(1) I stanziamënc de spëisa vën scric ite tl bilanz tla mesura che ie de bujën per dejëujer l’ativiteies y i ntervënc che n basa ala leges valëivles purterà cun sé ntan l eserzize mpënies de spëisa aldò dl articul 48; tlo iel da tenì cont di tiermui stabilìi tla leges provinzieles nunziedes tl articul 9 y dla pruzedures y di pruvedimënc nunziei tl articul 7. I stanziamënc de spëisa vën mé determinei aldò di bujëns funzionei y dla mires che ie efetivamënter da arjonjer tl tëmp a chël che l bilanz curespuend.
(2) Per la spëises che se tira ora per de plu ani y partides sù sun de plu eserzizies, ie la cuota da stanzië tl bilanz determineda cun i criteres udui danora tl coma 1, ti lims dla soma ntiera data sëura dala lege y tenian cont dla cuotes stanziedes ti bilanc da dant.
(3) Tl bilanz muessel te uni cajo unì stanzià la somes curespundëntes ai mpënies bele sëurantëuc a norma dl articul 8, comes 2 y 3, y a norma dl articul 48, comes 7 y 8, che destoma tl eserzize a chël che l bilanz ie referì.
(4) Tl cajo de spëises te rates anueles ududes danora dal articul 8, coma 3, vëniel dat sëura a pert y te na njonta aposta al bilanz, la somes che revardëntes i alesiramënc cunzedui ti eserzizies da dant y la somes despunibles per la cunzescion de alesiramënc nueves.
(5) Per l adatamënt di stanziamënc de bilanz ala destumënzes mudedes di mpënies y di paiamënc, possa i stanziamënc de bilanz unì partìi sù te na maniera defrënta tl tëmp de co che l ie udù danora tla leges de autorisazion dla spëisa curespundënta; l possa unì cumulà de plu ublianzes anueles, ma n ne daussa nia superé la soma y la dureda mascima de uni lim de mpëni ududes danora aldò dl articul 8, coma 3.