(1) Ćina de messè de vigni ann ti fej i ënć de gestiun di sorvisc soziai avëi ala Repartiziun provinziala Sorvisc sozial i programs d’ativité y de spëisa por l’ann che vëgn sön n model aposta aprovè dala Junta provinziala. Ćina de merz de vigni ann presentëia i ënć de gestiun la lista dles spëises che reverda l’ann da denant cun l’indicaziun dl suraplü aministratif eventual, y plü avisa sön la basa de modì de relevamënt aprovà dala Junta provinziala. 51)
(2) Por ti garantì ai ënć de gestiun di sorvisc soziai bele da mëteman dl eserzize finanziar na desponibilité aprontada de mesi finanziars, é la Junta provinziala autorisada da lié tl eserzize dan da chël de referimënt i cosć por la conzesciun de antizipaziuns anfat al 45 porcënt di mesi finanziars assegnà tl ann finanziar corënt. L’assegnaziun di mesi finanziars da pert dla Provinzia vëgn a s’al dè aladô dles prozedöres odüdes danfora tla lege provinziala di 14 de forà dl 1992, n. 6, y mudaziuns y integraziuns suandëntes. 51)
(3)52)
(4) I mesi finanziars assegnà vëgn adorà por curì les spëises determinades dala Junta provinziala. Chisc finanziamënć vëgn scrić ite ti bilanc de previjiun di ënć de gestiun te capitui de entrada y sortida aposta. Ćina che al vëgn a s’al dè l’assegnaziun definitiva, vëgn i mesi finanziars por les spëises corëntes scrić ite tl bilanz de previjiun tla mosöra de alplü 100 porcënt di mesi finanziars assegnà tl eserzize finanziar da denant. 51)
(5) Les somes assegnades vëgn trasferides sön le bilanz dl ann che vëgn do y calcolades dala Junta provinziala canche al vëgn partì sö i fonds por l’eserzize corespognënt, sce ares ne vëgn nia adorades dai ënć de gestiun por le fin preodü.
(6) I comuns o i consorc di comuns che gestësc sorvisc soziai injunta al cunt consuntif na relaziun por ći che reverda i resultać arjunć, sciöche inće l’indicaziun tl detai dles spëises albüdes.