d) Lege Provinziala di 12 de mà dl 2010, n. 61)2)
Lege sön la sconanza dla natöra y d’atres desposiziuns

(1) Chësta lege regolamentëia la sconanza di tiers salvari, dles plantes salvares, de süa lerch vitala, sciöche inće di corëć y di minerai.

(2) Chëstes normes romagn anfat:

1. la lege provinziala di 17 de messè dl 1987, n. 14, y mudaziuns suandëntes, sön la sconanza dla fauna salvaria y la ćiacia,
   
2. la lege provinziala di 9 de jügn dl 1978, n. 28, y mudaziuns suandëntes, sön la pëscia,
   
3. la lege provinziala di 18 de jügn dl 2002, n. 8, y mudaziuns suandëntes, sön les eghes y le plann de sconanza dles eghes;
   
4. la lege provinziala di 19 de jügn dl 1991, n. 18, y mudaziuns suandëntes, sön la sconanza di fonguns.
   

(3) Te chësta lege vëgn dant les porsones tla forma feminila y te chëra mascolina, tan inant che al é saurì da lì y capì le test. Sce al vëgn ma adorè la forma mascolina por indiché porsones fisiches él dagnora miné sides ëi che ëres.

(1) Vigni porsona à le dërt de se gode les belëzes dla natöra y de palsè tla natöra.

(2) Vigni porsona che eserzitëia le dërt odü danfora tl coma 1 é obliada da ćiarè dla natöra y dla contrada, ara mëss portè pro - aladô de sües poscibilitês y tl respet dles fontanes de vita naturales - a realisé i fins y i prinzips dla sconanza dla natöra, y se comportè a na moda che les fontanes de vita naturales di tiers y dles plantes vëgnes mantignides, nia manaciades y recostituides.

(3) L’adoranza agricola y forestala che conservëia la contrada culturala y é orientada ecologicamënter à na importanza particolara y porta pro ala conservaziun di elemënć dla contrada linears y a forma de punt importanć por le bilanz natural.

(4) Le dërt odü danfora tl coma 1 vëgn eserzité zënza tochè i dërć dl patrun dl terac y de che che à le dërt de nuzaziun.

(5) Le dërt odü danfora tl coma 1 vëgn eserzité por prinzip surantolon personalmënter i risć. Al ne vëgn nia costituì oblianzes de cura y de segurëza stradala particolares dl patrun dl terac o de zacai d’atri che à chësc dërt, ater co sce al vëgn odü danfora da d’atres desposiziuns.

(6) Le palsè te posć dl ambiënt natural po gnì limité cun regolamënt d’esecuziun aladô de sciöche al va debojëgn, o proibì por rajuns de sconanza dla natöra y dla contrada, dantadöt por ći che reverda l’incuinamënt dl terac cun refodam y escremënć, do na majera adoranza por palsè.

(1)  Por garantì la conservaziun dla varieté dles sorts y ćiarè che les plantes y i tiers salvari ne möres nia fora, mësson fà a na moda che so habitat vëgnes mantignì o recostituì te na bona condiziun de conservaziun. Por chësc fin mësson fà intervënć de sconanza y conservaziun desvalis.

(1) Tles eghes chites él proibì da:

1. gaujé alteraziuns dles eghes chites naturales y seminaturales o di raiuns dlungia la spona, dantadöt cun le realisé operes de bonificaziun y de assuiamënt dl terac;
   
2. jì incërch cun barches a motor de vigni sort, ater co por intervënć de aiüt y mosöres de ressanamënt por sconè les eghes. Da chësta proibiziun él stlüt fora le barca da passajiers dl comun de Curon sön le lêch de Resia. 9)
   

(1) Chisc raiuns da parü se mirita da gnì sconà:

1. i raiuns olache al vëgn metü sot tera ite eghes chites o che va dër plan;
   
2. i popolamënć de ćiana y fostüa;
   
3. i pra tömi y inagà olache al crësc dantadöt erba döra y polifs;
   
4. i parüs de turba;
   
5. i bosć da spona;
   
6. i bosć da parü;
   
7. i raiuns da fontanes;
   
8. les eghes y i rüs cun let lëde da costruziuns y i fossà, cun laprò la vegetaziun dles spones.
   

(2) Chisc raiun süć che se caraterisëia por la gran biodiversité y che é de gran importanza por la conservaziun dles plantes o di tiers salvari sot a sconanza, se mirita da gnì sconà:

1. pra süć;
   
2. i raiuns da lastëis cun vegetaziun de stepa;
   
3. sfësses d’arjila.
   

(3) I raiuns da parü che se mirita da gnì sconà, i fossà y i pici rüs daverć, sciöche inće i raiuns süć mëss gnì conservà y al mëss gnì consintì l’adoranza ecosostenibla de chëstes surasperses, tan inant che al ne vëgnes nia manacè süa conservaziun.

(4) I intervënć che podess desdrüje o danejè i raiuns preodüs dal coma 3 ne n’é nia conzedüs.

(5) Al é conzedü da sié popolamënć de ćiana y fostüa y pra da sternüda dal pröm de setëmber ai 15 de merz; por dortoré i fossà de bonificaziun deperpo él conzedü da sié dai 15 de messè ai 15 de merz. An po ma sié n tòch al iade por dortoré i fossà de bonificaziun. La Junta provinziala aprovëia sön la basa de conscidraziuns natu-ralistiches y di bojëgns che vëgn da prighi de agajuns, diretives de gestiun aposta, olache al po gnì preodü de-rogaziuns di tëmps che an siëia nominà dessura. 10)

(1) Al é proibì da runćé la vegetaziun dles spones o le bosch da spona o da i desdrüje a val’ manira.

(2) Le diretur o la direturia dla Repartiziun provinziala Natöra y contrada po autorisé en via ezezionala le runćiamënt por rajuns de interès publich.

(1) Tl respet dles normes forestales él conzedü da taié trognores y brüsces n tòch al iade, a na moda da ne manacè nia süa conservaziun.

(1) Al é proibì da ti dè füch a vigni sort de mantel de vegetaziun, dantadöt ales trognores, ales brüsces, ai lëgns y al mantel de vegetaziun dlungia i confins di ćiamps y dles arjinares, sciöche inće apêr di rogns dles strades, dles linies dla ferata, di cursc d’ega y di fossà.

(2) Sce al manćia alternatives po le diretur o la direturia dla Repartiziun provinziala Natöra y contrada autorisé tl interès publich de ti dè füch al mantel de vegetaziun ma te certi raiuns y ma te certi tëmps.

(3) Al é proibí da traté cun erbizig i mantí de vegetaziun preodüs dal coma 1. Chësc ne vel nia ti raiuns agricui che vëgn laurá dassënn, ater co dlungia i termi di ciamps y les arjinares, sciöche ince aper di rogns dles strades, di cursc d’ega y di fossá. 11)

(1) Por contribuì ala sconanza dla varieté dles sorts tres la conservaziun di habitać naturai y seminaturai sciöche inće dles plantes y di tiers salvari tla provinzia de Balsan y tó pert ala rëi Natura 2000 preodüda dal articul 3 dla diretiva habitat, vëgnel metü sö i raiuns de importanza comunitara preodüs tl’injunta D y i raiuns de sconanza di vicì preodüs tl’injunta E.

(2) I confins di raiuns preodüs tl coma 1 vëgn portà ite ti planns urbanistics y ti planns setoriai.

(3)  Les injuntes D y E pó gní integrades dala Junta provinziala aladô dl prozedimënt stabilí dales desposiziuns dl'UE. 12)

(1) Les mosöres de sconanza da adotè dess assiguré le mantignimënt o la recostituziun, te na buna condiziun de conservaziun, di habitać naturai y dles sorts de plantes y tiers salvari de interès comunitar te so raiun de difujiun naturala.

(2) La Junta provinziala stabilësc - sce al va debojëgn inće tres l’aprovaziun di planns de gestiun -chisc fins y chëstes mosöres por i raiuns Natura 2000:

1. i obietifs de sconanza che reverda dantadöt la sconanza y la recostituziun di habitać prioritars y dles sorts prioritares;
   
2. les mosöres de conservaziun.
   I obietifs dla sconanza y dles mosöres de conservaziun s’adatëia ai bojëgns ecologics di habitać naturai preodüs tl’injunta I y dles sorts preodüdes tl’injunta II dla diretiva habitat, sciöche inće dles sorts preodüdes tl’injunta I dla diretiva sön la sconanza di vicì. Por ći che reverda so habitat él odü danfora mosöres de conservaziun speziales da apliché - sce al va debojëgn - inće fora di raiuns Natura 2000, por garantì la suraviënza y la reproduziun dles sorts te so raiun de destribuziun.
   

(3) Ti raiuns Natura 2000 él proibì da dezipé i habitać naturai y i habitać dles sorts de interès comunitar, sciöche inće da desturbè les sorts por chëres che i raiuns é gnüs designà y mëte al prigo i obietifs de sconanza.

(4) Ti raiuns Natura 2000 él proibì, tl respet dles desposiziuns de sconanza plü rigoroses, da:

1. realisé condütes eletriches y dl telefonn tl’aria nöies;
   
2. realisé pistes dai schi y implanć portamunt nüs, ater co teleferiches da material;
   
3. daurì ćiavares y mineores nöies, ater co chëres che à bele ciafè n’autorisaziun regolara canche chësta lege va en forza; les ćiavares y les mineores che é bele po gnì adorades ćina che la conzesciun toma. Al ne po nia gnì conzedü n arlungiamënt dla conzesciun;
   
4. realisé implanć eolics nüs, ater co i intervënć de sostituziun y modernisaziun de chi che é bele o é bele gnüs autorisà, sciöche inće i implanć por curì le bojëgn tl raiun sot a sconanza che à na forza y na altëza limitada;
   
5. realisé desćiaries nöies y implanć de depuraziun de eghes pazes, ater co i implanć de depuraziun di frabicać tl raiun sot a sconanza;
   
6. serié y taié la vegetaziun dles spones di cursc d’ega tratan le tëmp de reproduziun di vicì, chël ô dì dai 15 de merz ai 15 de messè;
   
7. spane coltöra minerala y coltöra organica lüjia, boacia y ega de stala dal zidlamënt de tiers, ater co chëra tl raiun Natura 2000 y dl’ agricoltöra, dla fruticoltöra y dla viticoltöra. La Junta provinziala aprovëia tignin cunt di bojëgns spezifics dla sconanza dla natöra y de n’adoranza adatada al post, diretives de gestiun, sön la basa de chëres che al po gnì conzedü derogaziuns ala proibiziun nominada dessura. 13)
   

(5) Les condütes eletriches tl’aria che é bele ti raiuns Natura 2000 mëss gnì assigurades por smendrì le prigo de colijiun o de se ciafè na scassada.

(6) I planns y i proieć preodüs dal articul 6 dla diretiva habitat che po influenzè dassënn i raiuns Natura 2000, é da sotmëte al’ejaminaziun de soportanza preodüda dal articul 22.

(7) Por miorè la coerënza ecologica dla rëi Natura 2000 sostëgn la Provinzia autonoma de Balsan la creaziun, la conservaziun y la recostituziun di elemënć dla contrada che à na importanza primara por les plantes y i tiers salvari. Ara se trata de chi elemënć che é dër importanć por la migraziun, la destribuziun geografica y le barat genetich dles sorts salvaries, porvia de süa strotöra lineara y progressiva, sciöche i cursc d’ega cun sü urs y i sistems de delimitaziun di ćiamps tradizionai, o porvia de so rode de coliamënt, sciöche i lagosc o i pici bosć.

(8) Ti raiuns Natura 2000 sostëgn la Provinzia autonoma de Balsan:

1. la remoziun de resć de costruziuns o implanć tecnics nia plü adorà;
   
2. les formes de agricoltöra estensives tradizionales;
   
3. la conservaziun y la recostituziun di habitać naturai y seminaturai;
   
4. le ćiavè ite o le isolé les condütes tl’aria che é bele.
   

(1) L’ejaminaziun de soportanza vëgn damanada por düć i planns o proieć che podess avëi n influs important tl raiun Natura 2000. Ara vëgn fata tl cheder di prozedimënć de aprovaziun bele odüs danfora dales normes provinziales por i planns y i proieć che alda laprò.

(2) I organns singui o colegiai competënć por l’ejaminaziun y l’aprovaziun di planns y di proieć aladô dles normes provinziales se damana por chësc fin l’arat da pert de n espert o de na porsona inćiariada dala Repartiziun provinziala Natöra y contrada sön l’influs dl plann o proiet sön le raiun y süa conservaziun.

(3) La porsona che presentëia le plann o le proiet dà jö la documentaziun preodüda tl’injunta F por l’arat preodü dal coma 2.

(4)  Tl respet de ći che vëgn odü danfora dal coma 5, po n plann o n proiet gnì aprovè inće sce l’arat dl espert o dla porsona inćiariada dala Repartiziun provinziala Natöra y contrada é negatif, sce al n’é nia n’atra soluziun y sce al mëss gnì realisé por rajuns de gran interès publich, cun laprò les rajuns de natöra soziala o economica.

(5) Sce al é n habitat natural prioritar o na sort prioritara tl raiun, pol ma gnì lascè avarëi conscidraziuns liades ala sanité dla porsona y ala segurëza publica o liades a dër na bona faziun sön l’ambiënt o, do avëi ciafè l’arat dla Comisciun europeica, a d’atres rajuns costritives de gran interès publich.

(6) I provedimënć de aproaziun por i caji preodüs dai comesc 4 y 5 desponn eventualmënter inće a ćiaria dla porsona che à fat la proposta, les mosöres compensati-ves che va debojëgn por garantì la coerënza globala dla rëi ecologica europeica Natura 2000. 14)15)

(1) Tl teritore dla provinzia de Balsan él proibì da cöie adöm y tó fora corëć.

(2) Le diretur o la direturia dla Repartiziun provinziala Natöra y contrada po, do avëi ciafè l’arat dl Museum Natöra Südtirol, autorisé de cöie adöm y tó fora corëć ma por rajuns scientifiches y didatiches o por cöie adöm reperć en colaboraziun cun le Museum Natöra Südtirol.

(1) Tl teritore dla provinzia de Balsan adóron n’autorisaziun por cöie adöm y tó fora minerai.

(2) Sce le patrun dl terac ne le proibësc nia, autorisëia le diretur o la direturia dla Repartiziun provinziala Natöra y contrada de cöie adöm y de tó fora minerai ma:

1. ales porsones scrites ite pro n’assoziaziun mineralogica assoziada ala federaziun provinziala;
   
2. ales porsones scrites ite pro n’assoziaziun mineralogica cun sënta fora dal teritore provinzial, sön domanda dla federaziun provinziala y por n tëmp limité;
   
3. a porsones che po desmostrè de avëi na esperiënza particolara y na conescënza spezialistica te chësc ćiamp.
   

(3) L’autorisaziun é personala, ara vel ma por n tëmp limité y ti vëgn ma dada a porsones che à bele cumplì 14 agn.

(4) L’autorisaziun da cöie adöm y tó fora minerai ne po nia gnì conzedüda por i raiuns sot a sconanza, sciöche i monumënć naturai, i biotops, i raiuns ti planns teritoriai suracomunai, i parcs naturai y i raiuns sotmetüs ala proibiziun de cöie adöm, ater co por rajuns scientifiches y didatiches o por la racoiüda fata en colaboraziun cun le Museum Natöra Südtirol, do avëi ciafè l’arat positif dl Museum.

(1) Sce an ciafa minerai y corëć ia por tera ne vëgn chësc nia aratè sciöche cöie adöm.

(2) Pro l’estraziun de minerai y corëć pon adorè i stromënć usuai, sciöche maciües o martì ćina a cin chili, scarpì ćina a 40 zentimetri lunć, badis, picli y d’atri mesi manuai. L’adoranza de mascinns da forè de vigni sort, materiai esplosifs y injins d’alzamënt idraulics mëss gnì autorisada dal diretur o dala direturia dla Repartiziun provinziala Natöra y contrada.

(3)  N iade che l’estraziun é stlüta jö mësson mëte döt apost denant co s’un jì. Le mantel de vegetaziun mëss gnì metü apost sciöche al ê denant y aladô dles carateristiches particolares dl post.

(1) La Provinzia autonoma de Balsan sostëgn la sconanza dla natöra y dla contrada. Ara po sostignì le laûr de assoziaziuns y organisaziuns che se dà jö cun chësc compit cun contribuć y mosöres d’aiüt, mëte a desposiziun mesi adatà y surandè laûrs de inrescida y de planificaziun.

(2) La Provinzia autonoma de Balsan sostëgn dantadöt la inrescida y le laûr scientifich, sciöche inće la sensibilisaziun y l’informaziun por sconè les sorts y i habitać aladô dla diretiva habitat y dla diretiva sön la sconanza di vicì.

(1) La Provinzia autonoma de Balsan po stlüje jö cun i patruns di terac o cun chi che à le dërt de stlüje jö contrać de dërt privat sön chisc terac, por paié certes prestaziuns, limitaziuns o d’atres mosöres. Te de te’contrać pora nen jì de mosöres aladô dla diretiva habitat o dla diretiva sön la sconanza di vicì, mosöres por la conservaziun y la cura di raiuns sot a sconanza, cun laprò la gestiun di raiuns sot a sconanza y la redaziun y atuaziun di planns de gestiun por la conservaziun y la cura de raiuns da parü, bosć da spona, pra süć y megri o por la conservaziun y la cura de brüsces o trognores importantes por l’agricoltöra o la natöra.

(2) La Junta provinziala emanëia diretives sön la stipulaziun di contrać preodüs dal coma 1, sön la sort y la cuantité di compënsc y sön sües prescriziuns, condiziuns y tomanzes.

(1) La Repartiziun provinziala Natöra y contrada en colaboraziun cun l’ofize provinzial competënt en materia de ćiacia y pëscia, ćiara sura y documentëia la condiziun de conservaziun di habitać naturai y di tiers y dles plantes salvari, tignin cunt di habitać y dles sorts prioritares aladô dla diretiva habitat y dles sorts preodüdes tl’injunta I dla diretiva sön la sconanza di vicì; ara scrì vigni sis agn na relaziun aposta.

(2)  La relaziun preodüda dal coma 1 contëgn inće informaziuns sön les mosöres de conservaziun fissades dala Junta provinziala y la valutaziun dles conseguënzes de chëstes mosöres sön la condiziun de conservaziun di habitać naturai preodüs tl’injunta I y dles sorts preodüdes tl’injunta II dla diretiva habitat.

(1) Le personal dla Repartiziun provinziala Natöra y contrada y dl’Agenzia provinziala por l’ambiënt, inćiarié por chësc fin dal diretur respetif o dala direturia respetiva, le Corp di verdabosch provinzial y la polizia de comun ćiara che chësta lege vëgnes osservada.

(1) Sce an ne se tëgn nia ales normes sön la sconanza di tiers salvari, di corëć y minerai vëgn düć i tiers y dötes sües formes de svilup, düć i corëć y düć i minerai confiscà.

(2) Che che ne dà nia dant do na amoniziun formala ći che é preodü dal coma 1, vëgn straufè cun na sanziun aministrativa dui iadi tan alta co la soma preodüda dal articul 31 por les violaziun che alda laprò.

(3) I tiers confiscà o sües formes de svilup vëgn metüdes indô te so ambiënt natural sce ara va.

(4) I tiers confiscà che ne po nia gnì metüs indô te so ambiënt natural, sciöche inće i corëć y i minerai confiscà, ti vëgn surandà al Museum Natöra Südtirol.

(01) Tl caje de violaziun dles desposiziuns preodüdes dal coma 6 dl articul 2 y definides cun regolamënt d’esecuziun, vëgnel apliché aladô dla gravité dl’infraziun sanziuns che vá da 100,00 euro a 3.000,00 euro.  16)

(1) Che che ne se tëgn nia ala desposiziun preodüda dal articul 3, coma 2 sön le comerz de tiers salvari, mëss paié na sanziun aministrativa de 100,00 euro a tier.

(2) Che che ne se tëgn nia ales desposiziuns preodüdes dal articul 4, coma 5 o dal articul 5 sön la sconanza dles sorts de tiers daldöt sot a sconanza, mëss paié na sanziun aministrativa de 200,00 euro.

(3) Che che ferësc o stlopëta n tier daldöt sot a sconanza mëss paié na sanziun aministrativa de 200,00 euro a tier.

(4) Che che danejëia o desfej i posć de nidificaziun, de reproduziun, de palsa o de sojornanza di tiers daldöt sot a sconanza, mëss paié na sanziun aministrativa de 300,00 euro; sce les surasperses é majeres co diesc metri cuadrać vëgn la sanziun alzada de 30,00 euro por vigni meter cuadrat implü.

(5) Che che ne se tëgn nia ales desposiziuns preodüdes dal articul 7, coma 4, lëtra a) y dal articul 9, coma 1 sön la sconanza dles plantes daldöt sot a sconanza, mëss paié na sanziun aministrativa de 50,00 euro por la pröma planta, plü 5,00 euro por vigni planta implü.

(6) Che che ne se tëgn nia ales desposiziuns preodüdes dal articul 7, coma 4, lëtra b), sön la sconanza dl ambiënt natural dles plantes daldöt sot a sconanza, mëss paié na sanziun aministrativa de 300,00 euro; sce les surasperses é maius co diesc metri cuadrać vëgn la sanziun alzada de 30,00 euro por vigni meter cuadrat implü.

(7) Che che ne se tëgn nia al articul 8, coma 2, y cöi passa diesc stinfes de plantes en pert sot a sconanza, mëss paié na sanziun aministrativa de 30,00 euro, plü 5,00 euro por vigni planta implü.

(8) Che che ne se tëgn nia ales desposiziuns preodüdes dal articul 8, coma 3, mëss paié na sanziun aministrativa de 100,00 euro.

(9) Che che ne se tëgn nia ales desposiziun preodüdes dal articul 8, coma 5 sön la racoiüda de plantes en pert sot a sconanza por le bojëgn personal, mëss paié na sanziun aministrativa de 70,00 euro.

(10) Che che ne se tëgn nia ala desposiziun preodüda dal articul 12 sön la introduziun de tiers che ne alda nia pro chi dl post, mëss paié na sanziun aministrativa de 300,00 euro y condüje demez i tiers.

(11) Che che ne se tëgn nia ala desposiziun preodüda dal articul 15, coma 1, lëtra b) sön la zircolaziun cun barches a motor, mëss paié na sanziun aministrativa de 200,00 euro.

(12) Che che ne se tëgn nia ales desposiziuns preodüdes dal articul 16, coma 5 sön le sié popolamënć de ćiana y fostüa y fossà de bonificaziun, dal articul 18, coma 1 sön le agaié trognores y brüsces, dal articul 19, comesc 1 y 3 sön le ti dè füch y l’adorè erbizig y dal articul 21, coma 4, lëtra g) sön le spane coltöra minerala y coltöra organica lüjia ti raiuns Natura 2000, mëss paié na sanziun aministrativa de 200,00 euro; sce les surasperses é maius co 50 metri cuadrać vëgn la sanziun alzada de 10,00 euro por vigni meter cuadrat implü.

(13) Che che ne se tëgn nia ales desposiziuns preodüdes dal articul 23, coma 1, sön la racoiüda y l’estraziun de corëć, o cöi adöm minerai zënza l’autorisaziun preodüda dal articul 24, coma 1 o ne se tëgn nia ales condiziuns dl’autorisaziun preodüda dal articul 23, coma 2 o dal articul 24, mëss paié na sanziun aministrativa de 300,00 euro. La medema sanziun mëss inće gnì paiada da che che ne ti mostra nia al personal de verda l’autorisaziun preodüda dal articul 23, coma 2 o dal articul 24.

(14) Che che adora d’atri stromënć co chi che é odüs danfora dal articul 25, coma 2, mëss paié na sanziun aministrativa de 200,00 euro.

(15) Che che ne mët nia indô apost le mantel de vegetaziun y le post sciöche scrit dant dal articul 25, coma 3, mëss paié na sanziun aministrativa de 300,00 euro.

(16) Les sanziuns aministratives da apliché aladô di comesc da denant, ne po a vigni moda nia ester majeres co 20.000 euro. 17)

(1) Les desposiziuns sön la sconanza dles sorts preodüdes dala pert II y sön la sconanza di minerai y di corëć preodüs dala pert V, sostituësc dötes les desposiziuns che alda laprò preodüdes ti vincui dla contrada.

(1) Le coma 4 dl articul 3 dla lege provinziala di 17 de messè dl 1987, n. 14, y mudaziuns suandëntes, vëgn mudé insciö:

“4. L’Osservatore dla salvarjina é n organn de consulënza tecnich-scientifica dl’aministraziun provinziala y à süa sënta te sü ofizi. Al dà jö i arać odüs danfora dal articul 2, coma 3, dla lege regionala di 30 d’aurì dl 1987, n. 3, y mudaziuns suandëntes, y ti caji preodüs da chësta lege. L’Osservatore dla salvarjina mëss ester metü adöm aladô dla consistënza di grups linguistics pro l’ultima cumpedada dla popolaziun, tl respet dla poscibilité de rové pormez por le grup linguistich ladin.”

(2) Le coma 1 dl articul 9 dla lege provinziala di 17 messè dl 1987, n. 14, y mudaziuns suandëntes, vëgn sostituì insciö:

“1. Tles oases de sconanza él proibì da jì a ćiacia. Ti biotops sot a sconanza da passa diesc etars o che confinëia diretamënter cun le raiun de sconanza dl Parch Nazional Ju de Stielva, él conzedü da controlè la salvarjina da aundles che an po ćiacè ti limi dl plann sön le stlopetè preodü dal articul 27 y stlopetè les olps.”

[(3) Do le coma 1 dl articul 9 dla lege provinziala di 17 de messè dl 1987, n. 14, y mudaziuns suandëntes, vëgnel ajuntè chësc coma:

“1/bis. L’assessur provinzial competënt por la ćiacia po, do avëi aldì l’Osservatore dla salvarjina y la Repartiziun provinziala Natöra y contrada, conzede de stlopetè tles oases de sconanza certes sorts de salvarjina preodüdes dal articul 4, comesc 1 y 2, por rajuns biologiches y igienich-sanitares y por stravardè les coltivaziuns agricoles y forestales y i pësc da dagns.”]3)

(4) Le coma 2 dl articul 9 dla lege provinziala di 17 de messè dl 1987, n. 14, y mudaziuns suandëntes, vëgn sostituì insciö:

“2. Aladô de chësta lege é les oases de sconanza i biotops sot a sconanza aladô dla lege provinziala di 25 de messè dl 1970, n. 16, y mudaziuns suandëntes. La Junta provinziala stabilësc apêr dles rutes de migraziun di vicì da migraziun oases de sconanza por portè pro al mantignimënt y ala cura, aladô di bojëgns ecologics di habitać di vicì da migraziun.”

(1) Le coma 3 dl articul 8 dla lege provinziala di 19 jügn dl 1991, n. 18, y mudaziuns suandëntes, vëgn sostituì insciö:

“3. Ti monumënć naturai, ti biotops, ti parcs naturai, ti raiuns Natura 2000 y tl raiun dl Parch Nazional Ju de Stielva tla provinzia de Balsan vëgnel alzè dl 50 porcënt les straufunghes odüdes danfora da chësta lege sce an cöi de plü fonguns co che an nen po cöie.”

(1) Do la lëtra e) dl coma 1 dl articul 18-bis dla lege provinziala di 25 de messè dl 1970, n. 16, vëgnel ajuntè chësta lëtra:

“f) la gestiun dl aflus de vijitadus ti raiuns sot a sconanza, la realisaziun de trus tematics y naturalistich-didatics y i intervënć de sensibilisisaziun tl ćiamp dla sconanza dla natöra y dla contrada, sciöche inće dla cultura dl frabiché.”

(1) Chëstes leges provinziales vëgn abrogades:

1. la lege provinziala di 28 de jügn dl 1972, n. 13, y mudaziuns suandëntes;
   
2. la lege provinziala di 13 d’agost dl 1973, n. 27, y mudaziuns suandëntes;
   
3. la lege provinziala di 12 d’agost dl 1977, n. 33, y mudaziuns suandëntes.
   

(1) La spëisa por i intervënć a ćiaria dl eserzize 2010 che vëgn da chësta lege vëgn curida cun les cuotes de stanziamënt ćiamò dan man sön les UPB 25105 y 25210 dl bilanz provinzial 2010 autorisades por i intervënć odüs danfora dala lege provinziala abrogada dal articul 36, lëtra b).

(2) La spëisa a ćiaria di eserzizi finanziars suandënć vëgn stabilida cun lege finanziara anuala.

(1) Chësta lege va en forza 60 dis do süa publicaziun tl Boletin Ofizial dla Regiun.

Chësta lege gnarà publicada tl Boletin Ofizial dla Regiun. Vignun a chël ch’al ti speta é oblié da la respetè y da la fà respetè sciöche lege dla Provinzia.