atuaziun dl Plann sanitar provinzial. Aladô di standarg stabilis tles desposiziuns varëntes por la sconanza dla sanité dl zitadin, mëss le comprensore ti pité al paziënt prestaziuns d’assistënza sanitara direta y la retüda dles spëises por sorvisc indireć. La retüda sozed aladô dles tarifes stabilides damperfora.8)