(1) Les sorts de tiers tla injunta A é daldöt sot a sconanza.
(2) Inće les sorts de tiers salvari preodüdes tles injuntes II y IV dla diretiva 92/43/CEE dl Consëi di 21 de mà dl 1992 sön la conservaziun di habitać naturai y seminaturai y dles plantes y di tiers salvari, denominada da chilò inant diretiva habitat, y che vir inće ma por intant tl teritore dla provinzia de Balsan, é daldöt sot a sconanza. Por chëstes sorts vêlel n sistem de sconanza rigorus por garantì o recostituì de bunes condiziuns de conservaziun.
(3) I vicì salvari preodüs tla diretiva 2009/147/CE dl Parlamënt europeich y dl Consëi di 30 de novëmber dl 2009 sön la conservaziun di vicì salvari, denominada da chilò inant diretiva sön la sconanza di vicì, é sotmetüs a sconanza aladô dla lege provinziala di 17 de messè dl 1987, n. 14, y mudaziuns suandëntes.
(4) La lista dles sorts de tiers daldöt sot a sconanza po gnì ampliada dala Junta provinziala.
(5) Al é proibì da:
- apié o copè da ion tiers - bel anfat tan vedli che ai é - dles sorts daldöt sot a sconanza, o da i scechè da ion, dantadöt tratan le tëmp de reproduziun, de zidlamënt, de ibernaziun y de migraziun, i tignì sö vis o morć, trasportè tiers daldöt sot a sconanza o perts de chisc, i adorè por lauraziuns, sciacarè de chisc, i baratè o i pité por rajuns comerziales o de barat;
- spachè o tó demez da ion dal ambiënt natural i üs o danejè o desfà i posć de nidificaziun, de reproduziun y i raiuns de palsa dles sorts di tiers daldöt sot a sconanza.
(6) I patruns, i afitadins y les porsones che à le dërt de nuzaziun po apié o copè talpines sön so terac che ai adora sciöche terac agricul y sciöche urt.
(7) Les proibiziuns preodüdes dal coma 5 ne vel nia por les sorts de tiers da zidlamënć. Che che sciacarëia de chëstes sorts mëss mostrè sö n zertificat de provegnënza scrit fora dal zidladù.
(8) Por ći che reverda le pié o le copè sorts de tiers salvari nominades tl’injunta V, lëtra a) dla diretiva habitat, y sce al é preodü ezeziuns aladô dl articul 11 de chësta lege por se tó, apié o copè les sorts preodüdes tla injunta IV, lëtra a) dla medema diretiva, él a vigni moda proibì da adorè mesi nia seletifs che podess portè pro a fà morì fora o desturbè dassënn les popolaziuns dl post.
(9) Al é proibì da adorè i mesi nominà tl’injunta VI, lëtra a) dla diretiva habitat por apié y copè tiers y vigni atra manira de apié o copè tiers cun i mesi de trasport preodüs tl’injunta VI, lëtra b), dla medema diretiva.] 3)
L'art. 4, l'art. 8, coma 4, l'art. 11, comesc 1 y 2, l'art. 22, coma 6 y l'art. 33, coma 3, é gnüs detlarà cuntra la costituziun cun sentënza di 18 d'aurì dl 2011, n. 151 dla Curt Costituzionala.