(1) L’autorisazion de ntervënt per la realisazion de cuatieres a priesc lià ie sometuda ala cundizion che l soget nteressà, cun la stipulazion de n’acurdanza aposta, se ebe purvà, nce per la fazions dl articul 19 coma 3, ti cunfronc dl Chemun de frabiché y mëter a despusizion, per la cundizions nunziedes te chësc articul, cuatieres a priesc lià che curespuende ala carateristiches di cuatieres populeres nunziei tl articul 41 dla lege provinziela di 17 de dezëmber 1998, n. 13, y mudazions suzessives. Tl cajo de venduda muessa i cuatieres, l’autogarages y la lueges per i auti unì destinei, sun la basa dla graduatories dl Chemun y almanco nchin al arjunjimënt dla mesura preududa dal articul 24, a sodesfé l bujën abitatif primer permanënt dla persones che à i recuisic per l’asseniazion dla sperses dl frabiché abitatif alesirà aldò dl articul 82, coma 5, dla lege provinziela di 17 de dezëmber 1998, n. 13, y mudazions suzessives. I cuatieres, l’autogarages y la lueges per i auti che avanza possa unì vendui, sun la basa dla graduatories dl Chemun, nce a persones che ocupea l cuatier per si bujën abitatif primer permanënt y che curespuend ai recuisic nunziei tl articul 39. Per la somes di priejes de venduda iel da usservé l coma 3. Tl cajo de fit muessa la persones avëi l dërt de ocupé l cuatier aldò dla despusizions dl articul 39 y l vën aplicà l coma 2.
(2) L priesc de fit per cuatieres ne daussa nia vester plu aut dl priesc de fit provinziel nunzià tl articul 7 dla lege provinziela di 17 de dezëmber 1998, n. 13, y mudazions suzessives. L lim mascim dl priesc de fit per autogarages y lueges per i auti vën dat dant tl regulamënt nunzià tl coma 6.
(3) I priejes mascims lascei pro per la prima venduda y la revenduda de cuatieres, autogarages y lueges per i auti vën determinei dal regulamënt nunzià tl coma 6, tenian cont dl valor dl grunt, dl valor njuntà de planificazion da tré ju aldò dl articul 19, coma 3, y dla listes di priejes dla Provinzia autonoma de Bulsan per la garejedes de apalt di lëures publics.
(4) L’acurdanza nunzieda pra l coma 1 vëija danora, a bën dl Chemun la costituzion de garanzies y peneles per garantì l’atuazion cureta dl’acurdanza. L’acurdanza possa preudëi nce l fit cun venduda suzessiva eventuela. Cun chësta acurdanza vën l Chemun autorisà a anuté tl liber fundier, a spëises dl soget nteressà, i liams nunziei ti articuli 39 y 40. Cun la stipulazion dl’acurdanza vën l valor njuntà de planificazion, mé per i fins dl articul 19, coma 2, ratà scudì.
(5) L liam nunzià te chësc articul dura per 20 ani y pëia via dal’anutazion tl liber fundier. Per i fins dl liam nunzià te chësc articul vëniel anutà tl liber fundier la ublianza de vënder o fité i cuatieres, l’autogarages y la lueges per i auti tl respet dla despusizions de chësc articul cun l nulla osta dl Ambolt/dl’Ambolta esclujivamënter a persones che à i recuisic nunziei pra l coma 1; chësta ublianza vën aplicheda nce sce la prima venduda da pert dl soget nteressà vën permò fata do la destumeda dl liam di 20 ani. L nulla osta ie scrit dant per la venduda, l fit, l fit cun venduda suzessiva eventuela da pert dl soget nteressà nunzià tl coma 1, coche nce, ntan la dureda dl liam, per uni venduda dadedò, zescion dla metà nia spartida dla proprietà y l fit da pert di patrons. L vën lascià pro la venduda suzessiva y l fit da pert di patrons sce i alienanc/la alienantes o i/la fitadëures, ndependentmënter dala cunzescion dl alesiramënt per l frabiché, toma ite te n cajo preudù per i benefizienc/la benefizientes dl alesiramënt per l frabiché provinziel tl articul 63, coma 1, pustoms a), b), c), d), e) y g), dla lege provinziela di 17 de dezëmber 1998, n. 13, y mudazions suzessives. L nulla osta vën damandà dal soget nteressà o dal patron/dala patrona y l vën dat, sce l ie i recuisic udui danora da chësc coma, respetivamënter, dla persona alienanta o dla persona che fita via l cuatier y dla persona che compra l cuatier o respetivamënter dl fitadin/dla fitadina, y sce l priesc dl cuatier o l priesc de fit curespuend a cie che ie preudù da chësc articul y dal regulamënt nunzià pra l coma 6. Tl cajo che la mesa pert dla proprietà nia spartida vën venduda mo n iede y zeduda, mussa l cumpradëur/la cumpradëura avëi i medemi recuisic che l venditëur/la venditëura ova tl mumënt dla compra. Per la compra tl cheder dla venduda sfurzeda y per la suzescion tl cajo de mort dl patron/dla patrona ne muessa l agiudicater/l’agiudicatera y l suzessëur/la suzessëura nia avëi i recuisic nunziei pra l coma 1 y l ne ie nia scrit dant l nulla osta preudù da chësc coma. L agiudicater/L’agiudicatera y l suzessëur/la suzessëura possa ocupé ëi nstësc/ëiles nstësses l cuatier, l’autogarage o la luegia auti sce i/les à la medema cundizions che l zedënt/la zedënta ova abù tl mumënt dla compra; oradechël, a una cun la despusizion nunzieda dessëura, possi/posseles fité via o vënder l cuatier cun l nulla osta scrit dant a persones che n à l dërt. L suzessëur/La suzessëura, che tl mumënt dla mort cunvivova cun l patron/la patrona, possa persunalmënter ocupé l cuatier, l’autogarage y la luegia per i auti nce sce l/la ne à nia i recuisic che l predezedëur/la predezedëura de dërt ova tl mumënt dla compra.
(6) La Jonta provinziela, do avëi audì l Cunsëi di Chemuns, delibrea n regulamënt che cuntën mo d’autra normes ala menuda per l’atuazion de chësc articul. La dà nce dant i cuntenuc y la tlausules che muessa vester cuntenides tl’acurdanza nunzieda tl coma 1.
(7) La despusizions de chësc articul ie despusizions de dërt publich. I ac cuntreres ala despusizions de chësc articul ie nui. 103)