(1) L’IPFS po gnì autorisé cun deliberaziun dla Junta provinziala a zede en proprieté ćina al 30 porcënt de so patrimone de frabiches che à almanco 10 agn dal dé olach’al é gnü dè fora le zertificat d’abitabilité.
(2) Le prisc de zesciun dles abitaziuns corespogn al prisc de marćé stabilì dal Ofize sciazada dla Provinzia, tignin cunt dles spëises de manutenziun straordinara autorisades dal IPFS y paiades dal afitadin.
(2-bis) I acuirënć che à les condiziuns generales por gnì lascià pro ai alisiramënć por frabiché dla Provinzia po damanè ch’al ti vëgnes arbassè le prisc de zesciun dl 20 porcënt.340)
(2-ter) Por les abitaziuns zedüdes en proprieté aladô dl coma 1 ne pol nia gnì damanè i alisiramënć por la cumpra de abitaziuns aladô dla seziun 8.341)
(3) Dala zesciun vëgnel stlüt fora les abitaziuns de sorvisc dl IPFS, les abitaziuns preodüdes tl regolamënt d’esecuziun dl articul 22, coma 5 y les abitaziuns assegnades a categories soziales particolares o a porsones atempades.
(4) L’IPFS à l’autorisaziun a alienè imobii che ne jô nia a sü fins istituzionai o a fà na permuta cun abitaziuns o cun d’atri imobii che podess gnì trasformà te abitaziuns.
(5) Les desposiziuns de chësta seziun vëgn aplicades inće por les abitaziuns de proprieté dla Provinzia che ti é gnüdes surandades en aministraziun al IPFS. La venüda de abitaziuns che é de proprieté dla Provinzia vëgn fata dal IPFS por la Provinzia. Ći che vëgn trat ite dala venüda ti röia tl bilanz dla Provinzia, do ch’al é gnü trat jö na cuota dl 5 porcënt sciöche retüda dles spëises.
(5-bis) Les abitaziuns y les unités imobiliares zedüdes dal IPFS aladô dl articul 42, coma 3-bis, dla lege provinziala di 20 de dezëmber dl 1993, n. 27, y mudaziuns suandëntes ne pó nia gní venüdes - gnanca en pert - por diesc agn alalungia dala data d’iscriziuns tl liber fondiar dl contrat de cumpra, ince por les faziuns preodüdes dal articul 1, coma 20 dla lege di 24 de dezëmber dl 1993, n. 560, y mudaziuns suandëntes. Le lian da ajunté tl contrat de cumpra vëgn registré tl liber fondiar. 342)
Le coma 2-bis é gnü injuntè dal art. 38 dla L.P. di 9 de jenà 2003, n. 1.
Le coma 2-ter é gnü injuntè dal art. 38 dla L.P. di 9 de jenà 2003, n. 1.
L'art. 122, coma 5-bis é gnü ajunté dal art. 21, coma 5 dla l.p. di 10 de jená dl 2022, n. 1.