b) Lege Provinziala di 17 de dezëmber dl 1998, n. 131)
Ordinamënt sön le frabiché abitatif alisiré

(1) L’assegnaziun dl’abitaziun vëgn anulada cun decret dl Presidënt dl IPFS, do avëi aldì la Comisciun por l’assegnaziun, te chisc caji:

1. sce denant co ti surandè l’abitaziun vëgnel constatè che ala porsona che à ciafè en assegnaziun le cuartier ti mànćel öna dles condiziuns scrites dant dal articul 97 o öna dles condiziuns che à portè pro ch’al gniss metü sön la gradatöra; te n te’ caje sospënn le Presidënt dl IPFS la surandada dl’abitaziun;170)
2. sce, do ch’al ti é gnü surandè l’abitaziun, vëgnel constatè che l’assegnaziun dl’abitaziun é gnüda arjunta en contradiziun cun les desposiziuns che valô tl momënt dl’assegnaziun.

(2) Por chësc fin vëgn la porsona a chëra ch’al ti é gnü assegné l’abitaziun avisada tres lëtra racomanada dla situaziun di fać che po iustifiché le provedimënt y al ti vëgn dè n terminn nia sot ai 15 dis y nia sura ai 30 dis por dè jö detlaraziuns decuntra scrites y documënć.

(3) L’anulamënt dl’assegnaziun à sciöche conseguënza la ressoluziun de dërt dl contrat d’afit.

(4) Anter le terminn pretlusif de 30 dis dala notificaziun dl provedimënt d’anulamënt po la porsona interessada fà recurs cuntra le provedimënt d’anulamënt pro l’autorité iudiziara competënta por le raiun olach’al é l’abitaziun, aladô dles normes statales varëntes.