b) Lege provinziala di 30 de jenà dl 2006, n. 11)
Desposiziuns sön i implanć da föm y i impedimënć por l’aviaziun

(1) Aladô de chësta seziun vel chëstes definiziuns:

1. implant da föm: le sistem complet istalè te so post de destinaziun, metü adöm dala infrastrotöra y dai sotsistems dà dant tla injunta I;
2. infrastrotöra: ara vëgn proietada aposta por vigni implant y vëgn realisada sön le post. Ara é metüda adöm dala condüta dla trassa, dai dać dl sistem, sciöche inće dales costruziuns dla ligna y dales staziuns che va debojëgn por la costruziun y le funzionamënt dl implant, tolon ite inće les fondamëntes;
3. elemënt de segurëza: vigni elemënt elementar, grup de elemënć, sotgrups o grups intiers de material sciöche inće vigni istalaziun, incorporada tl implant por garantì la segurëza y individuada dal’analisa de segurëza, olache na manćianza o na funziun falada metess al prigo la segurëza o la sanité de porsones, passajiers, personal operatif o porsones terzes;
4. comitënt o comitënta dl implant o so rapresentant/süa rapresentanta: é vigni porsona fisica o iuridica o so mandatar/süa mandatara che sta tla Uniun europeica che sön la basa de n titul adatè dà la inćiaria por la realisaziun dl implant;
5. condiziuns tecniches por l’eserzize: al é la totalité dles desposiziuns y mosöres tecniches che à na faziun sön la proietaziun y sön la realisaziun y che va debojëgn por la segurëza dl eserzize;
6. condiziuns relatives ala manutenziun tecnica: é la totalité dles desposiziuns y mosöres tecniches che à na faziun sön la proietaziun y sön la realisaziun y che va debojëgn por la manutenziun por garantì la segurëza dl eserzize;
7. spezificaziun europeica: é na spezificaziun tecnica anfat por düć, na omologaziun tecnica europeica o na desposiziun nazionala tres chëra ch’al se concretisëia na norma europeica;
8. firma de fabricaziun o so rapresentant/süa rapresentanta: é n frabicant o na frabicanta de elemënć de segurëza o de sotsistems por la realisaziun de implanć da föm por le trasport de porsones o n so mandatar/na süa mandatara che sta tla Uniun europeica.