(1) Le finanziamënt dl Sorvisc sanitar provinzial vëgn assiguré tres le Fond sanitar provinzial scrit ite tl bilanz de previjiun dla Provinzia y cun stanziamënć integratifs evevtuai preodüs a ćiara dl bilanz provinzial, sciöch’inće tres dötes les atres entrades ciafades dales strotöres sanitares dla Provinzia.
(2) Le Fond sanitar provinzial vëgn alimentè da:
- les cuotes dl’entrada tributara
- entrades che reverda les prestaziuns sanitares tl ćiamp dla compensaziun dla mobilité sanitara por i paziënć che vëgn da d’atres regiuns, dala Provinzia autonoma de Trënt y da deforadecà;
- trasferimënć dal Stat y da d’atri ënć por proieć spezifics por curì les spëises corëntes y les spëises d’investiziun;
- d’atres entrades eventuales por les prestaziuns sanitares o por intervënć tl ćiamp dl’igiena y dla sanité publica che ti speta ala Provinzia.
(3) Les atres entrades ciafades dales strotöres sanitares dla Provinzia é:
- les entrades por prestaziuns sanitares o por intervënć tl ćiamp dl’igiena y dla sanité publica da pert dles strotöres de prestaziuns competëntes;
- les entrades y le davagn dal’utilisaziun dl patrimone;
- les donaziuns y atri ać de donaziun;
- les entrades nia nominades tles lëtres a), b) y c).
(4) Les ressurses finanziares aladô di comesc 1, 2 y 3 vëgn adorades por curì les spëises dles aziëndes sanitares por l’erogaziun dles prestaziuns sanitares y dles spëises por le destrigamënt dles ativitês sanitares che ti speta ala Junta provinziala, sciöch’inće por le finanziamënt di programs d’investimënt definis dala programaziun provinziala y por realisé i obietifs de ativitês sanitares spezifiches.
(5) Les cuotes finanziares, che é stabilides por les ativitês nominades tl coma 4, vëgn determinades anualmënter cun la lege finanaziara dla Provinzia.
(6) La repartiziun dla cuota anter les aziëndes sanitares vëgn stabilida anualmënter dala Junta provinziala, tignin cunt di stromënć de programaziun trienala.
(7) Le finanziamënt di distreć sanitars sozed sön la basa capitala tignin cunt di indicadus aposta individuà dala Junta provinziala por garantì ai zitadins i livì uniforms d’assistënza aladô di planns sanitars varënć, sciöch’inće dla produziun mosorada sön la basa dl sistem tarifar. Les ativitês y i proieć dla mobilité sanitara a livel interregional y internazional sozed sön la basa di tarifars determinà dala Junta provinziala.61)
(8) Por assiguré la licuidité finanziara nezesciara tratan l’eserzize, desponn la Junta provinziala vigni ann a bëgn de vigni Aziënda sanitara antizipaziuns periodiches y regolares sön la basa di debojëgns de licuidité dles aziëndes.