(1) Sce por abitaziuns zedüdes en proprieté aladô dl articul 122, coma 1 vëgnel damanè la reduziun dl prisc de zesciun aladô dl articul 122, coma 2-bis, mëssel gnì anotè adöm al’iscriziun dl dërt de proprieté tl liber fondiar le lian sozial por le frabiché abitatif alisiré aladô dl articul 62. Por faziun dl lian sozial é la reduziun dl prisc de zesciun anfat ala conzesciun de n contribut de un n iade tla medema mosöra.344)
(2) Le lian comporta che l’IPFS à sön chësta abitaziun n dërt de cumpra por la dorada de diesc agn da canche le contrat de cumpra é gnü stlüt jö inće tl caje de n’alienaziun ma parziala. Por chësc fin mëss la porsona proprietara dl’abitaziun che à intenziun dl’alienè informè l’IPFS tres lëtra racomanada cun recioiüda derevers. L’IPFS po eserzité le dërt de cumpra anter 60 dis. I contrać stlüć jö violan chësc coma é zënza valur.
(3) Al proprietar ti spétel n prisc che corespogn a chël paié al IPFS por la zesciun. Chësc prisc vëgn revaluté en proporziun al’aumënt dl indesc dl cost dla vita y plü inant svaluté cun l’aplicaziun di coefiziënć preodüs dal articul 20 dla lege di 27 de lugio 1978, nr. 392 tignin cunt dla maiù eté dl’abitaziun. Dal prisc insciö stabilì vëgnel trat jö i alisiramënć eventuai che ti é gnüs dà al cumpradù originar y n’é nia ćiamò gnüs paià derevers.