(1) Tla Repartiziun Sanité él la comisciun d’apajamënt te chestiuns de responsabilité medica.
(2) La comisciun d’apajamënt é competënta te düć i caji olache n paziënt é dla minunga che süa sanité sides gnüda rovinada da n fal tla diagnosa o tla terapia. La comisciun d’apajamënt é danter l’ater competënta te düć i caji olach’an mina che le dann dla sanité sides na conseguënza de na conseguënza nia dada o falada.
(3) La comisciun d’apajamënt é n organn independënt. Ara vëgn nominada dala Junta provinziala por la dorada de trëi agn y ara é metüda adöm da:
- n iudicadù, inće en ponsiun, cun funziuns de presidënt, chirì fora de na proposta de trëi fata dal Presidënt dl Tribunal de Balsan;
- n mede de medejina legala scrit ite tla lista di consulënć tecnics de medejina legala tl tribunal, chirì fora de na proposta da trëi fata dal Ordinn di medi chirurgics y di medi di dënz de Balsan;
- n iurist cun conescënzes tl ćiamp dla responsabilité dl mede, nominé fora de na proposta de trëi fata dal Ordinn di avocać de Balsan.
(4) La Junta provinziala nominëia por vigni componënt dla comisciun, por le caje d’assënza o d’impedimënt, n componënt suplënt, chirì fora da na proposta de trëi fata dal Presidënt dl Tribunal de Balsan, dal Ordinn di medi chirurgics y di medi di dënz de Balsan sciöch’inće dal Ordinn di avocać de Balsan.
(5) Canche le mandat toma, po i componënć dla comisciun gnì reconfermà, sc’ai vëgn indô proponüs aladô dl coma 3.
(6) La comisciun d’apajamënt po te caji particolarmënter complicà ghiré l’arat de n consulënt tecnich da foradecà, cun preferënza danter i scrić ite tla lista di consulënć tecnics medicai legai.
(7) La Provinzia, i comprensori sanitars sciöch’inće dötes les aziëndes y i ënć sot ala provinzia, é cherdà a colaurè, sön domanda, cun la comisciun d’apajada.
(8) La comisciun d’apajamënt formulëia cun dötes les usc a öna y por iscrit süa proposta d’apajamënt y la proponn ai partis sciöche contignü de na transaziun nia iudiziara.
(9) Cun les desposiziuns d’esecuziun vëgnel regolè l’atra pert dl’organisaziun dla comisciun d’apajamënt, le prozedimënt denanche rové tla comisciun d’apajamënt sciöch’inće l’indenisaziun dles spëises che ti speta ai componënć dla comisciun y ai consulënć tecnics da foradecà.4)