(1) Por la validité dl ann de scora val debojëgn por la valutaziun dles scolares y di scolars dla frecuënza de almanco trëi cherć dl orar anual personalisé, che tol ite les ativitês y les materies dl orar d’insegnamënt obligatore y dla cuota facoltativa opzionala. Te caji ezezionai po les scores desvié autonomamënter dal limo suradit por rajuns motivades.
(2) La valutaziun di resultać dl imparè y dl comportamënt dles scolares y di scolars y la zertificaziun dles competënzes arjuntes vëgn fates deboriada dai comëmbri dl consëi de tlassa, tl respet di criters generai definis dala Junta provinziala. Sön la basa di resultać dla valutaziun periodica, definësc les scores i intervënć pedagogics y didatics che ares arata debojëgn por recuperè i aprendimënć romagnüs indô y svilupé i resultać dl imparè. Le personal insegnant dla cuota resservada ales scores y dla cuota facoltativa opzionala eventuala tol pert ala valutaziun dles scolares y di scolars aladô dles modalitês y di criters definis dal collegium insegnant aladô dl articul 6 dla lege provinziala di 29 de jügn dl 2000, n. 12.
(3) Les dezijiuns sön l’amisciun ala tlassa suandënta o ala perioda didatica suandënta, sciöche inće al ejam de stat, vëgn tutes tignin cunt di prinzips dles desposiziuns varëntes te chësc ćiamp y di criters determinà dala Junta provinziala.
(4) Les proes dl ejam de stat vëgn arjignades ca y realisades sön la basa di obietifs d’aprendimënt spezifics dl pröm scalin d’istruziun y dles materies d’insegnamënt dla terza tlassa dla scora mesana, aladô dl articul 11 dl decret dl Presidënt dla Republica di 10 de forà dl 1983, n. 89, y mudaziuns suandëntes.
(5) Ala secunda y ala terza tlassa pon inće gnì ametüs tres l’ejam d’idoneité; a chësc ejam po tó pert les candidates privatistes y i candidać privatisć che à complì o complësc - ćina ai 30 d’aurì dl ann de scora de referimënt - i önesc respetivamënter i dodesc agn, y che à le titul d’amisciun por la pröma tlassa dla scora mesana, sciöche inće les candidates y i candidać che à le titul nominé dessura da almanco un n ann respetivamënter dui agn.
(6) Al ejam de stat po inće tó pert les candidates privatistes y i candidać privatisć che à complì - ćina ai 30 d’aurì dl ann de scora de referimënt - i trëdesc agn y che à le titul d’amisciun ala pröma tlassa dla scora mesana. Al po inće tó pert i candidać y les candidates che à le titul nominé dessura da almanco trëi agn, sciöche inće les candidates y i candidać che complësc ia por l’ann 19 agn.