(1) Le Diretur aministratif y le Diretur sanitar tol pert deboriada cun le Diretur general, che é le responsabl, ala gestiun dl'Aziënda, y ai surantol la responsabilité direta dles funziuns atribuides a süa competënza y porta pro cun propostes y arać ales dezijiuns dla direziun generala tl ćiamp dla planificaziun, coordinaziun, dl monitoring, sciöch’inće dla verificaziun di percursc y dles prozedöres che se referësc ales materies che toma ite ti ćiamps de süa competënza.15)
(2) Le Diretur aministratif mëss ester laureé te disciplines de iurisprudënza o de economia, al ne po nia avëi cumplì i 65 agn, al mëss avëi destrighé por almanco cin agn na ativité cualificada te na direziun tecnica o aministrativa te ënć, aziëndes o strotöres publiches o privates y d’organisaziun y gestiun sanitara o de n ater curs de formaziun de manajamënt programè aposta.
(3) Le Diretur aministratif condüj i sorvisc aministratifs dl’Aziënda sanitara.
(4) Sce le Diretur general dl’Aziënda sanitara vëgn da strotöres nia sanitares, vëgn le Diretur aministratif chirì fora danter porsones che vëgn da ënć o da strotöres sanitares.16)
(5) Le Diretur sanitar é n mede che ne po nia avëi plü co 65 agn che à destrighé por almanco cin agn n’ativité tecnica-sanitara te ënć o te strotöres sanitares, publiches o privates, de na dimenjiun mesana o grana y che à le zertificat de formaziun de manajamënt por le ćiamp dla sanité publica.
(6) Le Diretur sanitar condüj i sorvisc sanitars por fins organisatifs y dl’igiena y dla sanité y al ti presënta al Diretur general l’arat d’oblianza sön i provedimënć tles materies de süa competënza, tutes fora les competënzes dl Diretur tecnich-assistenzial aladô dl articul 12/bis.17)
(7) Le Diretur aministratif y le Diretur sanitar mëss avëi l’atestat de conescënza di lingac talian y todësc por le diplom de laurea aladô dl Decret dl Presidënt dla Republica di 26 de messè, nr. 752, y mudaziuns suandëntes.
(8) Le raport de laûr dl Diretur aministratif y dl Diretur sanitar é regolè cun le contrat aposta de laûr de dërt privat por n tëmp limité, da na dorada nia sot a trëi y nia sura cin agn; les tlausoles vëgn stabilides dala Junta provinziala, tignin cunt dla complessité y dles responsabilitês liades al destrigamënt dl’inćiaria, sciöch’inće di livì retributifs tl setur sanitar. Sc’al se trata de dependënć dl’aministraziun publica vel les desposiziuns tl articul 10, coma 4. Por ći che reverda l’incompatibilité y l’ilitabilité dl Diretur aministratif y dl Diretur sanitar vëgnel apliché les desposiziuns dl articul 3, comesc 9 y 11, dl Decret legislatif di 30 de dezëmber 1992, nr. 502, y mudaziuns suandëntes.
(9) Le Diretur aministratif y le Diretur sanitar vëgn detlarà tomà dal’inćiaria ti caji de n gran dejavanz, de violaziun dla lege, de violaziun di prinzips dl bun andamënt y de imparzialité dl’aministraziun.
(10) L’inćiaria dl Diretur aministratif y dl Diretur sanitar toma anter trëi mëisc do la nominaziun dl Diretur general nü y ara po gnì renovada.
(11) Le Diretur general nominëia cun n provedimënt aposta le sostitut dl Diretur aministratif y dl Diretur sanitar, che sostituësc le titolar vigni iade che chësc é demez o impedì y che condüj la strotöra aministrativa tl caje de vacanza dl post y ćina ala nominaziun dl Diretur aministratif y sanitar.
(12)18)
(13) La Junta provinziala determinëia l’indenité che ti speta por le destrigamënt dles funziuns de vizediretur aministratif y de vizediretur sanitar.