j) Lege Provinziala di 23 de novëmber dl 2010, n. 141)
Urdinamënt di raions da jì cun i schi 2)

(1)  Chësta lege regulea:

1. la segurëza y l cumpurtamënt de chi che se nuza di raions da jì cun i schi atrezei;
2. la gestion di raions da jì cun i schi per garantì la segurëza;
3. l pruzedimënt che regulea la despunibltà y la servitù di raions da jì cun i schi atrezei.

(1)  I raions da jì cun i schi atrezei ie sperses da nëif naturela o produjeda a na maniera artifiziela, daviertes al publich y de regula resservedes ala pratica dl schi y a disciplines semientes, aldò dl coma 2. 3)

(2)  Pertes de n raion da jì cun i schi ie:

1. I purtoies da jì cun i schi, resservei a chi che va cun i schi, cun l snowboard o cun njins semienc; 4)
2. i mplanc portamont a fum y i mplanc a roda denteda cun servisc da jì cun i schi; 5)
3. i mplanc da fé nëif ora che la nfrastrutures tecniches y la cundotes d’alimentazion;
4. la nfrastrutures per l tëmp liede resservedes ai mutons, cun o zënza mplanc portamont;
5. la sperses resservedes per reprejentazions acrobatiches de schi y snowboard;
6. la sperses resservedes a alenamënc y garejedes;
7. la sperses nia njiniedes ca y resservedes al jì cun i schi;
8. I purtoies da pudejé, dala lueses y dala lueses da garejeda, nunziei tl articul 5-quater. 6)

(3)  La sperses nluegedes dedora di raions da jì cun i schi atrezei ne ie nia sometudes ala despusizions de chësta lege.

(1)  I gestëures di raions da jì cun i schi atrezei ie i tituleres dl’autorisazion al eserzize dla nfrastrutures nunziedes tl articul 2, coma 2, sciche nce i sogec che, per cuntrat, à chësta cualificazion.

(1)  Utënc di raions da jì cun i schi ie duc chëi che vën iló cun n’atrezatura da jì cun i schi, cun l snowboard o d’autri njins semienc o cun la lueses o la lueses da garejeda. 7)

(1)  L plan de setor di mplanc portamont y di purtoies da jì cun i schi, tlo dedò denuminà plan de setor, regulea l’adurvanza y la mudazions dl teritore finalisei al’atività dl jì cun i schi. L regulamënt d’esecuzion stabilësc i criteres y la pruzedures per l’apurvazion di ntervënc finalisei ala realisazion dla nfrastrutures nunziedes tl articul 2, coma 2, pustoms a), b), e), f) y g) defrenzian danter ntervënc tl raion da jì cun i schi, ntervënc de ntegrazion tl raion da jì cun i schi y ntervënc dedora dl raion da jì cun i schi. I raions da jì cun i schi ie definei tl articul 5/bis.

(2)  I ntervënc ai raions da jì cun i schi ie destinei ala realisazion dla nfrastrutures nunziedes tl articul 2, coma 2, pustoms a), b), e), f) y g), sun sperses nluegedes per ntier ti raions da jì cun i schi. I ntervënc ai raions da jì cun i schi ie destinei ala realisazion dla nfrastrutures nunziedes tl articul 2, coma 2, pustoms a), b), e), f) y g), sun sperses nluegedes n pert dedora di raions da jì cun i schi, ma liedes a chëstes diretamënter o funziunalmënter. I ntervënc de ntegrazion possa se cunfiguré nce coche cunliamënc de raions da jì cun i schi o coche realisazion de mplanc de apurteda. I ntervënc de ntegrazion ie ac de planificazion. La valutazion dla curespundënza di ntervënc de ntegrazion cun i prinzips dl svilup soziel, economich y turistich vën fata da na cumiscion metuda adum da trëi persones espertes ti ciamps dla sozio-economia y dla mubiltà, che possa nce unì cherdedes ite da dedora dl’Aministrazion provinziela. I ntervënc dedora di raions da jì cun i schi ie destinei ala realisazion dla nfrastrutures nunziedes tl articul 2, coma 2, pustoms a), b), e), f) y g), sun sperses nluegedes per ntier dedora dai raions da jì cun i schi. I ntervënc dedora dai raions da jì cun i schi ne vën nia lascei pro.  9)

(3)  L plan de setor cuntën i prinzips programatics per l svilup di ciamps de planificazion per n tëmp de 10 ani, tenì cont dla defendura dla cuntreda y dl ambient, dla carateristiches dl teritore sciche nce dl svilup soziel, economich y turistich tl nteres dla populazion dl luech.

(4)  L plan de setor curespuend ai prinzips y ala pruzedures di articuli 49 y 50 dla lege provinziela di 10 de lugio 2018, n. 9. I raions da jì cun i schi y la nfrastrutures aldò dl articul 2, coma 2, pustoms a), b), e), f) y g), de chësta lege ne vën nia metui ite tl plan urbanistich cumenel. 10) 11) 

(1)  I raions da jì cun i schi ie raions geografics delimitei, bele atrezei cun nfrastrutures finalisedes al’atività dl jì cun i schi. Ti raions da jì cun i schi vëniel lascià pro la realisazion dla nfrastrutes nunziedes tl articul 2, coma 2.

(2)  La ntlujion de na spersa tl plann de setor coche raion da jì cun i schi ne cumporta nia n liam d’adurvanza y de frabica de chësc raion aldò dla leges n forza y nianca l titul per la ndeniteies nunziedes tl articul 25 de chësta lege y tl articul 20 dla lege provinziela di 30 de jené 2006, n. 1. 12)

(1)  L register di purtoies da jì cun i schi y di mplanc portamont, tlo dedò denuminà register, cuntën la reprejentazion detalieda sun chertes dla nfrastrutures nunziedes pra i pustoms a), b), e), f) y g) dl coma 2 dl articul 2.

(2)  La ntroduzion dla nfrastrutures nunziedes tl coma 1 tl register vel unfat dla ntroduzion tl plann urbanistich cumenel y curespuend ala detlarazion de utl publich cun fazion de cin ani per i fins nunziei tl Titul VI de chësta lege y tla sezion IV dla lege provinziela n. 1 di 30 de jené 2006. 12)

(1)  Per i fins de chësta lege vëniel recunesciù sciche purtoies da pudejé, dala lueses y dala lueses da garejeda chëi purtoies menei ti raions da jì cun i schi y/o chëi cuntenii ti plans de cuntreda.

(2)  Per i purtoies dala lueses y dala lueses da garejeda nunziei pra l coma 1 menei dan i 24 de utober 2024, che ne curespuend nia ala carateristiches morfologiches nunziedes tl articul 5, coma 4, dl decret legislatif di 28 de fauré 2021, n. 40, adotea i gestëures mesures cumpensatives de segurëza ativa, coche rëies de prutezion, tofles de nfurmazion, sënies de ralentamënt y pericul. 13)

(1)  Ti raions da jì cun i schi atrezei possa i gestëures de chisc ndividué n i dis n chëi che l ne vën nia fat garejedes la sperses che ie da resservé ai alenamënc cun i schi, l snowboard y njins semienc.

(2)  La sperses nunziedes pra l coma 1 vën delimitedes dal gestëur dl raion da jì cun i schi atrezà, che se cruzia de les stlù ju per l publich les spartian, cun delimitazions aldò, dai autri purtoies o da pertes de chisc acioche i utënc turistics ne passe nia lessù y metan su, tl scumenciamënt dla trassa na tofla sun chëla che l ie scrit: “Pista chiusa/Piste gesperrrt/Purtoi stlut”. Duta la persones che frecuentea i purtoies d’alenamënt per l schi y per l snowboard muessa avëi sëura n casco de prutezion omologà. L njinië ca i purtoies d’alenamënt ti spieta ala lia o sozietà sportiva che mët a jì l alenamënt. Ala fin dl’atività d’alenamënt muessa la persona nciarieda dala urganisazion sportiva se cruzië de tò demez la stanges da slalom che forma la trassa curespundënta y de splané ora la bujes che se à furmà ntan l alenamënt. 14) 

(3)  Ti raions da jì cun i schi atrezei possa i gestëures de chisc raions ndividué sperses da resservé ala pratica de reprejentazions acrobatiches cun i schi, l snowboard y cun d’autri njins semienc.

(4)  La sperses nunziedes tl coma 3 muessa unì spartides dai autri purtoies cun prutezions adatedes, les muessa unì mantenides regulermënter y si utënc muessa avëi sun l cë n casco de prutezion omologà. 15)

(5)  Ti raions da jì cun i schi atrezei possa si gestëures ndividué sperses nia njiniedes da resservé ala pratica dl jì cun i schi. Chësta sperses muessa vester spartides dai autri purtoies cun pruteztions adatedes y si utënc muessa avëi n casco de prutezion omologà. 16)

(1)  I purtoies muessa vester nluegei te raions te chëi che l ne ie nia pericul de smueies o levines o che ie a uni moda segurei o cuntrolei per scunjaré de tei periculi, y vester adatei sota l aspet idrogeologich.

(2)  I purtoies muessa, ntan che i ie davierc, vester pusciblmënter liedesc da mpedimënc atipics che pudëssa reprejenté n pericul per i utënc. Tl cajo che l ne ie nia mesun tò y tres i mpedimënc atipics muessi unì senialei sciche l toca y prutejei.

(3)  La larghëza y la pendënza de n raion sun chël che l ie de plu purtoies, muessa vester nsci che i utënc che uel passé da n purtoi al auter posse furné lessù zënza problems.

(1)  I purtoies da jì cun i schi ie tlassifichei aldò de si livel de deficultà. La carateristiches relatives ie stabilides dal regulamënt d’esecuzion.

(1)  Sun i ëures di purtoies da jì cun i schi vëniel metù stanges per i delimité y per ndiché l degré de deficultà, la denuminazion y la numerazion. La stanges ie dl culëur che curespuend ala deficultà dl purtoi y danterite iel plazà a na destanza de almanco uni 200 metri l un dal auter n sëni che ndichea la denuminazion o la numerazion dl purtoi, aldò dla normes UNI de setor. 18)

(2) 19)

(3)  L gestëur dl raion da jì cun i schi atrezà muessa se cruzië che la sperses pra i ëures di purtoies sibe seguredes a na maniera adateda contra i periculi atipics. 20)

(4)  N possa renunzië a delimité l purtoi da jì cun i schi tres elemënc artifiziei te chisc caji: 21)

1. tla pertes ulache l purtoi ie delimità da elemënc naturei;
2. tla pertes ulache l ëur dl purtoi ie delimità da rëies o da d’autri mesuns de segurëza che ie da udëi bën;
3. tla pertes ulache i purtoies ie cunliei o ruva adum.

(5)  La prutezions ududes danora da chësc articul muessa muessa vester fates de materiai adatei a smendrì l slune canche n pëta laite.

(1)  I purtoies dala lueses o dala lueses da garejeda ie delimitei sciche i purtoies dai schi. 22)

(1)  La loses da pudejé njeniedes ca, senialedes, cuntroledes y daviertes al publich vën delimitedes da les pertes cun stanges aposta:

1. sun i ëures dl purtoi per spartì trasses daujin cun na direzion defrënta;
   
2. sun l ëur de n purtoi canche la loses ie trassedes te lueges caraterisedes da puec elemënc naturei.
   

(2)  La delimitazion di ëures di purtoies ie fata de stanges a sezion zirculera, zënza ciantons, dal culëur curespundënt al degré de deficultà dl purtoi y la possa unì ntegreda cun scëibes, metudes a na destanza de plu o manco 500 metri la una dal’autra, che reporta la denuminazion o la numerazion dl purtoi. La delimitazion cun la stanges ie da realisé, sce la va, cun materiai biodegradabli.

(3)  La delimitazion cun stanges ne ie nia de bujën:

1. ti trac te chëi che l purtoi ie delimità da elemënc naturei sciche custons, ronesc, raions da bosch o da elemënc artifiziei coche mures o sieves;
   
2. ti trac te chëi che l ie unì metù, sun l ëur dl purtoi, rëies de prutezion o d’autri elemënc de segurëza;
   
3. ti trac de ncrëusc o ulache l ruva adum purtoies.
   

(4)  La delimitazion cun stanges muessa unì realiseda a na maniera da lascé pro la remozion saurida ala fin dla sajon da d’inviern. 23)

(1)  I raions da jì cun i schi atrezei ie njiniei ite per cruzi dl gestëur cun la tofles che ie debujën y che ie cunformes ala normes UNI n forza.

(2)  Pra la stazions d’azes prinzipieles al raion da jì cun i schi atrezà vëniel metù, te na pusizion da udëi bën, na tofla cun la ndicazion di mplanc y di purtoies, de si denuminazion, dl livel de deficultà y sce la ie stluta o davierta. Sun la tofla vëniel oradechël dat sëura i orares de giaurida y de stlujura di mplanc, l’ëura de canche l vën fat l ultim cuntrol da pert dl servisc purtoies y i orares normalmënter udui danora per platé y fé la manutenzion dl purtoi cun mesuns mecanics o d’autri njins tecnics.

(3)  La tofles muessa dantaldut sodesfé chisc bujëns:

1. ndiché, al scumenciamënt dl purtoi y dlongia si variantes, deramazions y ncrujedes prinzipieles, si denuminazion o numerazion y l livel de deficultà;
2. dé sëura, dlongia la stazions d’azes prinzipieles ai mplanc portamont, la pusizion di mplanc y di purtoies y i orares de giaurida y de stlujura de chisc.
3. dé duta la ndicazions che ie debujën per la nuzeda drëta y segura di purtoies, ti dajan mpurtanza particulera al cumpurtamënt che ie da adoté sun pertes determinedes dl purtoi.

(4)  D’autra despusizions che reverda la tofles y i sënies de nfurmazion ie stabilides cun regulamënt d’esecuzion.

(1)  L gestëur di raions da jì cun i schi atrezei stipulea, dan che i vën giaurìi al publich n cuntrat aposta d’assegurazion de respunsabltà zevila contra danns ai utënc y a terzi gaujei per fac che se porta pro pervia dla respunsabltà n relazion al’adurvanza de chisc raions, delidan l propreter dl terac aldò dl liber fundier, sce l se trata de na persona defrënta, da uni respunsabltà n chësc cont. La soma minima dla curidura d’assegurazion ie stabilida dal assessëur provinziel cumpetënt, do che l ie unit audì la lia di gestëures di mplanc portamont y di purtoies da jì cun i schi plu reprejentativa tla provinzia.

(2)  L gestëur dl raion da jì cun i schi atrezà à oradechël l duvier de:

1. se cruzië dla preparazion y dla manutenzion di purtoies;
2. se cruzië dla tlassificazion y dla prutezion di purtoies y de njinië y plazé la tofles scrites dant sun i raions da jì cun i schi atrezei;
3. mëter a jì n servisc de nfurmazion sun la cundizions meteorologiches y sun l pericul de levines, sciche nce sun la normes de cumpurtamënt di utënc ududes danora dala lege;
4. garantì n servisc de sucors sun i purtoies;
5. mëter a despusizion debant per l Raion funziunel Turism y per l Ufize provinziel Furnadoies lercs y tofles adatedes per la defujion al publich la campanies de nfurmazion y sensibilisazion nunziedes tl articul 23, 24)
6. mëter a despusizion, a n cumpëns adecuat, l raion da jì cun i schi atrezà ai urganisadëures de manifestazions agonistiches de livel naziunel o internaziunel che ie de nteres per l turism tla provinzia de Bulsan, 25)
7. njinië defibriladëures semiautomatics da mëter te lueges adatedes y, te uni cajo, tla lueges ulache l se tën su la forzes de socors, y garantì cundizions d’azes saurì y de nuzabltà da pert dla forzes de socors y dl personal spezialisà per l funziunamënt curespundënt. 26)

(3) L gestëur dl raion da jì cun i schi atrezà muessa vester cunlià cun la Zentreles dl numer unich europeich d’emergënza 112 o cun d’autra strutures ecuivalëntes atives sun l teritore, tres n zentralin y, n auternativa, tres n numer ntern resservà al socors sun i purtoies che messerà vester ativà debota tla fasa de alarm acioche l ti posse unì judà ala persona che se à fat mel. 27)

(1)  I purtoies davierc ai utënc muessa unì njiniei ca a na maniera adateda, acioche n posse furné lessù segures.

(2)  N particuler muessa l gestëur se cruzië de:

1. platé la nëif cun mascins y la njinië aldò dla cunzions meteorologiches y dla nëif nstëssa;
2. tò y tres i mpedimënc che n possa spusté y che i utënc ne possa nia udëi saurì;
3. senialé y prutejé i mpedimënc atipics che ne possa nia unì spustei;
4. senialé l’atività de fé nëif artifiziela dejëuta ntan i orares de giaurida dl purtoi.

(3)  L’atività de manutenzion dëssa oradechël nce garantì che i purtoies mantënie la carateristiches y i recuisic tecnics scric dant da chësta lege nce per dut l di.

(4)  Nia da cunscidré mpedimënc ie i mudli ne nëif artifiziela, pitli mudli de nëif criei dala passaja de furnadëures dai schi, lueges nia defin ndrëtes gaujedes da variazions dla cundizions atmosferiches o dala preparazion dl purtoi, lueges de nëif dlaceda y iregulariteies semientes gaujedes dal’adurvanza normala dl purtoi. Perchël ti spietel ai utënc de cialé de i schivé.

(1)  I purtoies davierc ai utënc ie defendui, aldò de previjions raziuneles, dai periculi ogetifs y atipics, dantaldut dal pericul de levines y smueies.

(2)  L gestëur muessa se cruzië plu avisa che:

1. l vënie metù su rëies sun i ëures di purtoies, ulache l ie raides o trac scialdi ërc de sbiech o de lonch, o d’autra carateristiches che pudëssa gaujé, tl cajo che n toma, che n furnëie ora dl purtoi y ruve tl pericul;
2. l vënie senialà y defendù la ncrujedes di purtoies cun stredes daviertes al transit dl publich a na maniera che i utënc muesse limité si slune o, ti caji de majer pericul, de se fermé. D’autra despusizions n chësc cont possa uní stabilides dala Jonta provinziela.

(1)  Sun i raions da jì cun i schi atrezei vëniel metù a jì n servisc purtoies adatà custituì da una o plu persones che à la cumpetënza y l atrezamënt aldò di bujëns per dejëujer ativiteies de preparazion, manutenzion, prutezion, senialadura y cuntrol di purtoies.

(2)  L servisc purtoies possa unì sëurandat dal gestëur a urganisazions, istituzions o ënc spezialisei.

(3)  La despusizions n cont dl servisc purtoies nunzià ti comes 1 y 2 ie stabilides cun regulamënt d’esecuzion.

(1)  L vën garantì n servisc de sucors adatà a na moda da recuperé debota y cun cumpetënza persones che se à fat mel sun i raions da jì cun i schi atrezei.

(2)  L servisc de sucors ie metù adum da persones alenedes al trasport de persones che se à fat mel y che ie atrezedes sciche l toca per dejëujer l servisc de sucors.

(3)  L servisc de sucors possa unì sëurandat dal gestëur a urganisazions, istituzions o ënc spezialisei.

(4)  Ala fin de uni sajon ti manda l gestëur al Raion funziunel Turism la lista analitica di nzidënc che se à purtà pro sun i raions da jì cun i schi atrezei, se tenian ala formaliteies y ai tëmps dac dant dal regulamënt d’esecuzion. 28)

(1)  L gestëur dl raion da jì cun i schi atrezà ndividuea l diretëur/la diretëura di purtoies. Tl cajo che l ne vën nia ndividuà n diretëur/na diretëura vën la funzions de diretëur/diretëura di purtoies sëurantëutes dal gestëur dl raion da jì cun i schi atrezà.

(2)  L diretëur/La diretëura di purtoies:

1. mët a jì, ie de verdia y mëina l’ativiteies de gestion di purtoies cialan sun si stat de segurëza;
   
2. l/la coordinea y cunlëura cun l servisc de socors sun i purtoies;
   
3. l/la senialea debota al gestëur dl mplant la presënza de situazions che se damanda la stluta dl purtoi se cruzian nstës/nstëssa y debota de chësc tl cajo de pericul;
   
4. l/la ndichea i ntervënc de manutenzion urdenera y straurdenera che ie de bujën acioche l purtoi sibe segur y l/la ie de verdia sun si realisazion;
   
5. l/la coordinea y mëina i/la operadëures che se cruzia dl servisc de socors y dl servisc di purtoies y de cuntrol;
   
6. l/la njinia n plan de gestion dla emergënzes sun si cumprensore per i caji de pericul de lavines. 29)
   

(1)  L gestëur dl raion da jì cun i schi atrezà determinea l orar de giaurida y de stlujura di purtoies.

(2)  I purtoies vën giaurìi do che l ie unit verificà si cundizions, l funzionamënt sciche l toca di elemënc de segurëza y de chëi destinei ala senialetica sciche nce dl’assënza de periculi atipics cun atenzion particulera al pericul de levines o smueies.

(2-bis)  Sce l purtoi ie te de stleta cundizions muessa chësc unì senialà a na maniera tlera per l publich tl scumenciamënt dl purtoi nstës, coche nce pra la stazions a val di mplanc portamont da fums. 30)

(3)  L gestëur dl raion da jì cun i schi atrezà cumanda la stlujura di purtoies o de vel’ pert de chisc ti caji nunziei tlo dessot:

1. ala fin dl di;
2. canche l se porta pro situazions te chëles che l ne ie nia mesun garantì che n posse dejëujer l servisc de sucors, o duvieres liei ala senialazion, ala prutezion, ala preparazion y ala manutenzion di purtoies, tenian cont dantaldut dla segurëza di utënc;
3. for canche cundizions particuleres liëdes a sitazions ogetives mët tl pericul la segurëza o l furné normal sun i purtoies y, tl respet de cie che ie udù danora dala lege provinziela di 26 de mei 1976, n. 18 y mudazions suzessives, canche l ie pericul de levines o smueies;
4. n ucajion de manifestazions agonistiches, garejedes y alenamënc.

(4)  Per garantì la segurëza di utënc ndividuea l gestëur i purtoies che possa unì śarei nce mé per n cër tëmp determinà per pratiché l sport dl snowboard.

(5)  I purtoies possa, aldò de si carateristiches y dla situazion de pericul, unì śarei defin o n pert.

(6)  I purtoies o n valguna pertes de chisc vën stluc l fajan al savëi, aldò dl coma 3, pustom b), c) y d) y dl coma 4 tres la tofles metudes ora coche stabilì dal regulamënt d’esecuzion.

(1)  I utënc di raions da jì cun i schi atrezei ie respunsabli de si cumpurtamënt sun i purtoies. I muessa se astilé sciche l toca y metan verda, a na maniera da schivé de fé nzidënc, da ne vester no n pericul per d’autri y per ne gaujé no dann a persones o a cosses. 31)

(2)  Dantaldut à i utënc da:

1. respeté la regules dates dant dal gestëur tl’esecuzion de si duvieres y dai organns de verdia y de cuntrol nunziei tl articul 30;
2. se tenì ala despusizions dates dant dala tofles;
3. ti purté aiut a d’autri utënc che à abù n nzidënt o che ie n deficultà y senialé debota l fat ala forzes dl servisc de sucors.

(1) La persones cun dejabltà, che ie te na cundizion che ne lascia nia pro la pratica dl jì cun i schi n autonomia y segurëza, muessa unì judedes da n acumpaniadëur/n’acumpaniadëura che les à nstësses cris ora.

(2) Acioche les vënie ndividuedes saurì dal’autra persones che va cun i schi furnea la persones cun dejabltà cun n camesëul oranc y si acumpaniadëures porta na scrita “acumpaniadëur” sun l brac y sun l dovia dla joca.

(3) La persones cun dejabltà à l dërt de prezedënza a furné su cun i mplanc portamont ti cunfronc de chëles zënza dejabltà.

(4) I utënc zënza dejabltà muessa, canche i furnea ju, resservé n’atenzion particulera ala persones cun dejabltà, respetan si lercs de percurs y la traietories che les fej a furné ju. 32)

(1)  I utënc dl raion da jì cun i schi atrezà muessa:

1. tò l purtoi y l slune che curespuend a si capaziteies tecniches y a si cundizions fisiches, ala cundizions dl purtoi y dl tëmp y ala cumpëida de jënt che ie sun i purtoies;
2. smendrì l slune tla pertes dl purtoi ulache n ne vëij nia dalonc, tla ujinanza de costruzions o rëms, tla ncrujedes y tla bifurcazions, tl cajo de nibl y de na stleta ududa o sce l ie plën de jënt, ulache l purtoi ie strënt y sce l ie persones sun l purtoi che à permò mparà a jì cun i schi;
3. mantenì sun la traietoria crissa ora, la destanzes de segurëza aldò dla carateristiches dl purtoi, dla vijibltà y dla carateristiches dl njin sportif adurvà. L utënt che ie plu insù muessa mantenì na direzion a na maniera che l posse schivé de peté adum o avëi nterferënzes cun la persona che ie dessot per no la mëter tl pericul; 33)
4. se seguré, dan che n ti va dant a zachei, che n ebe lerch assé per l fé y che n sëuravëije bën assé la situazion. N possa jì dant sibe da lassù che da lajù, sibe da man drëta che da man ciancia, ma for a na destanza che n ne sibe nia de mpedimënt per l utënt a chël che n ti va dant; 34)
5. ti dé la prezedënza ai mesuns mecanics per l servisc purtoies y al servisc de sucors y ai mesuns mecanics nunziei tl art. 21, acioche i posse zirculé zënza mpedimënc;
6. se seguré de pudëi jì sun l purtoi o de traversé l purtoi zënza gaujé n pericul per sé y per i autri;
7. mudé la traietoria pra i ncrëujes y furné plu plan per schivé uni cuntat cun chi che vën da n’autra direzion o da n auter purtoi. Dlongia l ncrëusc muessa l utënt cialé sun chi che vën da n auter purtoi, nce sce chësc vën da lassù ju; 35)
8. ne se fermé nia pra i passajes ublienc, daujin a coi y sauc o te lueges ulache n ne vëij nia, y cialé de ne vester nia n pericul per i autri utënc canche n se fërma. Te chësc ultim cajo muessa i utënc sté sun i ëures dl purtoi; 36)
9. tl cajo che i toma, se n jì dal purtoi tan aslune che la va y sté, sce l ie debujën, sun l ëur dl purtoi;
10. ti dé, sce i vën damandei, ai organs nciariei dla verdia y dl cuntrol di purtoies, si generaliteies sce i à abù n nzidënt o sce i ie stac testemons de n nzidënt o sce i ti à purtà aiut a zachei che ie n deficultà;
11. se nuzé de schi, snowboards o njins semienc cun mesuns che posse i tenì su o fermé tl cajo che i se destache, acioche i ne sibe nia n pericul per i autri;
12. ntan che i se fërma pra ustaries o nzaul d’auter, mëter i njins da furné (schi, snowboard, fusć i auter) de zes dal purtoi, a na moda da ne vester no de mpedimënt o de pericul per d’autra persones;
13. ne jì nia sun l purtoi d’alenamënt nunzià tl articul 6, coma 2, y furné ju. 37)

(2) L schiadëur/La schiadëura che se nuza di purtoies da jì cun i schi muessa avëi n’assegurazion che vel y che cuer si respunsabltà zevila per danns o nzidënc gaujei a terzi. L ie de ublianza per l gestëur di raions da jì cun i schi atrezei, ora per chëi di purtoies da pudejé, dala lueses y dala lueses da garejeda, mëter a despusizion di utënc, canche i compra la cherta per furné cun l mplant portamont, na poliza d’assegurazion per la respunsabltà zevila per danns gaujei ala persones o ala cosses. 38)

(3)  La Jonta provinziela possa udëi danora tl nteres dla segurëza sun i raions da jì cun i schi atrezei, la ublianza de na curidura d’assegurazion sibe per i utënc che per i gestëures di raions da jì cun i schi atrezei. La Jonta provinziela determinea la carateristiches y la mesura minima dla curidura d’assegurazion.

(1)  I jëuni/La jëunes sot a 18 ani muessa, canche i/les pratichea l schi alpin y l snowboard, l telemark, l sport dla luesa y dla luesa da garejeda ti raions da jì cun i schi atrezei, tò n casco de prutezion omologà. 39)

(2)  L assessëur provinziel cumpetënt possa, cun pruvedimënt mutivà, slargë ora la ublianza dl casco nunzià tl coma 1 nce a d’autra categories de utënc.

(3) La persones cun dejabltà tol l casco aldò dl coma 1. Tl cajo de ncumpatibltà de tò l casco pervia dla sort de dejabltà, possa l dutor dl sport scrì ora n zertificat che atestea l’esenzion curespundënta. 40)

(1)  L ie pruibì furné cun i schi da ciocs do che n à bù buandes alcoliches o tëut ite sustanzes tossicologiches, aldò dl articul 31 dl decret legislatif di 28 de fauré 2021, n. 40, y mudazions suzessives. 41)

(1)  (1) L ie pruibì jì a pe o cun i fusć da nëif sun i purtoies da jì cun i schi, ora che tl cajo de bujëns de prëscia o ora che per trac curc ndividuei y senialei dal gestëur dl raion da jì cun i schi atrezà. 43)

(1-bis)  Chi che vën ju per l purtoi da jì cun i schi zënza schi muessa sté sun i ëures dl purtoi y ti dé la prezedënza ai mesuns mecanics per l socors, per l servisc y per la manutenzion di purtoies y di mplanc y ne daussa a deguna maniera vester de mpedimënt per chisc. 44)

(1-ter)  Ntan la garejedes o i alenamënc iel pruibì a chi che ne tol nia pert a chisc furné sëura la limitazions senialedes, coche nce sté sun l purtoi de garejeda o d’alenamënt y furné lessù. 45)

(1-quater)  L ie normalmënter pruibì jì su per l purtoi cun i schi trac sëura y i fusć da nëif, o cun uni auter mesun. L jì su per l purtoi possa unì lascià pro cun n’autorisazion danora dl gëstëur dl raion da jì cun i schi atrezà o, scebën che l mancia chësta autorisazion, te caji de bujëns de prëscia y urgënza, y n muessa a uni maniera sté l plu puscibl daujin ala stanges de delimitazion dl purtoi, cialan de schivé resiedes per la segurëza de chi che va cun i schi y respetan la prescrizions nunziedes te chësta lege, coche nce chëles dl gestëur dl raion da jì cun i schi atrezà. 46)

(2)  Ntan i orares de manutenzion di purtoies y canche i vën platei ie l azes a chisc purtoies pruibì. La Jonta provinziela possa determiné la modaliteies che ie debujën.

(1)  I mesuns mecanics possa mé azeder ai raions da jì cun i schi atrezei ntan y orares de giaurida di purtoies o do che i ie unic stluc; ora che ti caji de bujën y de prëscia. Tl cajo de produzion de nëif artifiziela ntan l orar de giaurida dl purtoi, muessa chësc unì senialà a na maniera adateda.

(2)  I mesuns mecanics muessa te uni cajo avëi njënies de senialazion cun lums y sonns n funzion, i muessa furné sun l ëur dl purtoi y bel plan a na moda de ne gaujé no pericul per i autri.

(1)  L gestëur di raions da jì cun i schi atrezei ne ie nia respunsabl di nzidënc che possa suzeder ora de chisc raions, ënghe sce i ie da arjonjer cun i mplanc portamont.

(2)  L patron dl grunt ne ie nia respunsabl no di nzidënc che possa se purté pro sun i percursc nluegei ti raions da jì cun i schi no di nzidënc che possa se purté pro dedora de chisc raions. 47)

(1)  L Raion funziunel Turism y l Ufize provinziel Furnadoies, deberieda eventualmënter nce cun la urganisazions y la mprejes turistiches y l coleghium provinziel di maestri de schi y l coleghium provinziel di mëinacrëp, mët a jì campanies de nfurmazion y de sensibilisazion per i zitadins y la zitadines y scumenciadives didatiches dedichedes ai jëuni/ala jëunes, che mira ala defujion dla cultura dla segurëza su per mont y dla cunescënza dla regules de cumpurtamënt per la pratica dl sport sun la nëif. 48)

(1)  L pruzedimënt per somëter n raion da jì cun i schi atrezà a na servitù, tlo dessot tlameda servitù de raion da jì cun i schi, che reverda i raions nunziei tl articul 2, ora che i purtoies da pudejé y dala lueses nunziei tl articul 2, coma 2, pustom h), ie regulamentà, pervia che l ne ie nia udù danora da chësta lege, dala despusizions cuntenides tla lege provinziela di 15 d’auril 1991, n. 10 y mudazions suzessives. Per la sperses de proprietà publica o per l patrimone ndespunibl vel la normes curespundëntes dl setor. L pruzedimënt per la mpusizion dla servitù de raion da jì cun i schi possa unì damandà dala persones nteressedes nce n referimënt a purtoies che ie bele unic realisei defin o n pert y che vën adurvei n basa a n’acurdanza danter la pertes, sce chësta acurdanza destoma dadedò o vën cuntesteda dai patrons di teraces aldò dl liber fundier. 49)

(2)  Tl cajo che n ne vënie nia a n’acurdanza n cont dla despunibltà di raions da jì cun i schi y dla ndenisazion curespundënta, muessa la pert che à la ntenzion de nvië via l pruzedimënt per la mpusizion dla servitù de raion da jì cun i schi se purvé de unì a una dan na cumiscion pra l Raion funziunel Turism, ti l fajan al savëi danora cun na lëtra recumandeda cun avis de rezevuda al patron dla spersa dl terac nteressà y al diretëur/ala diretëura dl Raion funziunel Turism, juntan na relazion tecnica dla strutures da realisé y dajan sëura analiticamënter la ndeniteies pitedes. 50)

(3)  La cumiscion nunzieda tl coma 2 ie metuda adum da na persona che reprejentea l Raion funziunel Turism, che ie a cë dla cumiscion, da na persona che reprejentea la Repartizion Aministrazion dl patrimone, da na persona che reprejentea la urganisazion de categoria plu reprejentativa di gestëures di mplanc portamont, y da na persona che reprejentea la lia di paures plu reprejentativa a livel provinziel. 51)

(4)  L diretëur/La diretëura dl Raion funziunel Turism chërd ite la pertes y la cumiscion nunzieda tl coma 2 tl tëmp de 20 dis dala comunicazion nunzieda tl coma 2 per cialé de unì a n’acurdanza. 52)

(5)  Tl cajo che n sibe boni de unì a n’acurdanza vëniel scrit n verbal che à da unì sotscrit da tramedoi pertes y dai cumponënc dla cumiscion.

(6)  Tl cajo che l’acurdanza ne ëssa nia da se purté pro vëniel a uni moda scrit n verbal, te chël che l vën spezificà la pusizion dla pertes.

(7)  Tl cajo che l’acurdanza ne se porte nia pro tl tëmp de 60 dis dala comunicazion nunzieda tl coma 2, ie uni una dla pertes liedia de nvië via l pruzedimënt per la mpusizion dla servitù de raion da jì cun i schi, aldò de cie che ie udù danora da chësta lege y dala normativa provinziela n cont dla despuscions per utl publich.

(1)  Al patron aldò dl liber fundier dla spersa sometuda ala servitù de raion da jì cun i schi ti spietel chësta ndeniteies:

1. na ndenità una tantum per la grovaria ciarieda sun la spersa y, sce n cajo, sun i frabricac che ie lessù coche cunseguenza dla mpusizion dla servitù de raion da jì cun i schi;
2. coche njonta ala ndenità nunzieda pra l pustom a), na ndenità da paië uni ann coche curespundënza per la rededa smendrida y per d’autri danns eventualmënter gaujei pervia dla nuzeda dla sperses nteressedes.

(2)  Tla determinazion dla ndeniteies vëniel nce tenì cont dla mpurtanza turistica dl raion nteressà y dla situazion geografica.

(3)  L valor dla spersa sometuda ala servitù de raion da jì cun i schi vën calculà aldò dla cundizions te chëles che la ie al mumënt dl’ocupazion; l ne vën nia aplicà detrazions per grovaries eventualmënter scrites ite a cëria dla imubilia.

(4)  Al patron dl terac aldò dl liber fundier ti vëniel te uni cajo rembursà duc i danns che ti vën n cajomei gaujei canche l raion da jì cun i schi vën njinià ite y atrezà tres la ocupazion di teraces daujin.

(5)  I criteres da apliché per la determinazion dla ndenieteies vën stabilides cun regulamënt d’esecuzion.

(1)  La servitù de raion da jì cun i schi cunferësc chësta rejons:

1. fé lëures de giavamënt, livelamënt y de bonificazion, de desbuscamënt, taië lëns y rames n aldò dl proiet apurvà, che ie, sce n cajo de bujën, sometù al’autorisazion per pudëi njnië ite l raion da jì cun i schi;
2. mëter su tofles y uni autra sort de elemënc per la segurëza;
3. se nuzé dl terac per la passaja di schiadëures y per la manutenzion dla chëutra de nëif ntan l tëmp che la spersa ie curida de nëif y per la realisazion de mplanc da fé nëif;
4. ora de cie che ie udù danora dal articul 20, pruibì l azes al raion da jì cun i schi y ai mplanc ala persones nia autorisedes tl tëmp che la spersa ie curida dala nëif, ntan i lëures de manutenzion, preparazion y cumedura di purtoies;
5. pruibì uni sort d’atività che pudëssa limité l funzionamënt reguler di purtoies y di mplanc;
6. restan mpé la despusizions de lege che ie n forza, azeder al terac ntan l tëmp da d’instà –rembursan l patron tl cajo de danns – per dejëujer duc i lëures de manutenzion regulera che ie debujën sun i purtoies, i mplanc y la strutures de njonta, nce cun mesuns mecanics.

(1)  L tituler dla servitù de raion da jì cun i schi possa se damandé l trasferimënt dla servitù, sce l desmostra che chësc fossa de gran vantaje per l raion da jì cun i schi y de degun dann per l terac. Tl cajo che n ne unissa a deguna acurdanza vëniel aplicà i articuli 24 y 25.

(1)  La servitù de raion da jì cun i schi vën custituida a tëmp ndeterminà.

(2)  La servitù de raion da jì cun i schi fina via:

1. canche la ndenisazion anuela nunzieda tl articul 25, coma 1, pustom b) ne vën nia paieda per doi ani ndolauter,
2. canche la spersa cun la grovaria dla servitù de raion da jì cun i schi ne vën nia nuzeda per doi ani ndolauter;

(3)  Tl cajo che l raion da jì cun i schi ne vënie nia plu nuzà coche raion da jì cun i schi, passa l terac, debant y tla cundizions te chëles che l ie, ala despunibltà plëina dl patron dl terac aldò dl liber fundier; l tituler dla servitù de spersa da jì cun i schi muessa, sun dumanda dl patron dl terac aldò dl liber fundier, njinië l terac a na maniera che l sibe tla cundizions coche l fova dant.

(1)  Restan mpé l’aplicazion dla straufonghes penales tl cajo che l fat reprejënte n reat, vëniel stabilì chësta straufonghes aministratives:

1. chi che njinia ite n raion da jì cun i schi atrezà zënza cunzescion de frabiché ie sometù al paiamënt de na straufonga aministrativa de almanco 4.500,00 euro nchin al plu 45.000,00 euro;
2. chi che ne respetea nia la despusizions de chësta lege sun la manutenzion y la segurëza di raions da jì cun i schi atrezei, ie sometù al paiamënt de na straufonga aministrativa che va da na soma de almanco 5.000,00 euro a na soma de al plu 50.000,00 euro; 53)
3. c) chi che mëina n raion da jì cun i schi zënza se cruzië de mëter a jì n servisc purtoies y n servisc de socors, coche nunzià ti articuli 14 y 15, ie sometù al paiamënt de na straufonga aministrativa che va da almanco 20.000,00 euro a al plu 200.000,00 euro; 54)
4. chi che mëina n raion da jì cun i schi atrezà cun n servisc purtoies y n servisc de sucors nia adatei n raport ala grandëza dl raion da jì cun i schi – nce per cie che reverda la dotazion di dutores – ie sometù al paiamënt de na straufonga aministrativa che va da almanco 500,00 euro a al plu 1.500,00 euro;
5. chi che menan n raion da jì cun i schi atrezà ne respetea nia la despusizions n cont dla tofles nunziedes tl articul 10 ie sometù a n paiamënt de na straufonga aministrativa de na soma che va da almanco 500,00 euro a al plu 5.00,00 euro;
6. chi che mëina n raion da jì cun i schi zënza avëi respetà l duvier dl’assegurazion nunzieda tl articul 11, coma 1, ie sometù al paiamënt de na straufonga aministrativa che va da na soma de almanco 20.000,00 euro a na soma de al plu 200,000,00 euro;
7. chi che eserzitan n sport sun la nëif ne respetea nia la prescrizions dates dant dala tofles nluegedes sun l raion da jì cun i schi atrezà ie sometù al paiamënt de na straufonga aministrativa che va da almanco 30,00 euro a al plu 90,00 euro;
8. ora che per cie che ie preudù dai pustoms g), i) y l), ie chi che eserzitea n sport sun la nëif y ne respetea nia la despusizions de cumpurtamënt nunziedes ti articuli 17, 17-bis, comes 3 y 4, y 18, sometù al paiamënt de na straufonga aministrativa da almanco 50,00 euro a al plu 150,00 euro; 55)
9. chi che tl eserzité n sport sun la nëif ti raions da jì cun i schi atrezei ne porta nia aiut tl cajo de n nzidënt y ne dà nia ju si generaliteies coche persona che à da nfé cun l nzidënt o che ie testemon dl nzidënt ie sometù a na straufonga aministrativa de almanco 250,00 euro nchin a 1.000,00 euro;
10. la persona respunsabla dla viulazion dla ublianza dl casco de prutezion nunzieda tl articul 19 y tl articul 6, comes 2, 4 y 5, ie sometuda al paiamënt de na straufonga aministrativa de almanco 100,00 euro a al plu 150,00 euro; 56)
11. chi che ne respetea nia la despusizions nunziedes tl articul 20 ie sometù al paiamënt de na straufonga aministrativa de almanco 100,00 euro a al plu 150,00 euro; 57)
12. chi che ne respetea nia la ublianza ududa danora dal articul 21, comes 1 y 2 ie sometù al paiamënt de na straufonga aministrativa de almanco 100,00 euro a al plu 500,00 euro;
13. chi che ne respetea nia la despusizions sun l’assegurazion ublienta nunzieda tl articul 18, coma 2, ie sometù al paiamënt de na straufonga aministrativa de almanco 100,00 euro a al plu 150,00 euro y l ti vën tëut l skipass; 58)
14. chi che ne respetea nia la despusizions nunziedes tl articul 19-bis, ie sometù al paiamënt de na straufonga aministrativa che va da na soma de almanco 250,00 euro a na soma de al plu 1.000,00 euro. 59)

(1)  De azerté la viulazions n cont dl’aplicazion de chësta lege ie nciariei/nciariedes i/la funziuneres dl Raion funziunel Turism, che vën sustenii/sustenides tl cajo de bujën da personal da dedora nciarià y, te uni cajo dai organs de segurëza publica y dala polizai nunzieda tl articul 21, coma 1 dla lege di 24 de dezëmber 2003, n. 363. 60)

(2)  L Presidënt dla Provinzia ti dà a uni un dl personal da dedora nciarià nunzià tl coma 1 la cualificazion de „nciarià ala verdia“: cun chësta cualificazion ti vëniel dat a chësc personal da dedora, tl eserzize de si funzions, la cualificazion de nciarià de servisc publich.

(3)  I sogec nunziei tl coma 1 eserzitea nce la funzions de verdia y control y l azertamënt dla nfrazions dla normes nunziedes tla lege provinziela di 19 de fauré 2001, n. 5.

(4)  Per l azertamënt dla trasgrescions y per l’aplicazion dla straufonghes aministratives vëniel aplicà la despusizions dla lege provinziela di 7 de jené dl 1977, n. 9, y mudazions suzessives.

(5)  Tl cajo de na viulazion dl articul 29, coma 1, pustoms g) y h) che à gaujà n nzidënt cun dann a terc possel unì udù danora, ora che la straufonghes aministratives de scioldi, che al respunsabl dla viulazion ti vëniel tëut la cherta da jì cun i schi dl di o suspendù l pass da jì cun i schi per de plu dis.

(6)  Ti caji che l gestëur dl raion da jì cun i schi ne respetëie nia la ublianzes stabilides te chësta lege, ora che per cie che reverda l’aplicazion dla straufonghes aministratives nunziedes tl articul 29, possa l assessëur provinziel cumpetënt cumandé l’adozion de pruvedimënc adatei a stabilì inò la usservazion dla normes scrites dant, dajan dant n tiermul, che, canche l ie passà, porta ala suspenscion – nce mé parziela – dl’atività relativa.

(1)  Tl regulamënt d’esecuzion iel disciplinà i aspec de natura tecnica y de pruzedura che reverda chësta lege cun atenzion particulera a:

1. l’aplicazion y i cuntenuc dl plan de setor, i raions da jì cun i schi, l register y l pruzedimënt da fé; 61)
2. la definizion, la carateristiches tecniches, i recuisic y la tlassificazion di purtoies da jì cun i schi, di purtoies da pudejé, di purtoies dala lueses y dala lueses da garejeda, di itinereres da jì cun i schi y dla trasses de trasferimënt; 62)
3. la ublianzes dl servisc purtoies y dl servisc de sucors y la dotazion y la cualificazion dl personal;
4. i criteres per stabilì la ndenità per la servitù de raion da jì cun i schi cun atenzion particulera al valor turistich dl teritore nteressà y ala situazion geografica de chësc;
5. i periculi atipics;
6. la produzion de nëif artifiziela ntan l orar de giaurida dl purtoi aldò dl articul 21, coma 1.

(1)  La lege provinziela di 26 de fauré 1981, n. 6 ie abrogheda.

(2)  L coma 6, dl articul 10 dla lege provinziela di 15 d’auril 1991, n. 10 ie abrogà.

(1)  Do l coma 4 dl articul 7 dla lege provinziela di 30 de jené 2006, n. 1 vëniel juntà chësc coma 5:

„5. Al tituler dla cunzescion dl mplant portamont ti vëniel recunesciù l dërt de preferënza tl cajo de dumanda de njinië ite n raion da jì cun i schi atrezà, a cundizion che l sibe te chësc raion mplanc portamont a chëi che l ti ie unit dat chëla cunzescion.“

(1)  La curidura dla spëisa per i ntervënc a cëria dl eserzize 2010 che se porta pro da chësta lege vën fata cun la cuotes de stanziamënt che ie mo despunibles sun la UPB 18110 dl bilanz provinziel 2010 y che ie autorisedes per i ntervënc nunziei tla lege provinziela abrogheda dal articul 32, coma 1.

(2)  La spëisa a cëria di eserzizies finanzieres suzessives vën stabilida cun lege finanziera anuela. Chësta lege unirà publicheda tl Buletin Ufiziel dla Region. Duc chëi che ti spieta ie ubliei de la usservé y de la fé usservé coche lege dla Provinzia.