e) Lege Provinziala di 30 de jügn dl 1983, n. 201)
Mosöres nöies a bëgn dles porsones cun handicap
1

(1) Le fin dl'integraziun scolastica é le svilup dles potenzialitês dla porsona cun handicap tla comunicaziun, tles relaziuns, tla sozialisaziun y tl aprendimënt.

(2) L'eserzize dl dërt d'educaziun y d'istruziun ne po nia gnì manco por dificoltês d'aprendimënt o d'atres dificoltês che vëgn dal handicap.

(3) Chisc é i fins dl'integraziun scolastica:

1. garantì le dërt d'educaziun y d'istruziun dla porsona cun handicap tles seziuns dla scolina, tles tlasses normales dles scores de vigni sort y degré y tles universitês;
   
2. garantì la priorité di intervënć y di programs te chi caji olache un n handicap o de plü handicap à influenzè l'autonomia personala, inće en relaziun al'eté, a na te' moda che al va debojëgn tresfora y te na manira completa da ti dè assistënza ala porsona cun handicap por ći che reverda sü bojëgns individuai y chi relazionai y porchël é so handicap da aratè gravënt;
   
3. ti garantì ales mitans/ai mituns de mëndra eté cun handicap o che à na maratia cronica, che ne po por inant nia jì a scora por rajuns de sanité, da podëi fà le program scolastich individualisé inće a ćiasa, en acordanza cun i geniturs y le sorvisc medich-psicologich;
   
4. garantì n ajornamënt miré de döt le personal scolastich tl ćiamp dl'integraziun scolastica y n ajornamënt spezifich por insegnantes/insegnanć de integraziun y por le personal por l'assistënza y l'educaziun;
   
5. coordiné la programaziun di sorvisc scolastics cun chi sanitars, sozio-assistenziai, culturai, recreatifs, sportifs y cun d'atres ativitês sön le teritore gestides da ënć publics y privać.
   

(4) Cun deliberaziun dla Junta provinziala vëgnel stabilì les prozedöres, i criters y les modalitês por determiné le handicap, por fà la diagnosa funzionala y por elaborè le profil dinamich funzional por podëi spo mëte jö le plann educatif individual. 42)