c) Lege provinziala di 27 d’aurì 1995, n. 91)2) —
Istituziun dl register anagrafich provinzial dl bestiam y dles aziëndes de zidlamënt y desposiziuns de prescia tl setur dl’agricoltöra

(1) Le Sorvisc veterinar dla Provinzia vëgn determiné tla Repartiziun Agricoltöra aladô dles normes provinziales sön la strotöra dirigenziala.

(2) Le diretur dl Sorvisc veterinar dla Provinzia eserzitëia les funziuns aministratives che é, aladô dles desposiziuns dla Provinzia sön la strotöra dirigenziala, de competënza dl diretur de repartiziun, tut fora chëres sön le personal y chëres che ti vëgn espressivamënter atribuides a d’atri organns.

(3) Por l’eserzize dl sorvisc veterinar dla Provinzia vëgnel metü a desposiziun dla Provinzia doturs di tiers dl Sorvisc sanitar dla Provinzia aladô dles modalitês da stabilì cun deliberaziun dla Junta provinziala. Chësc personal vëgn colochè fora dl organich por la dorada dla metüda a desposiziun. Le paiamënt che ti speta vëgn antizipé dal Sorvisc sanitar dla Provinzia y rembursè vigni ann dala Provinzia.

(4) La nominaziun dl diretur dl Sorvisc veterinar dla Provinzia vëgn fata cun deliberaziun dla Junta provinziala sön proposta dl comëmber de Junta che presidiëia chësc sorvisc. La nominaziun é a tëmp determiné aladô dles normes sön la strotöra dirigenziala dla Provinzia. La cerna vëgn fata aladô dles modalitês che mëss gnì stabilides cun deliberaziun dla Junta provinziala.

(5) La inćiaria de diretur dl Sorvisc veterinar dla Provinzia ti vëgn dada ai doturs di tiers che depënn dala Provinzia o a direturs che fej pert sciöche doturs di tiers dl organich dl Sorvisc sanitar dla Provinzia, cun almanco cater agn de sorvisc, o a doturs di tiers convenzionà cun le Sorvisc sanitar dla Provinzia che à n’esperiënza de laûr de almanco diesc agn.

(6) Le paiamënt dl diretur dl Sorvisc veterinar dla Provinzia vëgn stabilì, ćina ch’al ne vëgn nia determiné aladô dles normes dla Provinzia sön les tratatives coletives, cun deliberaziun dla Junta provinziala, tignin cunt dl tratamënt economich complessif dl livel plü alt de direziun dl sorvisc veterinar pro le Sorvisc sanitar dla Provinzia, alzè ćina al diesc porcënt. Chësc paiamënt gnarà garantì tres l’atribuziun de n’indenité de funziun aposta.

(7) Le personal veterinar che laôra pro la Provinzia vëgn trasferì pro l’aziënda speziala Unité sanitara locala zënter-süd, colochè fora dl organich de chësta y metü a desposiziun dla Provinzia aladô dl coma 3.

ćiara inće l’art. 10 dla L.P. di 9 de jügn 1998, n. 5:

(1) Pro la pröma prozedöra de cerna por la nominaziun dl diretur dl Sorvisc veterinar dla Provinzia aladô dl articul 21 dla lege provinziala di 14 d’agost 1996, n. 18, vëgnel inće lascè pro i doturs di tiers cun almanco cater agn de sorvisc, i doturs di tiers superiurs sciöche inće i doturs di tiers dirighënć dl secundo livel de direziun dl organich sanitar di doturs di tiers dl Sorvisc sanitar dla Provinzia.