(1) Eserzizies rezetifs a carater d’albierch ie garnis, pensions, hotiei, motiei, paejes-hotel y residence.
(2) Garnis ie eserzizies davierc al publich, menei unitermënter, ulache n possa durmì, ulache n giata da gusté, buandes y, n cajo, nce d’autri servijes de njonta, te almanco set majons nluegedes te una o deplù frabiches o te pertes autonomes de na frabica.
(3) Pensions ie eserzizies davierc al publich, menei unitermënter, che pieta da durmì, da gusté, almanco n cëif prinzipiel, buandes y, eventualmënter, nce d’autri servijes de njonta, te almanco set majons nluegedes te una o deplù frabiches o te pertes autonomes de na frabica.
(4) I hotiei ie eserzizies davierc al publich menei unitermënter, ulache n possa durmì y n giata da maië y da bever te almanco set majons nluegedes te una o deplù frabiches o te pertes autonomes de na frabica.
(5) I motiei ie eserzizies davierc al publich menei unitermënter, ulache n possa durmì y n giata da maië y da bever te almanco set majons nluegedes te una o deplù frabiches o te pertes autonomes de na frabica. Oradechël pieta i motiei lueges da parché i auti, na stazion dal penzin y n servisc d’assistënza y de reparazion per autoveicli.
(6) I paejes-hotel ie eserzizies davierc al publich, menei unitermënter, che pieta servijes zentralisei ai nuzënc dla uniteies abitatives nluegedes te deplù frabiches delimitedes sun na spersa unica, siveda ite y njinieda ite te na maniera aposta per la permanënza y l devertimënt di ghesć.
(7) I residence ie eserzizies davierc al publich, menei unitermënter, che pieta albierch y, eventualmënter, nce servijes de njonta, te almanco cin uniteies abitatives njiniedes ite y costituides da un o deplù locai y da na cësadafuech o na luegia per cujiné.
(8) Ora che tl cajo di paejes-hotel, vëniel definì “cësa prinzipiela” la frabica, ulache l ie nluegià, ora che i locai d’abitazion per i ghesć, nce i servijes primeres n generel y i servijes de njonta dl eserzize. Coche dependënza vën defineda uni autra frabica daujin, ulache l possa nce unì nluegià servijes de njonta.
(9) I albiercs pieta l servisc de restaurazion nce a chi che ne abitea nia iló.