(1) Tl lim de tëmp di prim cin dis de uni mëns ti paia i nciariei dl scudimënt al tesorier provinziel l amudlé dla somes ncassedes ntan l mëns passà. La cubita revardënta chësc paiamënt ti vën njunteda al cont giudiziel y reprejentea n documënt de desćiarieda.
(2) Tl cajo che la somes ncassedes dai nciariei dl scudimënt sëurapassa l lim determinà dal diretëur dla Repartizion Finanzes y bilanz, muessi paië ite chësta somes per ntier dan l tiermul nunzià tl coma 1 al tesorier dla Provinzia o sun n cont curënt bancher aposta a inuem dla Provinzia.
(3) Sun chësc cont curënt bancher, autorisà dal diretëur dla Repartizion Finanzes y bilanz ruva ite, ora che la somes depusitedes aldò dl coma 2, ënghe i paiamënc nunziei tl articul 39, coma 3. La soma che se porta pro nchin ala fin dl mëns sun chësc cont curënt vën paieda ite al tesorier provinziel aldò de cie che ie udù danora tl coma 1. I fic madurei sun l cont curënt, tla mesura y cun capitalisazion nia mëndra de chëles ududes danora tla cunvenzion sun l servisc de tesoreria dla Provinzia, vën paiei ite dal nciarià al scudimënt provinziel ti prim cin dis dl mëns do chël dla licuidazion de chisc fic.
(4) Dla ntredes scudides da pert di nciariei dl scudimënt, muessa chisc rënder cont uni mëns ala Repartizion Finanzes y bilanz ti mandan l estrat dl register generel dla ntredes, cun la somes totales prugressives da mëns a mëns.
(5) Per la ntredes da chëutes possa la Jonta provinziela fissé la manieres de erogazion y de rendicontazion che ie defrëntes da chëles nunziedes te chësc articul.