b) Lege Provinziala di 17 de dezëmber dl 1998, n. 131)
Ordinamënt sön le frabiché abitatif alisiré

(1) Por le finanziamënt dl’acuisiziun y dl’urbanisaziun de sperses por le frabiché abitatif alisiré él gnü metü sö n fonds de rotaziun. Te chësc fonds röiel i mesi odüs danfora tl program di intervënć aladô dl articul 6 por la categoria d’intervënt aladô dl articul 2, coma 1, lëtra H), ći che röia ite dai imprësć conzedüs da chësc fonds sciöche inće ći che röia ite dai imprësć dal fonds de rotaziun preodüs tl articul 32 dla lege provinziala di 20 d’agost 1972, nr. 15, y mudaziuns suandëntes, che valô denant.

(2) Sön la basa dl decret de determinaziun dl’indenisaziun d’espropriaziun nominada tl articul 5 dla lege provinziala di 15 d’aurì 1991, nr. 10, desponn l’assessur provinzial por le frabiché abitatif la conzesciun de n contribut de n iade a bëgn dl comun tla mosöra dl 50 porcënt dl’indenisaziun d’espropriaziun y la conzesciun de n imprëst zënza fić por l’ater 50 porcënt. Sce les sperses por le frabiché abitatif alisiré vëgn espropriades diretamënter a bëgn dl IPFS, aladô dl articul 80, coma 3, vëgn le contribut de n iade conzedü por döta la soma dl’indenisaziun d’espropriaziun.133)

(3) Sce la Curt d’apel stabilësc te sües sentënzes indenisaziuns d’espropriaziun maius desponn l’assessur por le frabiché abitatif de integrè l’imprëst y le contribut de n iade cun la soma corespognënta.134)

(4) Tl caje d’espropropriaziun de sperses por le frabiché abitatif alisiré aladô dl articul 16 dla lege provinziala di 15 d’aurì, 1991, nr. 10, desponn l’assessur provinzial por le frabiché abitatif sön la basa dla deliberaziun en forza cun chëra che le comun delibrëia de cumprè sperses cun la prozedöra nominada tl articul 16, la conzesciun de n contribut de capital tla mosöra dl 50 porcënt dl’indenisaziun d’espropriaziun y la conzesciun de n imprëst zënza fić por l’ater 50 porcënt.

(5) Les desposiziuns aladô di comesc 2, 3 y 4 vëgn inće aplicades tl caje ch’al vëgn esproprié terac da frabiché, aladô dl articul 81.

(6) Sce por acuisì sperses por le frabiché abitatif alisiré mëssel gnì paié la cuta sön le valur ajuntè vëgn les somes dades dant ti comesc 2, 3, 4 y 5 aumentades dla soma corespognënta.

(7) I comuns o sü consorc assegnëia les sperses acuisides aladô dles desposiziuns de chësta lege meton a ćiaria dla porsona che ciafa l’assegnaziun na soma totala che corespogn al imprëst tut sö por cumprè les sperses.

(8) L’acuirënt mëss paié la soma corespognënta tl momënt dla zesciun y le comun mëss dè derevers la soma al fonds de rotaziun tl tëmp de 90 dis da canche la soma é gnüda incassada. Le somes incassades de iade en iade dala Provinzia röia indô tl fonds de rotaziun por les adorè inant.

(9) Por l’urbanisaziun primara dles sperses por le frabiché abitatif alisiré sciöche inće por i atri laûrs che va debojëgn por tachè ite les sperses instësses ala rëi de sorvisc publics vëgnel conzedü n contribut de n iade dl 60 porcënt dl costimënt aprovè di laûrs proietà. Le contribut de n iade vëgn integrè sön la basa dl decunt final ćina a arjunje le 60 porcënt dla spëisa sostignida efetivamënter dal comun a condiziun che le decunt final vëgnes metü dant anter trëi agn dala data dla conzesciun dl contribut.135)

(10) Adöm ala conzesciun dl contribut de n iade por l’urbanisaziun primara ti vëgnel conzedü ai comuns n contribut de n iade por l’urbanisaziun secundara tla mosöra dl 60 porcënt dl contribut che sön la basa dl regolamënt comunal sön le scudimënt di contribuć d’urbanisaziun é a ćiaria dles sperses por le frabiché abitatif alisiré.136)

(11) A ćiaria dl fonds de rotaziun aladô dl coma 1 ti dà l’assessur provinzial por le frabiché abitatif imprësć zënza fić por cumprè terac nia frabicà o terac frabicà da recuperè ai comuns o a sozietês y ënć zënza fins de davagn. Sce chisc terac é ti zëntri edificà preodüs dal articul 12 dla lege provinziala di 15 d’aurì dl 1991, n. 10, ési destinà al frabiché abitatif alisiré inće desvian da ći che é preodü dal articul 36, coma 3, y dal articul 37 dla lege provinziala di 11 d’agost dl 1997, n. 13, y mudaziuns suandëntes, tres mudaziun dl plann urbanistich comunal o, sce al é n plann de atuaziun, tres mudaziun dl plann de atuaziun. I terac insciö destinà vëgn conscidrà a düć i efeć dla lege provinziala di 11 d’agost dl 1997, n. 13, y mudaziuns suandëntes y de chësta lege, terac destinà al frabiché abitatif alisiré. Do che le plann urbanistich comunal o le plann de atuaziun é gnü mudé, vëgn na pert dl imprëst trasformada te n contribut de n iade. Por i terac edificà da recuperè ne po le imprëst de n iade nia ester majer co le 50 por cënt dl cost de costruziun dla cubatöra amissibla sön le terac; i criters por la conzesciun dl contribut nominé dessura vëgn stabilis cun deliberaziun dla Junta provinziala. Ales sozietês y ai ënć zënza fins de davagn ti vëgnel conzedü n imprëst zënza fić dal fonds de rotaziun preodü dal coma 1 por cumprè terac nia edificà adatà al’edificaziun aladô dl articul 90. Le imprëst ti mëss gnì retü al fonds de rotaziun tl tëmp de 90 dis dal’assegnaziun dl terac a chi che à le dërt al assegnaziun y a vigni moda te trëi agn da süa conzesciun. Sce le comun é bele le patrun di terac edificà o à bele acuisì i terac cun mesi desvalis da chi preodüs da chësc articul, ti vëgnel conzedü al comun n contribut de n iade dl 20 por cënt dl cost de costruziun dla cubatöra amissibla sön le terac, do che le plann urbanistich comunal o le plann de atuaziun cun chël che le terac vëgn destiné al frabiché abitatif alisiré é gnü mudé y aladô dla deliberaziun de assegnaziun.137)

(12) A ćiaria dl fonds de rotaziun aladô dl coma 1, ti conzed l’assessur provinzial por le frabiché abitatif al IPFS n contribut por cumprè sperses che é adatades por gnì adorades sciöche grunt da frabiché do ch’al é gnü mudé la destinaziun urbanistica y che va debojëgn por realisé i programs de costruziun aprovà. Denant co cumprè la spersa mëss l’IPFS damanè l’arat dl comun competënt te chël raiun y dla Comisciun urbanistica dla Provinzia. I arać liënć dl comun y dla Comisciun urbanistica dla Provinzia por ći che reverda l’idoneité dla spersa sciöche terac da frabiché mëss gnì dà jö anter 90 dis. Sce chësc terminn toma zënza che le comun o la Comisciun urbanistica dla Provinzia à dè jö so arat, vëgn l’arat aratè sciöche positif. Do ch’al é gnü stlüt jö le contrat de cumpra aprovëia la Junta provinziala sön domanda dl IPFS la mudaziun dl plann urbanistich comunal te na manira definitiva.

(13) L’assessur provinzial por le frabiché abitatif ti conzed ai comuns imprësć zënza fić, a ćiaria dl fonds de rotaziun preodü tl coma 1, por cumprè sperses che po gnì adorades sciöche grunt da frabiché. Denanche cumprè le grunt mëss le comun damanè do l’arat liënt dla Comisciun por la natöra, la contrada y le svilup dl teritore. L’arat dla Comisciun por la natöra, la contrada y le svilup dl teritore sön l’adatamënt dl grunt sciöche grunt da frabiché mëss gnì dè jö te 90 dis da canch’al é gnü fat domanda. Sce chësc terminn toma zënza che la Comisciun por la natöra, la contrada y le svilup dl teritore ais lascè alsavëi valch, vëgn l’arat conscidré positif. Do ch’al é gnü aprovè le plann d’atuaziun por les sperses che tl plann d’atuaziun é destinades al frabiché abitatif alisiré y ai laûrs d’urbanisaziun primara che alda laprò, vëgn le 50 porcënt dl imprëst zënza fić trasformè te n contribut de n iade. 138)

(14) I imprësć conzedüs ai comuns ti mëss gnì dà derevers al fonds de rotaziun te cater agn da süa conzesciun, inće sce les sperses n’é nia ćiamò gnüdes zedüdes en proprieté. Sce i imprësć ne vëgn nia dà derevers te chësc tëmp, vëgn les somes corespognëntes trates jö, pro la proscima tomanza, dales somes che ti speta ai comuns aladô dl articul 5 dla lege provinziala di 14 de forà 1992, nr. 6. Les somes trates ite insciö röia tl fonds de rotaziun por gnì adorades te n ater vers. Sön domanda motivada dl comun po le terminn por la restituziun di imprësć gnì proroghè de n ann. 139)

(15) I imprësć conzedüs aladô di comesc 12 y 13 ne stlüj nia fora la poscibilité che sön le plann d’atuaziun che é da arjigné aladô dl articul 37 dla lege provinziala di 11 d’agost 1997, nr. 13 pol gnì preodü aladô dl coma 3 dl articul 37 nominé dessura, de resservè cubatöres por aziëndes de sorvisc y de comerz al detai sciöche inće por implanć d’urbanisaziun secundara de chi che le raiun à debojëgn.140)