b) Lege provinziala di 30 de jenà dl 2006, n. 11)
Desposiziuns sön i implanć da föm y i impedimënć por l’aviaziun

(1) L’ofize provinzial competënt por les furnadoies tol provedimënć provisori por limité les condiziuns d’adoranza de n elemënt de segurëza o de n sotsistem o por proibì na süa adoranza sc’al constatëia che n elemënt de segurëza, inće sc’al à l’amersciadöra de conformité “CE” y al vëgn metü sön le marćé y adorè aladô de süa destinaziun, o che n sotsistem cun la detlaraziun de conformité “CE” preodüda dal articul 51 y che vëgn adorè aladô de süa destinaziun, mët al prigo la sanité y la segurëza dles porsones y la segurëza di bëgns.

(2) L’ofize provinzial competënt por les furnadoies ti lascia belatira alsavëi al Ministêr por les infrastrotöres y i trasporć i provedimënć tuć aladô dl coma 1, dan dant da ći che la manćianza de conformité vëgn:

1. dala manćianza de ademplimënt dles condiziuns fondamentales preodüdes dala injunta II;
2. da n’aplicaziun nia coreta dles spezificaziuns europeiches, sc’al vëgn pretenü l’aplicaziun de chëstes:
3. da na loćia dles spezificaziuns europeiches.

(3) L’ofize provinzial competënt por les furnadoies tol ti caji preodüs dal coma 1 i provedimënć definitifs aladô di resultać comunicà dala Comisciun europeica do l’ejaminaziun di caji y les consultaziuns comunitares.

(4) Sce n elemënt de segurëza cun l’amersciadöra de conformité “CE” o n sotsistem cun la detlaraziun de conformité “CE” ne resultëia nia conform spo informëia l’ofize provinzial competënt por les furnadoies belatira le Ministêr por les infrastrotöres y i trasporć.