(1) La Junta provinziala istituësc aladô dles indicaziuns dl program zëntri soziai por porsones cun handicap te de plü posć dl Südtirol; ara se trata de salfs protezionà, convić, comunitês abitatives, d'atres formes d'abitaziun protezionada y d'atri sorvisc eventuai adatà y inće strotöres d'educaziun, de formaziun y de laûr davertes sciöche inće strotöres por l'assistënza soziala y le tëmp lëde.
(2) Les strotöres di zëntri soziai mëss garantì la miù integraziun poscibla tla sozieté y ester davertes ala coletivité; dal punt d'odüda dla lerch mësseres porchël de preferënza gnì partides sö a na moda che les strotöres abitatives sides odüdes danfora ti raiuns abitatifs o ti raiuns destinà a strotöres publiches, les strotöres de laûr y d'ocupaziun tles zones artejanales y industriales o inće ti raiuns destinà a strotöres publiches. Pro les strotöres di sorvisc soziai él da tignì cunt dl'eté dles porsones cun handicap. Les Unitês Sanitares Locales mëss ti garantì ai zëntri soziai l'assistënza sanitara che va debojëgn cun laprò inće chëra dl dotur dai dënz. Les modalitês por realisé les prestaziuns corespognëntes vëgn regolamentades, sce al é debojëgn, cun convenziuns aposta.
(3)12)
(4) Por ti dè la poscibilité ai zëntri soziai da colaborè y se baratè fora informaziuns y esperiënzes cun d'atri organns de chësta sort por promöie n svilup di sorvisc y dles metodes d'assistënza, po la Junta provinziala autorisé i zëntri o les singoles strotöres da tó pert a assoziaziuns interregionales o da foradecà, tl respet dles competënzes statales. Les cuotes d'assoziaziun é a ćiaria dl bilanz provinzial. 12)
