a) Lege Provinziala di 29 de jenà dl 2002, n. 11)
Normes tla materia de bilanz y de contabltà dlaProvinzia autonoma de Bulsan

(1) La spëises dla Provinzia ie partides sù te:

1. funzions-mires per la politiches provinzieles de setor y dla verificazion di resultac dl’atività aministrativa.
   
2. uniteies de previjion de basa per l’apurvazion dl Cunsëi provinziel;
   
3. capituli, aldò dl oget curespundënt, tl plann de gestion nunzià tl articul 12, per la gestion y la rendicontazion.
   

(2) La uniteies de previjion de basa ie partides sù aldò dl’analisa economica te uniteies revardëntes la spëises curëntes, la spëises per nvestimënc, la spëises per l rembursamënt de mprësć y d’autra formes de finanziamënt y la spëises per la contablteies spezieles.

(3) La spëises curëntes cuntën la spëises per la perdujion y l’esecuzion normala di servijes aministratifs y i trasferimënc nia finalisei a nvestimënc.

(4) La spëises per nvestimënc tòl ite i nvestimënc direc y ndirec, la partezipazions y i cunferimënc de capital sciche nce la spëises per la cunzescion de credic.

(5) La spëises per l rembursamënt de mprësć y d’autra formes de finanziamënt tòl ite la somes de capital cunliedes a uni sort de debit.

(6) La contablteies spezieles tòl ite la spëises fates per cont de terzi, n raport a ntredes curespundëntes. Les tòl oradechël nce ite l’antizipazions per l servisc de economat y la spëises per chëles che la leges vëij danora che les vënie tenides te capituli dla contabltà speziela dl bilanz.

(7) La numerazion dla funzions-mires dla uniteies de previjion de basa y di capituli ie prugressiva, ma la possa unì suspenduda.

(8) L bilanz cuntën n ressumé dla spëises per funzions-mires, per tituli y categories aldò dl’analisa economica nunzieda pra l coma 2 y per zëntri de respunsabltà aministrativa.