(1) Por sostigní l'afit de abitaziuns prinzipales a porsones privates pó la Provinzia autonoma de Balsan conzede contribuc por spëises corëntes y por investimënc a bëgn de ënc privac che istituësc y manajëia fonds de garanzia. I fonds de garanzia á sciöche fin chël da smendrí le risch che al ne vëgnes nia fat le paiamënt tl caje dl afit de abitaziuns prinzipales a porsones privates sön la basa de n contrat d'afit regolar, tl limit de imporc mascimai determiná danfora y sce al é condiziuns determinades, sce i afitadins o les afitadines ne ademplësc nia les oblianzes de paiamënt y é tla situaziun de paiamënt intardié.
(2) Al fonds de garanzia preodü dal coma 1 mëssel tó pert les organisaziuns de rapresentanza dla proprieté abitativa plü rapresentatives a livel provinzial.
(3) Le fonds de garanzia pó ma gní anuzé dai afitadus y dales afitadësses de imobii che tol pert a so finanziamënt. Les prestaziuns dl fonds de garanzia é ma por porsones privates.
(4) L'anuzamënt dl fonds de garanzia da pert de afitadus y afitadësses tol en conscidraziun la retüda integrala o parziala di imporc che é debit da pert dl afitadin o dl'afitadina, ince do che al é gnü paié fora imporc eventuai da pert dl fonds de garanzia.
(5) Na pert dles ressurses dl fonds de garanzia pó gní destinada da indenisé i afitadus o les afitadësses tl caje de dagns al imobil do che le raport de afit é rové.
(6) Por la conzesciun di contribuc preodüs dal coma 1 mëssel gní aprové damperfora le statut y le regolamënt dl fonds de garanzia dala Junta provinziala. Le regolamënt disciplinëia l'atuaziun de ci che vëgn odü danfora dai comesc da 1 a 5 de chësc articul.
(7) La Junta provinziala determinëia i criters por la conzesciun y le paiamënt di contribuc preodüs dal coma 1. 353)