(1) La Junta provinziala dà dant i obietifs fondamentai dl'aministraziun provinziala y emanëia les diretives generales por i arjunje y por controlè sü resultać.
(2) Le Presidënt dla Junta provinziala y i assessurs provinziai à la responsabilité politica dl'ativité aministrativa te sü ćiamps de competënza; ai arjigna ca i programs de ativité y stabilësc les prioritês che vëgn realisades dales strotöres aministratives, do che ares é gnüdes aprovades dala Junta provinziala.
(3) La Junta provinziala, le Presidënt dla Junta provinziala y i assessurs provinziai eserzitëia les funziuns aministratives che ti é gnüdes surandades dala lege.
(4) Tan inant che al ne vëgn nia preodü val’ d’ater tles leges de setur, à la Junta provinziala dantadöt la competënza de:
- surandè y revochè les inćiaries dirigenziales;
- autorisé da stlü jö contrać de n import aratè anfat o majer co le limo comunitar di apalć publics, do avëi trat jö la cuta sön le valur ajuntè (C.V.A.), tl respet dles modalitês prozedurales stabilides tl regolamënt d’esecuziun preodü dal articul 6, coma 22 dla lege provinziala di 22 d’otober dl 1993, n. 17, y mudaziuns suandëntes;
- autorisé da daurì stritoc, da se lascè ite te stritoc orüs da terzi, sciöche inće da i regolè tres n’acordanza;
- aprovè les condiziuns generales di contrać y di codejì dles condiziuns por conzede les conzesciuns provinziales;
- determiné les tarifes, i fić, les cuotes, i assëgns, les indenitês y i compënsc;
- aprovè i statuć, i bilanc de previjiun y i cunć consuntifs di ënć stromentai dla Provinzia;
- nominé o designé i rapresentanć dla Provinzia te d’atri ënć;
- conzede contribuć, sovenziuns y previdënzes analoghes. 3)
(5) Tl respet dles prozedöres preodüdes dales leges speziales, se crüzia le componënt dla Junta competënt en materia de stlü jö i contrać autorisà dala Junta provinziala. 4)
(6) La Junta provinziala, le Presidënt dla Junta provinziala y i assessurs provinziai po ti surandè sües competënzes ai organns subordinà. Na te’ surandada ne n’é nia ametüda por les competënzes preodüdes dal articul 54, coma 1, zifres 1), 2) y 7), sciöche inće dal articul 98 dl Statut spezial de autonomia por la Regiun Trentin-Südtirol. I provedimënć che alda laprò vëgn publicà tl Boletin Ofizial dla Regiun. I ać aministratifs adotà tres surandada dla Junta provinziala é definitifs. 5)
(7) Te caji ezezionai po le Presidënt dla Junta provinziala y i assessurs surantó, cun at motivé, l'adoziun de provedimënć de competënza di dirigënć, te sü ćiamps de competënza.
(8) La Junta provinziala po anulè d'ofize cun at motivé i provedimënć emanà da dirigënć, te 30 dis dal'emanaziun, porvia de rajuns de legitimité, o i revochè o mudé por rajuns de utilité.
Le coma 4 é gnü sostituì dal art. 4, coma 1, dla l.p. di 10 d’agost dl 1995, n. 16, y daldô mudé dal art. 35 dla l.p. di 28 de messè dl 2003, n. 12, y dal art. 1, coma 1, dla l.p. di 20 de jügn dl 2005, n. 3.
Le coma 5 é gnü sostituì dal art. 1, coma 2, dla l.p. di 20 de jügn dl 2005, n. 3.
L'art. 2, coma 6, é gnü mudé insciö dal art. 5, coma 1, dla l.p. di 17 de jenà dl 2011, n. 1.