(1) Le Diretur general é responsabl dla gestiun complessiva dl’Aziënda sanitara y al ti speta le podëi de rapresentanza dl comprensore. Al é responsabl dantadöt por:
- la redaziun y l’adoziun dl at aziendal aladô dl articul 5, coma 2, do ch’al é gnü fat n confrunt cun les organisaziuns sindacales;
- la definiziun di obietifs y di programs aziendai da arjunje tl cheder dla programaziun sanitara provinziala, cun indicaziun dles prioritês y l’individuaziun dles ressurses nezessaries por les arjunje, sciöch’inće dl’adoziun di ać aministratifs te na manira strategica, che mëss gnì aprovà dala Junta provinziala, aladô de ći che é preodü dal regolamënt provinzial tla materia;
- la negoziaziun dl budget aziendal cun la Provinzia;
- le program operatif anual y le budget, articolé inće al livel raional;
- la negoziaziun y la definiziun di obietifs anuai cun le Diretur aministratif, le Diretur sanitar y le Diretur tecnich-assistenzial;
- la negoziaziun y la definiziun di obietifs anuai cun i direturs di comprensori sanitars;
- la negoziaziun y la assegnaziun dles ressurses ai comprensori sanitars, respetan les diretives provinziales;
- l’adoziun de diretives y de regolamënć;
- la definiziun di sorvisc, dles ativitês sciöch’inće dles prozedöres importantes por l’aziënda o sura i comprensori fora, en conformité ala programaziun provinziala;
- la gestiun y le coordinamënt di sorvisc aministratifs, tecnics y profescionai importanć por la provinzia y i sorvisc aziendai, tan inant ch’ai ne n’é nia delegà ai comprensori sanitars;
- la garanzia dl’uniformité dles prozedöres dl’Aziënda sanitara;
- les dezijiuns che reverda la partezipaziun a sozietês cun n capital moscedè publich y privat;
- la sotescriziun de contrać coletifs integratifs de laûr al livel aziendal;
- l’eserzize dles funziuns d’ejaminaziun y de control di resultać arjunć tignin cunt di obietifs aziendai programà;
- la nominaziun dl Consëi di sanitars;
- l’autorisaziun de stlüje jö contrać atifs y contrać de laûr, de forniziuns y de prestaziuns de sorvisc che à varënza raionala, da na dorada deplü co trëi agn;
- la nominaziun di mëmbri dla comisciun d’ejam;
- la nominaziun, la renovaziun y la revocaziun dl Diretur aministratif, dl Diretur sanitar y dl Diretur tecnich-assistenzial, do avëi aldì la Junta provinziala;
- la proposta ala Junta provinziala de chësta nominaziun, dla renovaziun y dla revocaziun di Direturs di comprensori sanitars;
- les nominaziuns, les revocaziuns y d’atri ać de chësta sort, che ti vëgn surandà aladô dles desposiziuns varëntes.
(2) Le Diretur general vëgn daidé dal Diretur aministratif, dal Diretur sanitar y dal Diretur tecnich-assistenzial.
(3) Le Diretur general mëss motivé i provedimënć, che ne va nia a öna cun l’arat dl Diretur aministratif, dl Diretur sanitar, dl Diretur tecnich-assistenzial y dl Consëi di sanitars. Al é responsabl di ać destrigà tl eserzize de sües funziuns y al respogn personalmënter aladô dles desposiziuns varëntes dla materia. Tl caje che l’ofize é vacant o tl caje d’assënza iustificada o d’impedimënt dl Diretur general, vëgn les funziuns destrigades dal Diretur aministratif o dal Diretur sanitar, sön delega dl Diretur general, o, sc’al manćia n deleghé, dal diretur plü vedl. Tl caje che le diretur manćia plü de 180 dis, vëgnel invié ia les prozedöres por süa sostituziun.
(4) Respetan ći che é preodü tl articul 11, coma 9, mëss le Diretur general anter le mëis de merz de vign’ann verifiché i resultać arjunć dal Diretur aministratif, dal Diretur sanitar, dal Diretur tecnich-assistenzial sciöch’inće dai direturs di comprensori sanitars. Tl caje de na valutaziun negativa pol revochè la nominaziun dl Diretur aministratif, dl Diretur sanitar y dl diretur tecnich-assistenzial, do avëi aldì la Junta provinziala, o ti fà la proposta ala Junta provinziala de ti tó l’inćiaria al Diretur dl comprensore sanitar.12)