(1) Pro la conzesciun d’alisiramënć por frabiché dla Provinzia mëssel gnì tut en conscidraziun dantadöt:
- les condiziuns economiches dla familia y inće les condiziuns economiches dla porsona che convir te na relaziun somiënta al matrimone;
- le numer dles porsones che fej pert dla familia;
- la dorada dla residënza te un o plü comuns dla provinzia.
(2) D’atri criters de preferënza é:
- le sfrat nia por gauja de inademplimënt dles oblianzes dl contrat o de imoralité tan inant ch’al reverda n contrat d’afit tomè che à doré almanco cater agn y a condiziun che le damanant desmostres tres n zertificat dl ofize anagrafich d’avëi albü por almanco cater agn alalungia la residënza te chë abitaziun da olach’al vëgn sciuré fora;
- la revocaziun de cuartiers de sorvisc por ponsionamënt por avëi arjunt le limit d’eté anagrafica o de sorvisc, o por mort dla fomena o dl om che â chësc dërt y a condiziun che le damanant à ocupé cuartiers de sorvisc dan le ponsionamënt por almanco diesc agn;
- l’ester inćiasè te n cuartier detlarè nia da podëi abité aladô dla lege;
- l’ester inćiasè te n cuartier surafolè;
- le mëte sö na familia nöia;
- la situaziun olache le damanant o n mëmber dla familia por chël ch’al mëss ćiamò gnì fistidié é mutilé, invalid dl laûr o invalid zivil.
(3) Pro la valutaziun dles condiziuns economiches dla familia vëgnel tignì cunt dla consistënza dl patrimone imobiliar di geniturs, di joceri y di mituns, inće de chi che ne convir nia. Al ne vëgn nia tignì cunt dl patrimone di joceri sc’al mör la fomena o l’om da chël ch’al vëgn le lian d’afinité y gnanca sce la faziun iuridica dl matrimone vëgn desliada o anulada.
(4) Chi che fej domanda mëss dè dant la consistënza dl patrimone imobiliar di geniturs, di joceri y di mituns tres na detlaraziun fata aladô dl articul 4 dla lege di 4 de jenà 1968, nr. 15.
(5) Cun regolamënt d’esecuziun vëgnel stabilì le numer de punć che vëgn atribuì ai criters de preferënza aladô di comesc 1 y 2; implü vëgnel inće stabilì i criters unitars por valuté le patrimone imobiliar di geniturs, joceri y mituns por gnì lascià pro ai alisiramënć por frabiché dla Provinzia.
(6) Le numer de punć por le sfrat vëgn reconesciü sce la domanda por i alisiramënć vëgn presentada anter chisc terminns:
- tl caje ch’al vëgn convalidé la desdita deache l’afitanza é rovada, do che le contrat d’afit é tomè y te vigni caje anter n ann;
- tl caje ch’al vëgn convalidé le sfrat anter n ann dal provedimënt che convalidëia le sfrat.
(7) Te vigni caje vëgn le numer de punć por le sfrat reconesciü ćina che le damanant ocupëia inant l’abitaziun o à n’atra sistemaziun provisora.
(8) Por l’atribuziun dl numer di punć por le sfrat ne vëgn i sfrać danter parënć en ligna direta nia reconesciüs.
(9) Ales families tocades dal sfrat aladô dl coma 2, lëtra a) vëgnel parifiché l’om o la fomena cun mituns a süa ćiaria, che mëss s’un jì dal’abitaziun do s’avëi despartì. Sce do da trëi agn dala separaziun ne vëgnel nia presentè anter i sis mëisc che vëgn domanda de deslié o anulè les faziuns ziviles dl matrimone y sce dedô ne vëgnel nia metü dant la sentënza definitiva por deslié o anulè les faziuns ziviles dl matrimone, spo vëgnel revochè l’alisiramënt por frabiché, sce le numer di punć por le sfrat é stè determinant por l’amisciun al alisiramënt.