(1) Por l’inserimënt tles gradatöres de chisc profii profescionai dles scolines, scores provinziales dla formaziun profescionala y scores provinziales de musiga ladines vëgnel damané, dlungia i recuisic spezifics, ince le superamënt dl ejam sön la conescënza dl todësch y talian aladô dl Titul I dl decret dl Presidënt dla Republica di 26 de messé dl 1976, n. 752, y mudaziuns suandëntes, y dl ejam sön la conescënza dl ladin fat pro l’Intendënza ladina aladô dl articul 12 dl decret dl Presidënt dla Republica di 10 de forá dl 1983, n. 89, y mudaziuns suandentes:
- personal diretif dles scores y dles scolines;
- personal ispetif;
- personal pedagogich;
- personal dozënt y ecuiparé;
- personal educatif;
- colaboradus y colaboradësses por l’integraziun.
(2) Le coma 1 vëgn apliché por l’inserimënt tles gradatöres varëntes pian ia dal ann de scora 2018/2019. Le coma 1 vëgn apliché ince sce le personal provinzial nominé laora tles scores statales. Che che vëgn metü sön la gradatöra aladô di provedimënc da denant romagn sön les gradatöres suandëntes cina la tomanza dla domanda.
(3) Por l’atribuziun dl’indenité por l’adoranza dl ladin, preodüda dales desposiziuns de contrat coletif varëntes, mëss le personal preodü dal coma 1 avëi chisc zertifica:
- superamënt dl ejam de conescënza dl todësch y talian aladô dl Titul I dl decret dl Presidënt dla Republica di 26 de messé dl 1976, n. 752, y mudaziuns suandëntes, y
- superamënt dl ejam de conescënza dl ladin fat pro l’Intendënza ladina aladô dl articul 12 dl decret dl Presidënt dla Republica di 10 de forá dl 1983, n. 89, y mudaziuns suandentes, o superamënt dl ejam de conescënza dl ladin aladô dl Titul I dl decret dl Presidënt dla Republica di 26 de messé dl 1976, n. 752, y mudaziuns suandëntes.
(4) Le coma 3 vëgn apliché ince por l’atribuziun dl’indenité de trilinguism, preodüda dales desposiziuns contratuales coletives varëntes, al personal dozënt, dirigënt y ispetif dles scores statales.
(5) Le contignü dl ejam de conescënza dl ladin fat pro l’Intendënza ladina aladô dl articul 12 dl decret dl Presidënt dla Republica di 10 de forá dl 1983, n. 89, vëgn stabilí dal Intendënt por les scores ladines. Chësc ejam vëgn ecuiparé al ejam de conescënza dl ladin aladô dl Titul I dl decret dl Presidënt dla Republica di 26 de messé dl 1976, n. 752, y mudaziuns suandëntes, preodü por le livel dl titul de laurea, tan inant che al ne vëgn nia dé dant val’ d’ater. Chësc vel ince por i ejams fac dan la jüda en forza de chësc articul.
(6) Ti caji olache chësc articul vëiga danfora l’ejam de conescënza dl todësch, talian o ladin aladô dl Titul I dl decret dl Presidënt dla Republica di 26 de messé dl 1976, n. 752, y mudaziuns suandëntes, mëss l’atestat fá referimënt al livel preodü por l’azes al profil profescional che alda lapró. 50)