a) Lege provinziala di 18 de jügn 2002, n. 81) —
Desposiziuns sura les eghes

(1)  Aladô de chësta lege capëscion sot a:

1. “eghes de suraspersa”: düć i elemënć naturai y artifiziai dl sistem idrografich che contëgn o condüj eghes de suraspersa duces che va o che é stagnëntes;
2. “eghes de sotfunz”: dötes les eghes sot tera ite tla zona de saturaziun che à n contat diret cun le terac o le sotterac;
3. “eghes”: n elemënt desfarenzié y omogenn dles eghes de suraspersa y de sotfunz sciöche na condüta dal´ega de sotfunz, n lêch, n resservar dal´ega, n rü, na gran ega o n canal;
4. “obietif de cualité ambientala”: obietif da arjunje por l´ega che vëgn determiné dala situaziun ecologica y chimica por ći che reverda les eghes de suraspersa y dala situaziun cuantitativa y chimica por ći che reverda les eghes de sotfunz;
5. “obietif de cualité por destinaziun d´adoranza particolara”: obietif de cualité da arjunje por l´ega a na manira da garantì na destinaziun d´adoranza dl´ega particolara;
6. “incuinamënt”: desćiaria de sostanzes o energia fata diretamënter o indiretamënter dala porsona tles eghes y che mëte en prigo la sanité dla porsona, fej dann ales creatöres y al sistem ecologich dles eghes, smendrësc l´atrativité dl´ega y arfera d´atres adoranzes legitimes dl´ega;
7. “desćiaria”: vigni rovenüda direta tres condüta dles eghes pazes de ćiasa, industriales o comunales te eghes de suraspersa, de sotfunz, sön le terac o tl sotterac, tla rëi de canalisaziun mo inće tles sarenares por le deflus comunal; dala noziun de desćiaria é stlütes fora les rovenüdes dles eghes aladô di articui 42, 44, 46 y 49;
8. “canalisaziun despartida”: la rëi de canalisaziun che é fata de döes condütes: öna na condüta canalisëia ma l´ega de prezipitaziuns y po ester dotada de sistems por la racoiüda y la despartida dla pröma ega de plöia y l´atra canalisëia les atres eghes pazes adöm a eventuales prömes eghes de plöia;
9. “eghes de desćiaria”: dötes les eghes pazes che provëgn da na desćiaria
10. “eghes pazes de ćiasa”: eghes pazes che provëgn da raiuns abitatifs y da sorvisc dantadöt de derivanza dla porsona y da ativitês de ćiasa y inće da insediamënć de produziun che porta pro a che à eghes pazes assimilables a chëres de ćiasa odüdes danfora dal’injunta L; 2)
11. “eghes pazes comunales”: le moscedoz de eghes pazes de ćiasa, eghes de industries o de prezipitaziuns te rëis de canalisaziun che po inće gnì abinades sö separatamënter y provëgn da n´aglomeraziun; 3)
12. “eghes pazes industriales”: vigni sort de eghes pazes desćiariades da stabilimënć o implanć olache al vëgn fat ativitês comerziales o de produziun de bëgns tan inant che ara ne se trata nia de eghes pazes de ćiasa o de eghes de prezipitaziuns;
13. “aglomeraziun”: raiun olache la popolaziun y les ativitês economiches é assà, a na manira che al é conzedü da n punt d´odüda tecnich y inće economich, en referimënt ai vantaji dl ambiënt che an po arjunje, da cöie adöm y desvié les eghes pazes comunales te na sarenara dles eghes pazes comunales o tl vers de n post de desćiaria final; 4)
14. “rëi de canalisaziun”: le sistem de condüta y implanć por cöie adöm y desvié les eghes pazes comunales;4)
15. “1 a.e. (abitant ecuivalënt)”: ćiaria organich-biologica scomponibla cun n bojëgn d´ossigenn biochimich te cin dis (BOD5) de 60 g de ossigenn al dé;
16. “sarenara”: totalité de costruziuns y implanć che garantësc n tratamënt adatè dles eghes de desćiaria tut ite inće le tratamënt dl paltan denant che al vëgnes reutilisé o desmandrè;
17. “tratamënt adatè”: le tratamënt dles eghes de desćiaria tres na prozedöra o n sistem de desmetüda che garantësces che les eghes rezipiëntes corespognes do la desćiaria ai obietifs de cualité o che la desćiaria corespognes ales desposiziuns de chësta lege;
18. “tratamënt primar”: tratamënt dles eghes pazes de ćiasa y de comun tres na prozedöra fisica y chimica olache les sostanzes che sta suraìa se lascia jö o tres d´atres prozedöres pro chëres che – en referimënt ai valurs d´aflus - le BOD5 vëgn smendrì de almanco 20 por cënt dan dala desćiaria y dötes les atres sostanzes dles eghes pazes che sta suraìa de almanco 50 por cënt;
19. “tratamënt secundar”: tratamënt dles eghes pazes de ćiasa y de comun tres na prozedöra de sarenaziun biologica cun na depuraziun secundara o n´atra prozedöra che garantësces al deflus la conformité cun i limi d´emisciun aladô dla injunta A o B;
20. “paltan de sarenara”: le paltan tratè o nia tratè che vëgn fora dles sarenares;
21. “valur limo d´emisciun”: limo de azetabilité mascimal de na sostanza incuinanta contignida te na desćiaria che vëgn mosorada en conzentraziun o en pëis por unité de produt o unité de materia pröma laurada fora o en pëis por unité de tëmp; 5)
22. “aplicaziun al terac”: trasport de material sön le terac tres la sternüda sön la suraspersa dl terac, l´inieziun tl terac, le curì pro cun tera y le moscedè cun i strać superfiziai dl terac;
23. “utilisaziun agrara”: l´aministraziun dles eghes de bestiam, dles eghes pazes fora dles aziëndes agricoles y fora de pices aziëndes por l´elaboraziun de produć agricoi, dala produziun ćina al´aplicaziun al terac cun l´obietif d´adorè sostanzes nudritives y de mioramënt dl grunt contignides te chëstes eghes o cun funziuns d´inagaziun o d´inagaziun che inculta;
24. “coltöra artifiziala”: vigni coltöra che vëgn prodüta tres na prozedöra industriala;
25. “eghes de bestiam”: escreziuns de bestiam o n moscedoz inanter sternüda y chëstes escreziuns, inće sot forma de n produt trasformè;
26. “coltöra”: vigni sostanza che contëgn öna o plü combinaziuns d´azot y vëgn sternüda fora sön le grunt por stimulè le crësce dla vegetaziun; laprò âldel les eghes de bestiam, les eghes fosces che provëgn da aziëndes agricoles y da aziëndes por l´elaboraziun de produć agricoi, i resć fora dl zidlamënt de pësc y i paltans aladô dla lëtra t);
27. “stabilimënt industrial” o scemplamënter “stabilimënt”: vigni frabicat o istalaziun olache al vëgn pratiché ativitês comerziales o industriales che porta ala produziun, ala trasformaziun o al´utilisaziun dles sostanzes aladô dles injuntes D y E o vigni atra prozedöra produtiva che comportes la presënza de de te´sostanzes tla desćiaria.6)
28. )"eghes minerales y termales": les eghes minerales naturales preodüdes dal articul 13 dla lege provinziala di 30 de setëmber dl 2005, n. 7, adorades por fins conzedüs dala medema lege. 7)