(1) I eserzizies rezetifs vën tlassifichei, n basa ai recuisic che i à, cun l’asseniazion de n numer de stëiles da una a cinch. Dala tlassificazion vëniel stlut ora la ustaries da mont, i cunvic per feries, i albiercs per la junëza y, la plazes per autocaravan y i hotiei sparpaniei. La cëses y i cuatieres per feries vën alincontra tlassifichei aldò dla lege provinziela di 11 de mei 1995, n. 12, y mudazions suzessives. Ala sortes singules de eserzizies rezetifs ti vëniel assenià chësc numer de stëiles: 36)
- Garnis, pensions, ustaries, motels y paejes-hotel: una nchin cin stëiles,
- Campings: una nchin cin stëiles,
- Residences: doi nchin cin stëiles,
- Paejes turistics: doi nchin cater stëiles. 37)
(2) La tlassificazion vën fata n basa ai recuisic de ublianza per la categuria relativa, che ie da determiné cun regulamënt d’esecuzion, tenian cont dla dotazion, di recuisic struturei, di servijes pitei y dla cualificazion dla persones che lëura tl eserzize. Cun decret dl Presidënt dla Provinzia vëniel stabilì la manieres cun chëles che i criteres de tlassificazion scric dant dëssa unì publichei per uni tlassificazion. 38)
(3) Ai fins dla tlassificazion iel mé puscibl fé ezezion per un di recuisic de ublianza. Stluc ora da uni ezezion resta te uni cajo chëi recuisic che ie scric dant te na maniera ublienta cun regulamënt d’esecuzion.
(4) I eserzizies rezetifs cun carater d’albierch y a cin stëiles possa se dé la denuminazion “lus” sce i ie boni de mustré su i standarc tipics di eserzizies de tlassa internaziunela. I eserzizies a trëi o cater stëiles possa se dé sëuraprò la denuminazion “superior”, sce i à i recuisic fissei dal regulamënt d’esecuzion de chësta lege. I albiercs y la pensions cun almanco 35 lueges liet possa se dé la denuminazion “hotel” sce i à almanco doi stëiles. Per i albiercs y la pensions tlassifichei cun trëi stëiles ne vel deguna limitazion pervia dla lueges liec. I garnis y i residence tlassifichei cun almanco trëi stëiles possa se dé la denuminazion “garni-hotel” o residence-hotel” o apartment-hotel”.
(5) Per i eserzizies cun dependënzes vën la tlassificazion dla frabica prinzipiela y dla dependënzes singules fata separatmënter tenian cont di raporc funzionei reziprocs.
(6) I campings che ne à nia plu che trënta plazoles y che dejëuj si atività la ntegran nce cun d’autra ativiteies nia turistiches sustenian nsci l turism de camping itinerant, rural y de jita, à una na stëila. I campings y i paejes turistics se dà la denuminazion de njonta “A” sce i ie davierc ntan tramedoi sajons, uel dì, d’inviern y d’instà, o ntan dut l ann.
(7) Canche l ambolt dà ora l’autorisazion de mené l esezize fejel nce, sun la basa dla minonga lienta dl assessëur provinziel per l turism, la tlassificazion, zënza chëla che l’autorisazion ne possa nia unì data. Tl cajo d’eserzizies rezetifs cun carater d’albierch che damanda de giapé la tlassificazion trëi stëiles cun denuminazion “superior”, cater stëiles, cater stëiles cun denuminazion “superior” o cin stëiles, ti muessa al bensté dl assessorat provinziel per l turism jì danora n sëuraluech fat da na cumiscion ndependënta, metuda adum da na persona n reprejentanza dla repartizion provinziela cumpetënta y da una n reprejentanza dl’assoziazion de categuria plu reprejentativa di hoteliers y osć. N cajo possel unì numinà coche cumponënta dla cumiscion nce na persona esperta tl ciamp dl turism. 39)
(8) Cun delibrazion dla Jonta provinziela possel unì fat na tlassificazion nueva a livel provinziel. 40)
(9) Sce do che l ie unit fat n ampliamënt cualitatif y/o cuantitatif aldò dla lege provinziela di 11 d’agost 1997, n. 13, y mudazions suzessives, y dl regulamënt d’esecuzion respetif, ne curespuend i recuisic struturei azertei per la tlassificazion aldò de chësc articul y dl regulamënt d’esecuzion, tl tëmp de 12 mënsc dala fin di lëures, nia ai recuisic struturei udui danora per la tlassa de nchedramënt data sëura tl proiet per l ampliamënt cualitatif y/o cuantitatif apurvà, ne possa l eserzize nia unì tlassificà y chësc à coche cunseguenza la suspenscion dla lizënza d’eserzize. Sce, do che l ie unit fat n ampliamënt cualitatif y/o cuantitatif aldò dla lege provinziela di 11 d’agost 1997, n. 13, y mudazions suzessives, y do che l ie unit dat ora la lizënza d’eserzize respetiva ne curespuend i recuisic struturei azertei per la tlassificazion aldò de chësc articul y dl regulamënt d’esecuzion nia plu ai recuisic struturei udui danora per la tlassa de nchedramënt data sëura tl proiet per l ampliamënt cualitatif y/o cuantitatif apurvà, ne vel la tlassificazion nia plu y de cunseguenza vën la lizënza d’eserzize suspenduda. La suspenscion dla lizënza fina via cun l azertamënt di recuisic udui danora per la tlassa de nchedramënt data sëura tl proiet per l ampliamënt cualitatif y/o cuantitatif apurvà y do l’atribuzion dla tlassificazion respetiva. 40)
La pert danora dl articul 33, coma 1, ie unida mudeda nsci dal articul 55, coma 3, dla L.P. di 11 de lugio 2018, n. 10.
L articul 33, coma 1 ie n iede unit remplazà dal articul 6, coma 1 dla L.P. di 13 de nuvëmber 2009, n. 10, y dadedò dal articul 2, coma 5 dla L.P. di 14 de lugio 2015, n. 8.
L articul 33, coma 2 ie unit remplazà nsci dal articul 6, coma 1, dla L.P. di 13 de nuvëmber 2009, n. 10.
L articul 33, coma 7 ie unit remplazà nsci dal articul 37, coma 1, dla L.P. di 10 de juni 2008, n. 4.
L articul 33 ie unit mudà dal articul 28 dla L.P. di 3 de mei 1999, n. 1, dal articul 17 dla L.P. di 25 de jené 2000, n. 2, dal articul 35 dla L.P. di 8 d’auril 2004, n. 1, dal articul 9 dla L.P. di 23 de lugio 2007, n. 6; l coma 9 ie dadedò unit njuntà dal articul 9 dla L.P. di 23 de lugio 2007, n. 6.