(1) I comitënc publics pó surandé n apalt sot forma de de plü loc y determiné les dimenjiuns y l’oget de chisc loc. La spartiziun te loc cuantitatifs mëss a vigni moda garantí la funzionalité. Sce la sort d'apalt le conzed, vëgnel partí sö te loc cualitatifs sön la basa de n sistem de cualificaziun.
(2) I comitënc publics dá dant les rajuns prinzipales cuntra la spartiziun te loc; chëstes rajuns vëgn scrites sö ti documënc de gara o tla relaziun.
(3) I comitënc publics scrí tla bandida de gara o tl invit da confermé l'interes sce les ofertes pó ma gní presentades por n lot su, por n valgügn loc o por düc.
(4) I comitënc publics pó, ince sce al pó gní presenté ofertes por n valgügn o por düc i loc, limité le numer di loc che pó gní surandá a n su pitadú, a condiziun che le numer mascimal di loc por pitadú sides dé dant tla bandida de gara o tl invit da confermé l'interes. I comitënc publics dá dant ti documënc de gara les regoles o i criters ogetifs y nia discriminanc che ai ó adoré por fá fora ci loc che gnará surandá, sce l’aplicaziun di criters de surandada comportass la surandada a n su pitadú de n numer de loc majer co le numer mascimal.
(5) Ti caji che n su pitadú pois ciafé de plü co un n lot, pó i comitënc publics assegné apalc de de plü o de düc i loc, sce ai á dé dant, tla bandida de gara o tl invit da confermé l’interes, che ai se resservëia chësta poscibilité y dá dant i loc o i grups de loc che pó gní combiná.