(1) L´om o la fomena che ne surantol nia le lüch à le dërt a n mantignimënt adeguè por döta la vita che al/ara vir aladô dles condiziuns de vita locales y dla capazité produtiva dl mêsc stlüt. Chësc dërt ne ti speta nia sce l´om o la fomena é bun/bona da se mantignì cun so davagn y avëi. Les rajuns d´acomodamënt bele paiades fora al om o ala fomena che â le dërt da les ciafè tl cheder dl´assunziun vëgn conscidrades te chësta ocajiun sciöche so avëi.
(2) Le dërt d´abitaziun y d´adoranza dl aredamënt dla ćiasa d´abitaziun che l´om o la fomena dla defunta o dl defunt à aladô dl articul 540, coma 2 dl codesc zivil vëgn eserzité tignin cunt de na conduziun adatada dl lüch y dles esigënzes dla familia dla porsona che à surantut le lüch.
(3) Sce al ne vëgn nia arjunt n´acordanza inanter les perts, stabilësc le vicare o la vicara sön ći locai y mebli dla ćiasa d´abitaziun che al po gnì eserzité le dërt d´abitaziun y chël d´adoranza.
(4) Sce al esist rajuns sceries po le vicare o la vicara sön domanda dles perts interessades adeguè te vigni momënt le mantignimënt ales condiziuns de vita dl lüch che s´é mudades. Sciöche rajuns sceries vel sides le peioramënt dles condiziuns economiches dla porsona che à surantut le lüch che l´aumënt di bojëgns dl om o dla fomena dla defunta o dl defunt por motifs nia gaujà da colpa, sciöche inće l´imposcibilité dl om o dla fomena dla defunta o dl defunt de vire inant sön le lüch a gauja de dejuniuns. Le vicare o la vicara po inće modifiché les desposiziuns sön l´oget dl dërt d´abitaziun sce tres intervënć de costruziun vëgnel cherié d´atres poscibilitês d´abitaziun adeguades sön le lüch.
(5) Sce le lüch vëgn surandè tres n at inanter vis o a gauja de mort po i dovëis da pert dla porsona che surantol le lüch por ći che reverda le mantignimënt sön le lüch dla porsona che ti l´à lascè y de so om o de süa fomena gnì garantì scrion ite l´inćiaria al mategnimënt tl liber fondiar.
