(1) La lista dles profesciuns de maester artejan che vel canche chësta lege va en forza, sciöche inće i profii profescionai che alda laprò preodüs dal decret dl Presidënt dla Junta provinziala di 19 de setëmber dl 1991, n. 21, y mudaziuns suandëntes, vëgn surantuć y dedô integrà cun les profesciuns che fala.
(2) Les impreses che é scrites ite tl Register dl comerz sciöche impreses che eserzitëia l’ativité de "mecanich d'auto" o de "eletrizist d'auto" - canche chësta lege va en forza - vëgn scrites ite d’ofize cun l’ativité de "tecnich d'auto".
(3) Inće les porsones che à i recuisić de "mecanich d'auto" o de "eletrizist d'auto" preodüs dal articul 25 de chësta lege - canche chësta lege va en forza - vëgn scrites ite tl Register dl comerz cun l’ativité de "tecnich d'auto".
(4) Ćina che al ne vëgn nia adotè le profil profescional de tecnich d'auto o tecnica d'auto val debojëgn dlungia l'iscriziun tl Register dl comerz cun l'ativité de "carozier", inće dl'iscriziun cun les ativitês de "eletrizist d'auto", "mecanich d'auto" y de "montlist”, por podëi fà les revijiuns periodiches di veicui.
(5) I 24 mëisc de esperiënza profescionala odüs danfora dal articul 29, coma 1, lëtra b) vëgn adatà sce desposiziuns comunitares o statales nöies dess determiné n’atra dorada dl’esperiënza profescionala.
(6) Ales porsones che eserzitëia na profesciun preodüda dal titul II y che é scrites ite tl Register dl comerz canche chësta lege va en forza, ti vëgnel reconesciü i recuisić profescionai che alda laprò . 61)
(6/bis) Ales porsones che al momënt dla jüda en forza dla lege di 28 de messé dl 2016, n. 154, é scrites ite tl Register dles impreses cun l’ativité de "curadú dl vërt", “jardinier”, “sistemaziun de urc y parcs” o “decoradú de urc”, ti vëgnel reconesciü i recuisic profescionai che ti corespogn al’ativité de "curadú dl vërt". Les porsones che s’á scrit ite tl Register dles impreses cun l’ativité de "curadú dl vërt", “jardinier”, “sistemaziun de urc y parcs” o “decoradú de urc”, tl tëmp danter la data de jüda en forza dla lege di 28 de messé dl 2016, n. 154 y la data de jüda en forza de chësta desposiziun, mëss desmostré d’avëi i recuisic profescionai por eserzité l’ativité de "curadú dl vërt" cina ai 30 de setëmber dl 2023, scenó vëgnel straiché l’ativité dal Register dles impreses. Les impreses che é scrites ite tl Register dles impreses canche chësta desposiziun vá en forza cun l’ativité de “jardinier”, “sistemaziun de urc y parcs” o “decoradú de urc” vëgn scrites ite d’ofize cun l’ativité de “curadú dl vërt”. 62)
(7) Tl caje de surantuta dla direziun o dla titolarité de na furnaria é les porsones, che é parentela ćina al terzo degré o parentades tres matrimone te ligna direta cun la porsona che surandà l'aziënda, esonerades dala desmostraziun di recuisić profescionai preodüs dal articul 38 por trëi agn alalungia, pian ia dala jüda en forza de chësta lege.
(8) Les denominaziuns che esist canche chësta lege va en forza vëgn adatades ales desposiziuns preodüdes dai articui 39 y 40 tl tëmp de 180 dis dala jüda en forza dl regolamënt de esecuziun de chësta lege.
(9) Por tlassifiché danü les impreses artejanales scrites ite tl Register dl comerz sciöche impreses artejanales cun ativité artejanala secundara preodüda dal articul 6, coma 3, vëgnel fissé n terminn de 180 dis dala jüda en forza de chësta lege.
(10) Tl tëmp de 30 dis dala jüda en forza de chësta lege ti ortia la Ćiamena dl comerz la lista dles ativitês artejanales scrites ite ala Repartiziun provinziala Artejanat, Industria y Comerz por arjigné la lista preodüda dal articul 9, coma 1.
(11) L’ordinamënt de scoaćiamin en forza preodü dal decret dl Presidënt dla Provinzia di 13 de novëmber dl 2006, n. 62, y mudaziuns suandëntes, vëgn surantut.
(12) 63)
(13) Les iscriziuns tla pröma seziun dl rode de artejans cualificà preodü dal articul 30 dla lege provinziala di 16 de forà dl 1981, n. 3, resta impé.
(14) Dui agn do la jüda en forza de chësta lege ejaminëia la Repartiziun provinziala Artejanat, Industria y Comerz deboriada cun les organisaziuns profescionales plü rapresentatives dla provinzia, les faziuns dla lege y dantadöt dles desposiziuns che definësc les ativitês artejanales y la impresa artejanala.
(15) Les impreses che é scrites ite, canche chësta desposiziun va en forza, tl Register dl comerz sciöche impreses cun l’ativité "tecnich d'auto", vëgn scrites ite d'ofize cun l’ativité “mecatronich/mecatronica d'auto". 64)
(16) Les impreses che é scrites ite, canche chësta desposiziun va en forza, tl Register dl comerz sciöche impreses cun l’ativité "aplicadù/aplicadëssa de aundles artifiziales", vëgn scrites ite d'ofize cun l’ativité "designer dles aundles". 64)
(17) 65)
(18) ) Les impreses che é scrites ite, canche chësta desposiziun vá en forza, tl Register dl comerz sciöche impreses cun l’ativité de "carozier/caroziera", vëgn scrites ite d'ofize cun l’ativité “tecnich carozier/tecnica caroziera". Les impreses che é scrites ite, canche chësta desposiziun vá en forza, tl Register dl comerz sciöche impreses cun l’ativité “mecatronich/mecatronica d'auto", vëgn scrites ite d'ofize cun l’ativité “mecatronich/mecatronica d'auto y montlist/montlista". 66)
(19) Le regolamënt d'esecuziun preodü dal articul 12 vëgn emané te dodesc mëisc dala jüda en forza de chësc coma. 67)
(20) Les impreses che é scrites ite, canche chësta desposiziun vá en forza, tl Register dl comerz sciöche impreses che fej l'ativité de "istaladú/istaladëssa de implanc termosanitars" vëgn scrites ite d'ofize cun l’ativité de “tecnich/tecnica de termosanitars y de ventilaziun". 68)
(21) Les porsones che fej, canche chësta desposiziun vá en forza, la profesciun de "ressanadú/ressanadëssa de ciamins” y é scrites ite cun chësta denominaziun tl Register dl comerz resta scrites ite cun chësta denominaziun. La detlaraziun de conformité pó ma gní scrita fora da n'impresa abilitada por düc i implanc preodüs dal articul 27, coma 1, lëtra c). 69)
(22) Cina ai 31 de dezëmber dl 2022 vëgnel apliché inant i articui 32, coma 1/bis, lëtra b) y 38, coma 1/bis, y mudaziuns suandëntes, tla verjiun varënta dan la jüda en forza dla lege provinziala di 11 de jená dl 2021, n. 1, ales porsones che á frecuenté cina ai 30 de jügn dl 2021 n curs de formaziun por designer dles aundles o produtur/produturia de dlacins preodüs dai articui 31, coma 1, lëtra h) y 37, coma 1, lëtra f). 70)
L'art. 45, coma 6 é gnü mudé insciö dal art. 1, coma 19 dla l.p. di 19 de messè dl 2013, n. 11.
L'art. 45, coma 6/bis é gnü injunté dal art. 33, coma 7 dla l.p. di 24 de setëmber dl 2019, n. 8, y spo él gnü mudé insciö dal art. 23, coma 1 dla l.p. di 23 de messé dl 2021, n. 5.
L'art. 45, coma 12 é gnü abroghè dal art. 1, coma 21 dla l.p. di 19 de messè dl 2013, n. 11.
I comesc 15 y 16 dl art. 45 é gnüs injuntà dal art. 1, coma 20 dla l.p. di 19 de messè dl 2013, n. 11.
L'art. 45, coma 17 é gnü ajunté dal art. 7, coma 2 dla l.p. di 14. de messé dl 2015, n. 8 y dedô él gnü abroghé dal art. 15, coma 1, lëtra e) dla l.p. di 11 de jená dl 2021, n. 1.
L'art. 45, coma 18 é gnü ajunté dal art. 28, coma 5 dla l.p. di 6 de messé dl 2017, n. 8.
L'art. 45, coma 19 é gnü injunté dal art. 33, coma 8 dla l.p. di 24 de setëmber dl 2019, n. 8.
L'art. 45, coma 20 é gnü injunté dal art. 15, coma 5 dla l.p. di 11 de jená dl 2021, n. 1.
L'art. 45, coma 21 é gnü injunté dal art. 15, coma 5 dla l.p. di 11 de jená dl 2021, n. 1.
L'art. 45, coma 22 é gnü ajunté dal art. 23, coma 2 dla l.p. di 23 de messé dl 2021, n. 5.