(1) Al vëgn alisiré la recuperada de frabicac o de perts de chisc che â bele dan la presentaziun dla domanda la funziun de ciases de calonia o ciases d’alberch por comunités religioses y che mantëgn, ince do la recuperada, la destinaziun d'adoranza abitativa por les medemes comunités religioses.
(2) Al vëgn alisiré la recuperada de frabicac o perts de chisc da pert de ënc publics o de organisaziuns zënza fins de davagn, scrites ite tl register provinzial dles porsones iuridiches, che se impegnëia, tres na detlaraziun d'oblianza unilaterala, da destiné chisc frabicac a convic por studënc y studëntes, a ciases d'alberch por porsones cun n contrat de laur o de lernerat, a proiec abitatifs por porsones atempades, porsones cun handicap, maraties psichiches o dependënzes, por jënt jona o ince a abitaziuns por la convivënza de de plü generaziuns y le cohousing o a proiec abitatifs somiënc.
(3) Por i laurs de recuperada sön frabicac o perts de chisc sön chi che al n'é gnü fat degügn de te laurs ti ultimi 25 agn vëgnel conzedü n contribut de investiziun. I ogec de aredamënt vëgn stlüc fora dal contribut. Al mëss gní desmostré la proprieté plëna o le dërt de suraspersa por almanco 99 agn sön l'imobil oget dl alisiramënt por frabiché.
(4) I frabicac recuperá mëss mantigní la medema destinaziun d'adoranza por 20 agn alalungia. Le proprietar/La proprietara stlüj jö cun le diretur-la direturia dla Repartiziun provinziala Frabiché abitatif na detlaraziun d'oblianza unilaterala. Sce le proprietar-la proprietara ne ademplësc nia les desposiziuns dla detlaraziun d'adoranza unilaterala stlüta jö vëgnel revoché l'alisiramënt por frabiché. Tl caje de na revocaziun mëssel gní retü l'import dl alisiramënt cun lapró i fic legai che vëgn calcolá dal de che al é gnü paié fora l'alisiramënt.
(5) La Junta provinziala stabilësc i criters y les modalités por ti podëi pormez al alisiramënt y por süa licuidaziun y definësc le contignü dla detlaraziun d'oblianza unilaterala y les modalités por renunzié al alisiramënt. 227)