r) Lege Provinziala di 14 de dezëmber dl 1998, n. 111)
Desposiziuns sön le sostëgn dl’agricoltöra

(1) Le fin dl sostëgn dl’agricoltöra é le mantignimënt y le consolidamënt de n'agricoltöra che ais sciöche fondamënta strotorala le paur y che tignis dantadöt cunt di aspec economics, soziai y ecologics.

(2) Al é dantadöt da tigní cunt de chisc fins:

1. valorisé la balanza regionala, ciaran dandadöt di raiuns da munt;
   
2. orienté la produziun, la lauraziun y la comerzialisaziun de produc agricui cuntra fins de comerz;
   
3. mioré la produtivité y la concorënza dl'agricoltöra, te na manira particolara tres intervënc strotorai;
   
4. sostigní l'agricoltöra, ciaran dl'economia y di interesc di consumadus por che l'agricoltöra pois:
   
   1. smendrí sü desvantaji liá a faturs ambientai y naturai en confrunt a d’atri seturs economics;
      
   2. assiguré ala popolaziun le miú refornimënt poscibl de produc alimentars y de materies prömes de gran cualité;
      
   3. se adaté ai mudamënc di raporc sozio-economics y
      
   4. promöie la gestiun y la sconanza dla contrada sciöche elemënt dla cultura y dl tëmp lëde.
      
5. cherié o mantigní tl’agricoltöra n ambiënt de laur vantajus por la familia. 2)
   

(1) La Provinzia de Balsan é autorisada, sön la basa dles desposiziuns de chësta lege y tres mosöres de sostëgn spezifiches, da garantí la stabilité y le svilup dl'agricoltöra, rapresentada tla medema mosöra dles atres formes d'aziëndes agricoles a tëmp plëgn, a tëmp parzial y secundares.

(2) Le sostëgn ti pó ma gní dé sce:

1. al ti corespogn ai fins dl Plann provinzial de svilup y coordinamënt teritorial;
   
2. al vëgn ademplí les condiziuns dades dant dales diretives de atuaziun de chësta lege;
   
3. les mosöres de sostëgn ti corespogn ales normes iuridiches dades dant dal'Uniun Europeica.
   

(3) Pro la conzesciun de sostëgns mëssel gní tut en conscidraziun:

1. l'arjunjimënt di fins definis tl articul 1, che sides le plü ampl che ara vais;
   
2. la promoziun y le sostëgn dla scomenciadia individuala dles porsones che laora tl ciamp dl’agricoltöra;
   
3. l'arjunjimënt de n resultat che döres le plü dî che ara vais;
   
4. la produtivité dla porsona che ciafa le sostëgn y i resultac che chësta é bona da arjunje a bëgn dl interes general;
   
5. la garanzia de n ambiënt de laur vantajus por la familia, suradöt tles aziëndes coletives de trasformaziun y comerzialisaziun. 3)
   

(4) La modalité y la mosöra dl sostëgn mëss gní stabilides te na manira che al pois gní arjunt cun i mesi finanziars plü funzionai, da faziun y economics che ara vá, le miú resultat che ara vá.

(5) Sce les mosöres da sostigní se ghira n'autorisaziun ofiziala, pó le sostëgn ma gní conzedü do la jüda en forza de chësta autorisaziun.

(1) Le sostëgn vëgn dant tres:

1. paiamënc direc, contribuc de n iade, partezipaziun al paiamënt di fic, contribuc anuai, d’atri contribuc sön i cosć di credic bancars, sciöche ince garanzies de fideiusciun;
   
2. ativités de consulënza y de formaziun profescionala, sciöche ince d’atres prestaziuns de sorvisc y prestaziuns en natöra.
   

(1) Por arjunje i fins preodüs dal articul 1, pó la Junta provinziala conzede paiamënc direc, contribuc corënc, contribuc de capital, contribuc sön i fic y contribuc por la retüda de imprësć por:

1. i investimënc tecnics y da frabiché te aziëndes rurales singules o assoziades;
   
2. i investimënc da frabiché, sciöche ince la formaziun te impreses de trasformaziun y de comerzialisaziun;
   
3. le frabiché abitatif rural;
   
4. les infrastrotöres te raiuns rurai;
   
5. la promoziun dla proprieté di paurs y le mioramënt dles strotöres aziendales rurales;
   
6. la sconanza y le mioramënt dl ambiënt, suradöt por les mosöres y i investimënc por deslarié fora l'agricoltöra biologica;
   
7. le mioramënt dl zidlamënt dl bestiam, dl bëgnsté y dla sanité di tiers, sciöche ince la promoziun dl'ativité dles organisaziuns tl setur dl zidlamënt dl bestiam y tl setur dl lat;
   
8. la mortalité dl bestiam;
   
9. la scombatüda de epidemies;
   
10. les mosöres de prescia tl'agricoltöra, i sorvisc de sostituziun;
    
11. la remoziun di dagns gaujá da catastrofes naturales o dal bur tëmp, la defenüda passiva tres assiguraziun y imprësć coliá impara por paié les indenisaziuns ai paurs, ince tres consorc por la defenüda dles coltivaziuns agricoles dai dagns dal bur tëmp; 4)
    
12. la produziun y la comerzialisaziun di produc agricui, les aziuns por promöie la venüda;
    
13. le mioramënt dla cualité y dles strotöres tla produziun vegetala;
    
14. i provedimënc straordinars tla sconanza dles plantes;
    
15. le trasferimënt de conoscënzes y les aziuns d'informaziuns;
    
16. le sorvisc de consulënza;
    
17. l'inovaziun y i proiec da desmostré;
    
18. le pröm insediamënt de paures y paurs jogn;
    
19. i investimënc che á le fin da cherié na situaziun plü vantajosa por la familia.  5)
    

(2) Sön domanda dla porsona interessada pó la Junta provinziala conzede contribuc anuai o semestrai costanc dopormez, impede contribuc sön i fic y la retüda di imprësć preodüs dal coma 1 por le medemo tëmp y tla medema mosöra dl contribut che ti speta.

(3) Sce al vëgn stlüt jö n contrat de leasing por i investimënc preodüs dal coma 1, pó la Junta provinziala ti conzede al conzescionar, por döt le tëmp fissé tl contrat, ince contribuc sön les cutes periodiches. 6)

(4) Por valorisé l'agricoltöra ince amesa la popolaziun che ne se dá nia jö ativamënter tl setur agricul, pó la Junta provinziala autorisé, por promöie le svilup sostignibl di raiuns rurai y por respogne al bojëgn de multifunzionalité da pert dla sozieté che devënta tres majer, la Repartiziun provinziala Agricoltöra da organisé manifestaziuns, scomenciadies y de vigni sort de stüdi che reverda l'agricoltöra, o conzede aiüt a ënc, assoziaziuns cun o zënza personalité iuridica y a d’atres porsones iuridiches por les ativités nominades dessura. 7)

(1) Le finanziamënt dles mosöres de sostëgn provinzial tl cheder de chësta lege vëgn fat:

1. ma tres la Provinzia;
   
2. tres la Provinzia, adöm cun le Stat y/o l'Uniun Europeica.
   

(1) Aladô dl articul 1944, coma 1 dl codesc zivil é la Junta provinziala autorisada da dé na garanzia de fideiusciun solidara de alplü 800.000 euro sciöche garanzia dla retüda di finanziamënc danfora paiá dal organ de paiamënt aladô dl articul 52 dl regolamënt (CE) dla Comesciun dl'Uniun Europeica di 26 de forá dl 2002, n. 445, sciöche ince di fic eventualmënter da paié, al organ de paiamënt Agenzia por i paiamënc tl'agricoltöra (AGEA) da pert di comuns, de sües assoziaziuns, sciöche ince da pert de d’atri ënc de dërt publich cun la sënta tla provinzia de Balsan.

(2) Sce do che al é gnü dé la fideiusciun á la Provinzia messü paié por l'inademplimënt di ënc preodüs dal coma 1, pó la Junta provinziala fá recurs cuntra i ënc debiturs prinzipai aladô dl articul 1950 dl codesc zivil.

(3) La curida di cosć eventuai che vëgn dai risć dla conzesciun dla garanzia de fideiusciun vëgn fata cun i fonds metüs a desposiziun anualmënter tl bilanz provinzial aladô dl articul 30 dla lege provinziala di 29 de messé dl 2002, n. 1.  9)

(1) La Junta provinziala determinëia i criters y les modalités por la conzesciun dles alisiraziuns preodüdes da chësta lege cun na deliberaziun che vëgn publicada tl Boletin Ofizial dla Regiun. 10)

(1) Les funziuns dl organ de paiamënt por la gestiun di aiüc y di intervënc che reverda la politica agrara coletiva vëgn eserzitades tl setur dl'aministraziun provinziala en concordanza cun les desposiziuns comunitares y nazionales varëntes tl ciamp dla politica agrara coletiva.

(2) I podëis, i dovëis y les responsabilités por l’eserzize dles funziuns de organ de paiamënt provinzial vëgn determiná dala Junta provinziala, che autorisëia implü ince i mudamënc eventuai al regolamënt varënt sön la denominaziun y les competënzes di ofizi provinziai.

(3) Por i scudimënc y i paiamënc che toca pro i compic dl organ de paiamënt vëgnel preodü la gestiun de cassa fora dal bilanz aladô dl articul 65 dla lege provinziala di 29 de jená dl 2002, n. 1, y mudamënc suandënc, sciöche ince dl regolamënt d'esecuziun respetif, daurin cuntcorënc aposta tl istitut de credit a chël che al ti é gnü surandé le sorvisc de tesorier dla Provinzia.

(4) Tl caje de partezipaziun al finanziamënt da pert dl Stat o dla Provinzia autonoma de Balsan röia i paiamënc che alda lapró sön le cunt o tla gestiun preodüs dal coma 3.

(5) Por assiguré la sveltëza dl paiamënt di aiüc pól gní conzedü antizipaziuns di fonds che vëgn atribuis al capitul aposta dles contabilités speziales dl bilanz provinzial. Chëstes antizipaziuns vëgn retüdes dal scudimënt di finanziamënc comunitars y nazionai. 12)

(6) L'organ de paiamënt pó paié zoruch la soma dla CVA, che an ne ciafa nia zoruch o che ne vëgn nia metüda sön le decunt, y che vëgn dala gestiun di aiüc y di intervënc tl fonds FEASR - Fonds europeich agricul por le svilup rural - y paié fora i aiüc suplementars provinziai, ti limic autorisá dala Comisciun Europeica cun le Program de svilup rural dl fonds FEASR. Te tramidui i caji vëgnel paié cun i fonds che gnará stabilis anualmënter cun la lege finanziara tres la medema gestiun de cassa preodüda dal coma 3. Al pó gní tut ressurses danman sciöche cuota de partezipaziun al finanziamënt provinzial pro la gestiun de cassa nominada dessura. 13)

(1) I aiüc finanziars preodüs da chësta lege, sce al se trata de aiüc statai, pó gní conzedüs do la valutaziun positiva dl ejam de compatibilité di criters de sostëgn emaná aladô dl articul 7, coma 1, de chësta lege dala Comisciun Europeica aladô di articui 107 y 108 dl tratat che reverda le funzionamënt dl’Uniun europeica. 14)

Chësta lege gnará publicada tl Boletin Ofizial dla Regiun. Vignun a chël che al ti speta mëss la respeté y la fá respeté sciöche lege dla Provinzia.