e) Lege Provinziala di 30 de jügn dl 1983, n. 201)
Mosöres nöies a bëgn dles porsones cun handicap
1

(1) Le coordinamënt dles ativitês y di sorvisc preodüs da chësta lege che vëgn gestis diretamënter dala Provinzia o da assoziaziuns y ënć convenzionà cun i sorvisc dles unitês sanitares locales y dles strotöres d'assistënza scolastica, de formaziun profescionala, de assistënza soziala y de assistënza de basa, vëgn metü a jì dala Junta provinziala che po emanè desposiziuns por i organns y i ofizi competënć.

(2) La Junta provinziala é competënta por:

1. aprovè i programs trienai y anuai preodüs dal art. 5, coma 1, lëtra a) y dal coma 3, lëtra a) de chësc articul;
   
2. aprovè les cuotes al dé y le contribut de spëises a ćiaria di utënć;
   
3. aprovè les modalitês d'amisciun dles porsones cun handicap ai sorvisc;
   
4. aprovè i programs d'ajornamënt y de recualificaziun dl personal dependënt;
   
5. laurè fora i criters y les modalitês por le conferimënt dles inćiaries y suplënzes preodüdes da chësta lege.
   

(3) Te sü ćiamps de competënza à les assessuries y i assessurs dla Provinzia chëstes inćiaries:

1. l'autorisaziun liada a laûrs de costruziun, cumpres, fornidöres y prestaziuns che reverda la gestiun dles ativitês y di sorvisc provinziai, preodüs da chësta lege, tl cheder di programs de mascima y di stanziamënć che alda laprò aprovà dala Junta provinziala;
   
2. le control sön l'atuaziun di programs d'ativité;
   
3. l'aprovaziun di regolamënć interns di zëntri soziai;
   
4. l'elaboraziun di criters por la partezipaziun ai cosć da pert dles porsones che adora i sorvisc desvalis.
   

(4) I contrać che reverda i intervënć nominà tl coma 3, lëtra a) vëgn stlüć jö dala direturia/dal diretur dla repartiziun VIII, sce ara se trata de na spëisa o n'entrada de plü co 500 miliuns de lires, o dala direturia/dal diretur dl Ofize Afars aministratifs preodü dal art. 23, sce ara se trata de na spëisa o de n'entrada ćina 500 miliuns de lires. I contrać vëgn aprovà dal'assessuria competënta/dal assessur competënt che se crüzia dla constataziun dl'entrada o dla destinaziun dla soma corespognënta.