(1) Por promöie mosöres che alisirëia la compatibilité de familia y laûr po la Provinzia ti conzede ales aziëndes, a sües assoziaziuns sciöche inće ai ënć publics y privać tla provinzia de Balsan contribuć por curì i cosć de gestiun dles microstrotöres y di sorvisc por le dé preodüs dai comesc 2 y 3 dl articul 1/bis sce chisc posć vëgn metüs a desposiziun de sües colaboradësses y de sü colaboradus diretamënter söl post de laûr o tres la cumpra de posć por mitans/mituns pro sorvisc analogs che é bele.
(2) La Junta provinziala determinëia cun na süa deliberaziun da publiché tl Boletin Ofizial dla Regiun, i criters y les modalitês por la conzesciun di contribuć preodüs dal coma 1; les impreses, sües assoziaziuns sciöche inće i ënć publics y privać che ciafa n contribut po ghiré che les families che s’anüza de chësc sorvisc toles pert ales spëises tla mesöra de alplü 35 porcënt de döt le costimënt.
(3) Por la gestiun dles microstrotöres y di sorvisc por le dé aziendai preodüs dal coma 1 po les impreses, sües assoziaziuns o i ënć publics y privać che ô mëte a jì chisc sorvisc por sües colaboradësses y sü colaboradus stlüje jö convenziuns aposta cun i ënć zënza fins de davagn che laôra tl setur di sorvisc por l’infanzia.
(4) Les microstrotöres aziendales por mitans y mituns danter trëi mëisc y trëi agn mëss respetè les carateristiches strotorales y funzionales determinades cun regolamënt d’esecuziun odü danfora dal art. 1/bis, coma 4.
(5) Cun regolamënt d’esecuziun vëgnel determiné les carateristiches strotorales y funzionales di sorvisc por le dé aziendai. 7)