(1) Le Diretur tecnich-assistenzial vëgn chirì fora danter les porsones che à, aldefora dla laurea magistrala dles profesciuns sanitares y dl’atestat de conescënza dl lingaz talian y todësch, ghiré por le diplom de laurea, na esperiënza profescionala de almanco cin agn. Por le Diretur tecnich-assistenzial vëgnel apliché l'articul 11, comesc 1, 8, 9, 10, 11 y 13.
(2) Se jovan di dirigënć tecnich-assistenziai coordinadus aladô dl coma 4, gestësc le Diretur tecnich-assistenzial le personal infermieristich, dl ćiamp tecnich inćiarié dl’assistënza tl’ativité revardënta, ćiaran particolarmënter sön le svilup dla cualité y dla colauraziun interdisciplinara y dl laûr de equipe.
(3) Te vigni comprensore sanitar vëgnel implü preodü almanco n dirigënt tecnich-assistezial por vigni ospedal y n dirigënt tecnich-assistenzial por l’areal teritorial. Implü pol gnì preodü n dirigënt tecnich-assistenzial por le personal tecnich-sanitar, reabilitatif y por la prevenziun.
(4) Le Diretur general ti surandà, en concordanza cun le diretur dl comprensore sanitar, l’inćiaria de coordinaziun a un di dirigënć tecnich-assistenziai che laora te chël comprensore sanitar. Ti comprensori sanitars cun na popolaziun sura 150.000 abitanć vëgn surandè chësta inćiaria inće a tëmp plëgn. Ti confrunć di dirigënć tecnich-assistenziai coordinadus che depënn funzionalmënter da d’ël, destriga le Diretur tecnich-assistenzial l’ativité d’organisaziun, de coordinamënt y de sostëgn, promoion la colauraziun y l’integraziun dl teritore revardënt cun l’ospedal o i ospedai.
(5) Le dirigënt tecnich-assistenzial à tl teritore y tl ospedal la funziun d’organisaziun y de gestiun dl personal infermieristich sciöch’inće dl personal tecnich-sanitar, reabilitatif, dla prevenziun y dl personal d’aiüt y tecnich por l’assistënza. Le dirigënt tecnich-assistenzial eserzitëia implü la funziun de organisaziun y de gestiun di prozesc de laûr corespognënć.
(6) L’inćiaria dl dirigënt tecnich-assistenzial vëgn surandada sön la basa de na seleziun publica, a chëra ch’al po tó pert sides chi che à i recuisić preodüs dala normativa revardënta, sides chi che à tut pert a n curs, organisé dala Provinzia autonoma de Balsan o da n istitut publich o privat reconesciü tla Talia o deforadecà, te tecniches organisatives y de manajamënt tl ćiamp sanitar, sc’al à passè l’ejam. Ala seleziun pon ma tó pert sc’an à l’atestat de conescënza di lingac talian y todësch, preodü por le diplom dla scora alta de secundo gre.20)