(1) Sce l vën depusità o arbandunà refudam tlassicà cochemei te lueges defrëntes da chëles stabilides da chësta lege y nia autorisedes, cumanda l ambolt sun senialazion di organns che sëuranstà ala verdia y tl respet dl’aplicazion dla straufonghes aministratives y penales, al respunsabl dla trasgrescion de scunjaré, de nvië via ala recupereda o al smaltimënt dl refudam o a dejëujer l ressanamënt, adum cun l patron dla spersa y i tituleres de dërc reei o persunei de giaudënza sun la spersa, a chëi che la viulazion ie mputabla per ntenzion o nedlijënza. Sce l orden ne vën nia usservà tl tëmp fissà danora, tòl l ambolt pruvedimënc d’ufize. La spëises cunliedes vën scudides dal chemun a cëria di sogec ubliei. Tl cajo che n ne abina nia la persona respunsabla dla viulazion se cruzia l chemun de nvië via l tratamënt dl refudam.
(2) Ora che per cie che ie udù danora dala despusizions valëivles tla materia dla defendura dl ambient, sce l se porta pro situazions de bujën straurdener y de prëscia per la defendura dl ambient y sce la ne va nia autramënter, possa l Presidënt dla Provinzia y l ambolt, uni un te si ciamp de cumpetënza, dé ora urdenanzes de prëescia y de bujën, per lascé pro temporermënter formes de gestion dl refudam spezieles, ënghe n derogazion ala despusizions che ie n forza.
