(1) Sot a venüdes straordinares capëscion la svenüda, la svenüda a fin de sajun y la venüda de retlam olache le comerziant al menü pîta veramënter de bones condiziuns por cumprè sü produć.
(2) Sot a svenüdes capëscion chës formes de venüda al publich de döta o de gran pert dla marćianzia che é te botëga o tl magazinn respetif, che vëgn presentades sciöche ocajiuns de gran vantaje y che se desfarenziëia dales venüdes normales te d’atres botëghes. Les svenüdes vëgn metüdes a jì ma dal titolar dl'autorisaziun de comerz al menü o tl caje de pices strotöres de venüda dal titolar dl'eserzize. Chi che ô mëte a jì na svenüda mëss le comuniché al comun.
(3) Sot a svenüdes a fin de sajun capëscion chës formes de venüda intratan chëres che al vëgn venü ma produć de sajun o de moda, a vigni moda produć che podess subì na gran svalutaziun sce ai ne gniss nia venüs intratan la sajun o anter cört tëmp. Les svenüdes a fin de sajun po ma gnì metüdes a jì te döes periodes dl ann. Chëstes vëgn determinades dala Ćiamena dl comerz aladô dl setur de marćianzia y dla zona. Les organisaziuns profescionales po fà recurs cuntra i provedimënć dla Ćiamena dl comerz ala Junta provinziala, che tol na dezijiun cun provedimënt definitif anter 30 dis dala recioiüda dl recurs.
(4) Por venüdes de retlam capëscion chës formes de venüda particolares che ne döra nia plü dî de döes edemes, cun prisc plü basc de chi adorà zënza y che reverda n numer limité de produć de marćianzia. L’aziënda comerziala programëia cun chisc produć de mëte sön le marćé n produt nü o na marca nöia, o de alzè so volum d’afars indespran l'interès dla tlientela tres la proposta de racomanaziuns de cumpra particolares, sciöche produć cun le prisc arbassè, a na manira che al vëgnes cumprè d’atri produć analogs, de confeziuns cun scincundes y de medemo. L'aziënda comerziala che ô mëte a jì na venüda de retlam mëss le comuniché almanco diesc dis denant al comun.
(5) Por les venüdes regolamentades da chësc articul mëss le sconto o la reduziun dl prisc gnì dà dant te na prozentuala sön le prisc de venüda normal che mëss inće gnì metü fora.
(6) Por venüda sot al prisc capëscion la venüda al publich de un o de plü produć a n prisc plü bas de chël che resultëia dales fatures de cumpra, plü la cuta sön le valur ajuntè y vigni atra cuta o tassa liada al produt, y manco i sconti eventuai o i contribuć che é da condüje zoruch al produt instës sce chësc vëgn documentè. La venüda sot le prisc vëgn ma consintida tl caje de venüdes straordinares. La Junta provinziala stabilësc cun deliberaziun le patüc da mangé che ne po nia gnì venü sot le prisc. 13)
(7) Döt ći che ne vëgn nia preodü esplizitamënter te chësc articul vëgn regolamentè dal regolamënt d’esecuziun.