(1) Por schivé i dagns da salvarjina da aundla ai bosć mëssel gnì tignì en ecuiliber ti planns de stlopetada la consistënza de salvarjina cun la pascentada che l’ambiënt natural pîta.
(2) Te vigni caje mëss la consistënza dla salvarjina da aundla gnì regolada a na manira che le mantignimënt dl bosch y dantadöt süa regeneraziun naturala cun sorts de lëgns adatà por chël post ne vëgnes nia manacià zënza messëi tó mosöres de proteziun particolares por stimulé inće n dër raport moscedè danter le sorts tipiches de vigni sistem ecologich forestal dl post.
(3) Por chësc fin, y te vigni caje zënza aziché i dërć di proprietars di bosć, po i posć por ojorè la salvarjina da aundla gnì metüs sö, do avëi aldì la minunga dl rapresentant dl ispetorat forestal competënt te chël raiun tla comisciun dl plann de stlopetada aladô dl articul 6, coma 2, dl regolamënt d’esecuziun dla lege provinziala di 17 de lugio 1987, nr. 14, sön la proteziun dla salvarjina y sön l’eserzize dla ćiacia, aprovè cun decret dl Presidënt dla Junta provinziala di 15 d’aurì 1988, nr. 10. Le numer di posć por l’ojoradöra mëss te vigni caje gnì calcolè a na manira da ne gaujé nia dagns.
(4) Por düć i posć por l’ojoradöra che esist canche chësta lege va en forza po la comisciun dl plann de stlopetada competënta te chël raiun aladô dl coma 3, sön comunicaziun dl’autorité forestala despone l’arlontanamënt, sce chisc posć por l’ojoradöra à na faziun negativa sön le sistem ecologich dl bosch.
(5) Sce les prescriziuns de chësc articul ne vëgn nia respetades vëgnel fat na straufunga aministrativa danter 62 euro y 622 euro.22)