b) Lege provinziala di 18 de dezëmber dl 2002, n. 151)
Test unich dl ordinamënt di sorvisc cuntra le medefüch y de proteziun zivila

(1) Al vëgn metü sö l'Agenzia por la proteziun zivila, nominada dedô Agenzia. 56) 

(2)  L’Agenzia é n ënt che depënn dla Provinzia de dërt publich cun autonomia organisativa, aministrativa, contabla y patrimoniala. Ara é sotmetüda ala verda dla Junta provinziala y dl assessur competënt.

(3)  L’Agenzia á, sciöche zënter de competënza por la proteziun cuntra le medefüch y la proteziun zivila y i prighi tecnics y naturai, les competënzes sovranes y é sön le teritore provinzial responsabla dla gestiun de düc i prighi coliá. La gestiun di prighi stlüj ite les ativités de previjiun y prevenziun, sciöche ince dötes les ativités che vá debojëgn por ti ester a na situaziun de calamité y conzede o realisé diretamënter la recostruziun de operes y infrastrotöres publiches. L’Agenzia é ince competënta por la conservaziun y la recuperada dla funzionalité ecologica dles eghes.

(4)  L’Agenzia ademplësc sü compic a na moda sostenibla y globala, colaboran cun d’atres strotöres dla Provinzia y dl Stat, les assoziaziuns de volontariat, i comuns, les perts soziales y i sogec interessá.

(5)  L’Agenzia pó colaboré cun d’atri ënc publics y privac, impreses nazionales y internazionales, zëntri de inrescida o sperimentaziun y s’anuzé de sü sorvisc a paiamënt o tres l’avaliaziun dles spëises.

(5/bis)  L’Agenzia pó se cruzié dla formaziun y dl ajornamënt tl cheder dla proteziun zivila. 57)

(6)  Sce al vá debojëgn pó l’Agenzia s’anuzé dles prestaziuns, di sorvisc y dles infrastrotöres dl’aministraziun provinzial.

(7)  Les normes de contabilité por la gestiun dles ressurses finanziaries vëgn stabilides cun regolamënt. 58)

(1) Les entrades dl’Aziënda tol ite:

1. les assegnaziuns a ciaria dl bilanz dla Provinzia por i compic coliá al sorvisc cuntra le medefüch, la proteziun zivila, les costruziuns idrauliches y le desfiramënt di atri compic preodüs dal articul 22;
   
2. les entrades che vëgn da sorvisc a paiamënt fac dal’Agenzia;
   
3. dötes les atres entrades coliades ai compic dl’Agenzia.
   

(2)  Dötes les entrades coliades ai compic dl’Agenzia ti vëgn assegnades diretamënter.

(3)  Les entrades coliades al demane idrich y ala gestiun dles rëis radio dla Provinzia vëgn trates ite dal ofize provinzial competënt.

(4)  L’Agenzia desponn de n so sorvisc de cassa surandé al istitut de credit che fej le sorvisc de tesoreria por la Provinzia.

(5)  La Provinzia pó mëte a desposiziun dl’Agenzia i bëgns imobii che vá debojëgn por desfiré sües ativités. Le patrimone imobiliar romagn a vigni moda dla Provinzia.

(6)  La Provinzia pó ti mëte a desposiziun o dé ca sciöche proprieté al’Agenzia i bëgns mobii che vá debojëgn por desfiré sües ativités, cun lapró i bëgns mobii registá.

(7)  L’Agenzia adora y aministrëia i bëgns imobii y mobii che vá debojëgn por desfiré sües ativités y se crüzia dla manutenziun ordinara y straordinara. Por ci che reverda les sëntes, ti romagn la competënza ala Provinzia y les spëises de gestiun é a ciaria dl bilanz provinzial. 59)

(1) I organs dl’Agenzia é:

1. le diretur;
   
2. le collegium di revisurs di cunc. 60)
   

(1) Le diretur dl’Agenzia vëgn nominé aladô dles desposiziuns varëntes en materia de ordinamënt dl personal provinzial. Al diretur ti vëgnel atribuí la mascima responsabilité dirigenziala por düc i seturs de competënza dl’Agenzia. Süa posiziun iuridica ti corespogn a chëra dl diretur de repartiziun aladô dla lege provinziala di 23 d’aurí dl 1992, n. 10, y mudaziuns suandëntes.

(2)  Le diretur á la rapresentanza legala dl’Agenzia y á, dantadöt, chëstes funziuns:

1. definësc, do avëi aldí i dirigënc competënc, i obietifs anuai dl’Agenzia y controlëia süa atuaziun;
   
2. eserzitëia dötes les funziuns aministratives tles materies de competënza dl’Agenzia, zënza chëres por chëres che al é preodü espressamënter n’atra regolamentaziun;
   
3. conzede dötes les alisiraziuns economiches en materia de sorvisc cuntra le medefüch y proteziun zivila aladô di programs aprová periodicamënter dal assessur competënt o dala assessuria competenta; 61)
   
4. eserzitëia i compic y les funziuns de n diretur de repartiziun por le personal provinzial metü a desposiziun dl’Agenzia y gestësc le personal tut sö dal’Agenzia;
   
5. ti proponn ala Junta provinziala, aladô dl articul 8 dla lege provinziala di 19 de ma dl 2015, n. 6, la dotaziun complessiva di posć dl personal da tó sö tl’Agenzia;
   
6. ti sotmët al’aprovaziun dla Junta provinziala le budget anual, les variaziuns de budget y le bilanz d’eserzize y controlëia süa atuaziun;
   
7. stlüj jö convenziuns y contrac por l’Agenzia y garantësc la realisaziun y l’esecuziun;
   
8. ti sotmët al’aprovaziun dla Junta provinziala düc i programs dles ativités, sciöche ince les mudaziun eventuales di medemi y é responsabla de süa atuaziun;
   
9. é responsabl dl’aministraziun y dla gestiun dl patrimone trasferí o metü a desposiziun dl’Agenzia cun lapró i bëgns demaniai y nominëia sü depositars y sües subdepositars; 62)
   
10. emanëia diretives por le personal tut sö dal’Agenzia tignin cunt dl contrat coletif; 63)
    
11. é responsabl dl’elaboraziun y dl’atuaziun dles strategies dl’Agenzia, da sotmëte al’aprovaziun dl assessur competënt o assessuria competënta; 64)
    
12. é responsabl dl’organisaziun strotorala y prozedörala, cun lapró le flus de informaziuns, y aprovëia le regolamënt intern dl’Agenzia; 65)
    
13. é responsabl dl monitoraje dles ressurses finanziaries y ciara de dötes les ativités coliades dl’Agenzia, sciöche ince de chëres dl responsabl di prozedimënc; 66)
    
14. eserzitëia, por le personal dl’Agenzia, dötes les competënzes, responsabilités y funziuns preodüdes dales normes varëntes en materia de personal; 67)
    
15. se crüzia y coordinëia les relaziuns y la colaboraziun cun les istituziuns nazionales y internazionales tl cheder de competënza dl’Agenzia; 68)
    
16. é responsabl dles relaziuns publiches; 69)
    
17. coordinëia la preparaziun y l’esecuziun de dötes les ativités da realisé te situaziuns de crisa y emergënza daite y defora dal raiun provinzial; 70)
    
18. paia fora n rembursamënt dl dann al stödafüch volontar che s'á fat me o é püre y se crüzia dl rembursamënt di dagns a porsones o cosses dal Sorvisc cuntra le medefüch; 71)
    
19. sotescrí düc i mandac de paiamënt y i ordins d'incasso; 72)
    
20. desponn i prelevamënc dal fonds de resserva; 73)
    
21. adotëia dötes les atres mosöres coliades ala gestiun dl’Agenzia. 74)
    

(3)  Ai laurs, ai sorvisc y ales fornitöres vëgnel apliché les desposiziuns varëntes en materia.

(4)  Sce le diretur n’é nia o ne sciafia nia vëgn sües funziuns eserzitades dal sostitut.

(5)  Le diretur pó ti deleghé funziuns ai dirigënc dl’Agenzia. 75)

(1) La gestiun finanziaria dl’Agenzia é sotmetüda al control dl collegium di revisurs di cunc.

(2)  Le collegium vëgn nominé dala Junta provinziala y é metü adöm da trëi revisurs.

(3)  Da mëte adöm le collegium tëgnon cunt te na mosöra proporzionala dla consistënza di grups linguistics tla provinzia de Balsan. Al mëss ince gní garantí na rapresentanza ecuilibrada de jëne aladô dles normes varëntes.

(4)  I componënc dl collegium romagn en ciaria por trëi agn dala nominaziun cina al’aprovaziun dl bilanz dl ultim eserzize de süa inciaria. Te degun caje ne pól gní superé le limit de trëi mandac indolater.

(5)  Ai componënc dl collegium ti speta, dlungia la retüda dles spëises de misciun, i cosć de presënza preodüs dales normes provinziales varëntes.

(6)  Le collegium di revisurs di cunc:

1. controlëia la gestiun finanziara y patrimoniala dl’Agenzia;
   
2. scrí na relaziun sön le budget anual, sön les variaziuns de budget y sön le bilanz d’eserzize.76)
   

(1) Aladô dl articul 13, comesc 1 y 2, dla lege provinziala di 22 d’otober dl 1993, n. 17, mëss i provedimënc di assessurs y les propostes de deliberaziun sotmetüdes dal’Agenzia al’aprovaziun dla Junta provinziala gní vidimá, aladô dles competënzes y responsabilités, dai dirigënc dl’Agenzia y dal diretur dl ofize provinzial competënt en materia de contabilité aladô dla regolarité contabla. 77)

(1) Al’Agenzia ti vëgnel metü a desposiziun le personal dla Repartiziun Proteziun cuntra le medefüch y proteziun zivila, cun n contingënt de 74 unités a tëmp plëgn, dl Corp di stodafüch de profesciun, cun n contingënt de 149 unités a tëmp plëgn, y dla Repartiziun Costruziuns idrauliches, cun n contingënt de 79,26 unité a tëmp plëgn. I dependënc interessá romagn tl rode general o tl rode spezial dl Corp di stödafüch de profesciun dla Provinzia.

(2)  L’Agenzia surantol döt i lauranti tuc sö cun contrat de dërt privat dal'Aziënda speziala por regolé les eghes y la defenüda dl terac, aladô dl articul 10 dla lege provinziala di 12 de messé 1975, n. 35, y mudaziuns suandëntes, mantignin düc i dërc arjunc y düc i dovëis.

(3)  L’Agenzia pó tó sö personal, ince sajional, por le desfiramënt de sües ativités aziendales.

(4)  Al personal dla Provinzia ti vëgnel apliché les desposiziuns sön l’ordinamënt dl personal provinzial. 78)

(5)  Les spëises por le personal metü a desposiziun dala Provinzia é a ciaria dl bilanz dl’Agenzia. La gestiun de chësc personal vëgn fata dala Repartiziun provinziala competënta en materia. 79)

(1)  Cuntra i ac aministratifs adotá dal diretur dl’Agenzia vëgnel conzedü le recurs ala Junta provinziala, da dé jö, scenó tomel, te carantacin dis dala data dla notificaziun o dla comunicaziun en via aministrativa dl at impugné o da canche la porsona interessada é gnüda alsavëi.  80)

(1) Cun regolamënt vëgnel aprové le Statut dl'Agenzia, che stabilësc: 81)

1. les denominaziuns, l’articolaziun, i compic, les competënzes dla strotöra dirigenziala y aministrativa y les diretives por la strotöra;
   
2. d’atri compic dl’Agenzia;
   
3. i prinzips dla gestiun contabla, aministrativa y tecnico-finanziaria dl’Agenzia. 82)
   

(2) Mudaziuns eventuales dl Statut pó gní aprovades cun deliberaziun dla Junta provinziala. 83)

(1)  Por ademplì i dovëis indicà tl articul 1, coma 5, eserzitëia le Sorvisc di stödafüch les ativitês suandëntes:

1. destodé le medefüch, eserzité sorvisc de suraverda y de control y d’atri sorvisc por la prevenziun cuntra le medefüch;
   
2. eserzité aiüt tecnich, sce al va debojëgn inće sciöche prevenziun, te düć i caji odüs danfora dala lege y dales desposiziuns, pro inzidënć desvalis, pro la tomada de frabicać, pro roes, rogossies, inondaziuns y inće te d’atres situaziuns d’emergënza y te vigni ater caje olache l’intervënt vëgn aratè nezesciar;
   
3. eseguì, te situaziuns d’emergënza y por ademplì i dovëis de proteziun zivila, les desposiziuns de lege y regolamentares dades fora dala Provinzia autonoma de Balsan aladô dl articul 11, numer 14 y dl articul 13 dla lege costituzionala di 26 de forà dl 1948, n. 5.
   

(2)  Le Sorvisc di stödafüch garantësc n sorvisc che cür döt le teritore provinzial y al se sorvësc dles strotöres indicades tl articul 2, coma 3.

(1)  L’intervënt dl Sorvisc di stödafüch é obligatore y debann tan dî che al döra la situaziun d’urgënza o d’emergënza y te vigni caje, ma ćina che i organns tecnics competënć surantol so laûr.

(2)  Constatè l’esistënza o la fin de na situaziun d’urgënza o d’emergënza é na dezijiun sotmetüda al iudize dl comandant o dla comandanta.

(3) Le Sorvisc de segurëza cuntra le medefüch y i intervënć nia urgënć y che va inant inće do la fin dla situaziun d’urgënza o d’emergënza mëss gnì paià sön la basa dles tarifes aprovades dala Junta provinziala. 84)

(4)  I intervënć y le sorvisc preodüs dal coma 3 é d’oblianza ti caji preodüs dala lege y dales normes diretives y é facultatifs te d’atri caji aladô dl iudize dl comandant.

(1)  I Corps di stödafüch fej n sorvisc publich y agësc aladô dl prinzip dl aiüt reziproch. Tan inant che i planns d’alarm pro la Zentrala provinziala d’emergënza ne stabilësc nia val’d’ater mëss i stödafüch antergnì tl raiun local de süa competënza y sön domanda, inće fora de chësc raiun. Te düć i atri caji é so intervënt facultatif.

(2)  Tan inant che al n’é nia gnü concordè val’d’ater surantol le comandant o la comandanta dl Corp di stödafüch de competënza a livel teritorial la direziun dl’intervënt tolon sö la funziun de comandant o comandanta dl intervënt. Düć i Corps di stödafüch che antervëgn por daidé para é sotmetüs a sü ordinns. Sce al manćia le comandant o la comandanta surantol le o la stödafüch cun le degré de sorvisc plü alt la direziun.

(3)  I Corps di stödafüch volontars cun sënta tl comun de Balsan ti sotestà al comandant o ala comandanta dl Corp di stödafüch de profesciun de Balsan indere ma por ći che reverda les operaziuns tecniches d’intervënt.

(4)  Ćina che le Corp di stödafüch competënt a livel teritorial n’é nia sön le post d’intervënt surantol le comandant o la comandanta dl Corp di stödafüch rové adalerch por pröm la direziun.

(5)  Pro intervënć olache al va debojëgn de n’aziun coordinada de de plü Corps di stödafüch tëgn le comandant o la comandanta dl intervënt cunt dla consulënza di comandanć o dles comandantes di atri Corps di stödafüch o di funzionars o dles funzionares dles Uniuns di stödafüch volontars presënć y al o ara po inće deleghè a d’ëi o a d’ëres la direziun.

(6)  Por le medefüch de bosch vëgn la direziun dl intervënt regolada dal articul 26 dla lege provinziala di 21 d’otober dl 1996, n. 21, y mudaziuns suandëntes.

(7)  I funzionars y les funzionares dles Uniuns di stödafüch volontars competënć a livel teritorial o dl Corp di stödafüch de profesciun che é gnü cherdè adalerch dal comandant o dala comandanta po surantó la direziun dl intervënt sce ai l’arata nezesciar.

(8)  Por intervënc de natöra straordinara o particolarmënter prigorusc vëgn la direziun dl intervënt regolada atramënter dal assessur provinzial competënt o dal'assessuria provinziala competënta en materia de proteziun zivila.  85)

(9)  Pro i intervënć y por evité de maius prighi o dagns po le comandant o la comandanta dl intervënt do so iudize comanè de tó les mosöres adatades por se stravardè da majeri dagns cun intlujiun dla demoliziun de frabicać.

(10)  Ti caji indicà tl articul 31, coma 1, sön domanda dl ombolt o dl’ombolta, dl comandant o dla comandanta dl intervënt é vigni porsona obliada a dè aiüt, a mëte a desposiziun atrezadöres, mesi y strotöres; al vëgn ma fat ezeziuns por rajuns iustificades. Les porsones interessades à le dërt de ciafè n’indenisaziun y n rembursamënt dles spëises da pert di comuns tocà. Inzidënć y maraties vëgn despaiades jö aladô dles desposiziuns dl articul 49.  86)

(1)  Chi che va cuntra i dovëis preodüs dal articul 18 y 32, coma 10, de chësta lege mëss paié na straufunga aministrativa che va da 50 a 250 euro aplican les normes de prozedöra preodüdes dala lege provinziala di 7 de jenà dl 1977, n. 9. Sanziuns penales eventuales resta impé.

(1)  L’Agenzia se crüzia dl rembursamënt di dagns gaujá dal Sorvisc di stödafüch preodü dal articul 2, coma 3, intratan l’eserzize de so sorvisc a porsones o cosses nia curis da n’assiguraziun. Chësc ne vel nia por i dagns gaujá dales scuadres di stödafüch aziendales al intern de süa aziënda. 87)

(2) L’Agenzia pó stlü jö polizes d'assiguraziun spezifiches por le sorvisc di stödafüch, sciöche ince por i dagns gaujá ai veicui privac adorá dai stödafüch volontars pro n intervënt y di funzionars dles uniuns raionales di stödafüch volontars tratan i iadi de sorvisc. L’Agenzia ne stlüj nia jö polizes d'assiguraziun por i stödafüch aziendai.  88)

(1)  Les spëises eventuales che vëgn sostignides dai Corps di stödafüch volontars por intervënc te so comun y che ai ne pó nia paié cun i mesi preodüs te so bilanz ti vëgn retüdes da so comun. 89)

(1/bis)  Sce i Corps di stodafüch volontars sostëgn de gragn cosć por intervënc defora da so comun, ti vëgn chisc cosć retüs dal Comun olache al é gnü fat l’intervënt. L’Uniun provinziala di Corps di stödafüch volontars fej fora a öna cun le Consorz di Comuns dla Provinzia de Balsan la soma sura chëra che i cosć vëgn classificá sciöche de gragn cosć. 90)

(2) Por intervënc che comporta de gran spëises y mesi relevanc pó i comuns damané contribuc al’Agenzia; chisc vëgn paiá fora aladô de criters y modalités fac fora dala Junta provinziala.  91)

(3) 92) 

(1) I stödafüch mëss de regola se iestí canche ai é en sorvisc la mondur y i sëgns distintifs de süa cualificaziun de stödafüch y de so degré. Le tai dles mondurs y i sëgns distintifs vëgn fac fora dal assessur provinzial competënt o dal'assessuria provinziala competënta en materia de proteziun zivila sön proposta dl'Uniun provinziala di Corps di stödafüch volontars o dl comandant dl Corp permanënt di stödafüch.   94)

(1)  A condiziun che al vëgnes tut les mosöres de precauziun nezesciares y che al vëgnes osservè les prescriziuns eventuales da fà fora cun l’Agenzia provinziala por l’ ambiënt 95)  à le Sorvisc di stödafüch l’autorisaziun de mëte a jì eserzitaziuns cuntra le medefüch y tecniches, inće desvian da proibiziuns eventuales preodüdes dales normes iuridiches varëntes.

(1)  Le Corp di stödafüch de profesciun á so raiun de competënza y eserzitëia süa ativité primara tl comun de Balsan y vëgn condüt dal punt de odüda tecnich y aministratif dal comandant o dala comandanta dl Corp di stödafüch de profesciun; chë é n funzionar o na funzionara dla Provinzia. 97)

(2)  Tl Corp di stödafüch de profesciun pol inće gnì organisé n sorvisc d’elicoter, de sfunsadù y inće d’atri sorvisc spezialisà, al à na funziun speziala y na gestiun dl bilanz sön la basa dl regolamënt de contabilité y d’organisaziun preodü dal articul 22.

(3) Les spëises por le finanziamënt dl Corp di stödafüch de profesciun, tolon ite ince les atrezadöres, é a ciaria dl bilanz dl’Agenzia y vëgn scrites dant dal Comandant o dala Comandanta dl Corp di stödafüch de profesciun aladô dles modalités stabilides tl regolamënt de contabilité y d’organisaziun. Les assegnaziun finanziares vëgn aprovades dal diretur dl’Agenzia. 98)

(4) La Provinzia mët a desposiziun dl Corp di stödafüch de profesciun casermes di stödafüch y d’atri locai che vá debojëgn por eserzité so sorvisc y se fistidiëia aladô de chësta lege di cosć dl personal. 99)

(5)  Le sorvisc dl Corp di stödafüch de profesciun vëgn partì ite cun regolamënt d’esecuziun te unitês d’organisaziun sot ala direziun de porsones che surantol la responsabilité dl sorvisc. Le comandant o la comandanta dl Corp di stödafüch de profesciun po surandè a chëstes porsones responsables funziuns tecniches sciöche inće aministratives y de gestiun dl personal de süa competënza.

(1)  Le tratamënt iuridich y economich dl personal dl Corp di stödafüch de profesciun vëgn stabilì aladô dl ordinamënt dl personal dla Provinzia.

(2)  Le personal dl Corp di stödafüch de profesciun vëgn incadrè tla “funziun speziala dl Corp di stödafüch de profesciun dla Provinzia”. Ćina che al ne gnarà nia regolè atramënter dales desposiziuns dla Provinzia gnarà le personal dl Corp di stödafüch de profesciun menè en ponsiun cun i medemi agn de sorvisc preodüs por i posć corespognënć o analogs ocupà dal personal dl Corp nazional di stödafüch.

(3)  Por ći che reverda i posć dà sö aposta, sön domanda y do na tuta de posiziun dl comandant o dla comandanta, po le personal dl Corp di stödafüch de profesciun che n’é nia plü adatè ales inćiaries dla funziun eserzitada ćina a chël momënt, gnì mantignì en sorvisc pro le Corp di stödafüch de profesciun por ademplì d´atres funziuns a sorvisc dl Corp di stödafüch de profesciun.

(4)  Le personal preodü dal coma 3, che resta en ćiaria sce al é nezesciar inće te n numer surafora, vëgn incadrè te na cualifica funzionala corespognënta; al eserzitëia funziuns adeguades a sües capazitês y ciafa n paiamënt almanco de tan che al davagnâ tl livel funzional da denant. Le medemo personal ciafa inant l’indenité dl sorvisc di stödafüch sciöche indenité personala. Te vigni caje tómel dötes les atres indenitês o i atri compënsc che é lià a inćiaries operatives particolares dl personal che fej pert dla funziun speziala dl Corp di stödafüch de profesciun dla Provinzia.

(5)  Por le personal che aladô dl articul 3 dla lege regionala di 2 de setëmber dl 1978, n. 17, é passè dala Regiun Trentin-Südtirol ala Provinzia autonoma de Balsan y che aladô dla lege provinziala di 3 de agost dl 1983, n. 28, é incadrè tles funziuns provinziales vëgnel tut en conscidraziun, por calcolè la indenisaziun a contlujiun dl raport de laûr, aladô dles normes dla Provinzia, le tëmp de sorvisc pro la Regiun y les periodes reconesciüdes por chësta rajun dala Regiun instëssa aladô dl articul 5 dla lege regionala di 21 de jügn dl 1967, n. 6, remplazè dal articul 24 dla lege regionala di 26 d’aurì dl 1972, n. 10; al vëgn trat jö imporć che po ester é bele gnüs paià fora dal’aministraziun regionala.

(6)  Aladô dles normes iuridiches dl stat relatives eserzitëia le personal che fej pert dla funziun speziala dl Corp di stödafüch de profesciun dla Provinzia les inćiaries d’agënt o agënta y d’ofizier o ofiziera de polizia iudiziara y ciafa na tessera de reconescimënt aposta.

(7)  Implü à le personal dl Corp di stödafüch de profesciun tles materies de competënza dla Provinzia chës funziuns y inćiaries, che ti vëgn assegnades a livel statal al Corp nazional di stödafüch, sce al ne vëgn nia regolamentè atramënter dala Provinzia.

(8)  Le personal dles funziuns speziales dl Corp di stödafüch de profesciun dla Provinzia ne po nia ester ocupé a tëmp parzial.

(9) 100)

(1) ) Le sorvisc dl Corp di stödafüch de profesciun é presidié dal comandant o dala comandanta dl Corp di stödafüch de profesciun che surantol les funziuns aministratives, tecniches y de gestiun dl personal de competënza dla direziun de repartiziun aladô dles desposiziuns provinziales varëntes, cun esclujiun dles competënzes resservades espressivamënter a d’atri organs. Al á ince les competënzes surandades da chësta lege en materia de sorvisc cuntra le medefüch y proteziun zivila. 101)

(2)  Le vizecomandant o la vizecomandanta dl Corp di stödafüch de profesciun sostituësc le comandant o la comandanta tl caje d’assënza o impedimënt y surantol les inćiaries che ti é gnüdes surandades dal comandant o dala comandanta.

(1)  Le comandant o la comandanta y le vizecomandant o la vizecomandanta dl Corp di stödafüch de profesciun vëgn nominà dala Junta provinziala por la dorada de cater agn, fora che sce al ti vëgn renovè l’inćiaria, sön proposta dl assessur competënt o dl’assessuria competënta por le Corp di stödafüch de profesciun.

(2)  Por arjunje la cualifica de comandant o comandanta dl Corp di stödafüch de profesciun mëssel gnì ademplì chëstes condiziuns: tó ite la cualifica de diretur o direturia tla proteziun cuntra le medefüch, o dui agn de sorvisc efetif tla funziun de vizecomandant o vizecomandanta dl Corp di stödafüch de profesciun, o dui agn de sorvisc efetif sciöche espert superiur o esperta superiura tla proteziun cuntra le medefüch tla funziun speziala dl Corp di stödafüch de profesciun dla Provinzia. 102)

(3)  Por arjunje la cualifica de vizecomandant o vizecomandanta dl Corp di stödafüch de profesciun mëssel gnì ademplì chëstes condiziuns: tó ite la cualifica de diretur o direturia tla proteziun cuntra le medefüch o de espert superiur o esperta superiura tla proteziun cuntra le medefüch, o cater agn de sorvisc efetif sciöche espert o esperta tla proteziun cuntra le medefüch, o ot agn de sorvisc efetif tla cualifica de ispetur o ispeturia cuntra le medefüch dla funziun speziala dl Corp di stödafüch de profesciun dla Provinzia. Por le personal tla posiziun de ispetur o ispeturia cuntra le medefüch vëgnel implü damanè le titul de stüde y l’abilitaziun profescionala odüs danfora por la funziun de espert o esperta tla proteziun cuntra le medefüch dla funziun speziala dl Corp di stödafüch de profesciun dla Provinzia. 102)

(4)  Le comandant o la comandanta y le vizecomandant o la vizecomandanta dl Corp di stödafüch de profesciun po tó ite la direziun de ofizi dl’aministraziun provinziala tan inant che ai o ares é en possès dles condiziuns profescionales damanades. Le comandant o la comandanta dl Corp di stödafüch de profesciun po do cater agn de sorvisc te chësta funziun tó pert ales prozedöres de seleziun por la nominaziun di direturs o dles direturies de repartiziun tl ćiamp dl’aministraziun provinziala.

(1)  Dlungia i dovëis generai dl sorvisc di stödafüch ademplësc le Corp di stödafüch de profesciun les funziuns suandëntes:

1. le sorvisc cuntra le medefüch pro l’aeroport zivil de Balsan aladô dles normes statales y internazionales tl ćiamp dla segurëza ti aeroporć. Les modalitês y les condiziuns dl sorvisc mëss gnì concordades cun na convenziun aposta da stlüje jö cun la porsona che manajëia l’aeroport; ares mëss ester analoghes a chëres stabilides dales normes iuridiches statales por i aeroporć nazionai dla medema categoria;
   
2. le sorvisc tecnich por stravardè les porsones da prighi che deröia dal’adoranza dl’energia nucleara;
   
3. le sorvisc permanënt de control y de valutaziun dles situaziuns de prigo che podess gaujé situaziuns d’emergënza eventuales;
   
4. les funziuns de polizia iudiziara y aministrativa en relaziun ales competënzes dl sorvisc cuntra le medefüch por ciafè fora y ejaminé les gaujes de medefüch. Por l’eserzize de so sorvisc ti vëgnel atribuì al personal dla funziun speziala dl Corp di stödafüch de profesciun dla Provinzia la cualifica de agënt o agënta o de ofizier o ofiziera de polizia iudiziara. Le personal ciafa tesseres de reconescimënt;
   
5. sce al n’é nia n’atra regolamentaziun provinziala, eseguëscel les prescriziuns che vëgn dades fora dai organns statai competënć te materies che n’é nia de competënza dla Regiun o dla Provinzia mo che é liades al sorvisc cuntra le medefüch y antervëgn te chi caji olache la lege assegnëia funziuns al Corp nazional di stödafüch;
   
6. al dà jö arać preventifs sön proieć de condütes dal’ega, dà prescriziuns por ći che reverda le refornimënt dl’ega da destodé n medefüch y fej inće de chësc vers controi;
   
7. al é por dërt mëmber dla Comisciun por le frabiché dl capolüch dla Provinzia autonoma de Balsan;
   
8. al po ti scrì dant ai titolars o ales titolares de ativitês che é sotmetüdes ala prevenziun cuntra le medefüch de mëte jö planns d’intervënt por i stödafüch tl comun capolüch dla Provinzia y colaborëia tla redaziun di planns d’intervënt por raiuns particolars o situaziuns particolarmënter a risch de medefüch. 103)
   
9. 104)
   

(2) Le Corp di stödafüch pó ince pité le sorvisc de destödafüch pro l’aeroport zivil de Balsan aladô dles formes y dles manires scrites dant dales normes dl’Uniun europeica sön la segurëza di aeroporc. Les modalités y les condiziuns de fornidöra dl sorvisc é da fá fora cun na convenziun aposta da stü jö cun le gestur dl aeroport. 105)

(1) I laurs, les acuisiziuns y i sorvisc ademplis dal Corp di stödafüch de profesciun vëgn fac de regola en economia tres le comandant o la comandanta o tres n’atra porsona da ël o ëra delegada tl cheder dl program di investimënc y di mesi finanziars autorisá dal’Agenzia o dala Junta provinziala.106)

(2) Le comandant o la comandanta dl Corp di stödafüch de profesciun o na porsona da ël o ëra delegada á la funziun de conservatar responsabl o de conservatara responsabla che inventarisëia i bëgns mobii che le Corp di stödafüch de profesciun á cumpré cun i fonds aministrá dal’Agenzia. I bëgns assegná o cumprá cun i fonds dl bilanz provinzial vëgn ince scric ite tl inventar dl Corp di stödafüch de profesciun. Na fotocopia di inventars y di ajornamënc vëgn dada jö pro le secretariat dl’Agenzia y pro l’Ofize patrimone dla Provinzia. 107)

(3)  La porsona che à la inćiaria de conservatar po nominé sotconservatars o sotconservatares; a chisc o a chëstes ti vëgnel afidé i bëgns di stödafüch de profesciun.

(4)  La gestiun di laûrs y dles acuisiziuns en economia y la gestiun dl inventar vëgn regolades cun regolamënt en materia de contabilité y d’organisaziun preodü dal articul 22.

(1)  L’ativité di stödafüch é volontara y onorara y ne vëgn nia fata sciöche raport de laûr o te vigni caje nia sciöche colauraziun de laûr.

(2)  I Corps di stödafüch volontars y sües Uniuns s’orientëia ai prinzips d’autonomia de gestiun y aministraziun, de sostëgn, de tradiziun y inće de artëgn reziproch.

(3)  I Corps di stödafüch volontars y sües Uniuns eserzitëia süa ativité respetan les normes varëntes, les diretives y i statuć interns. Ai ti sotestà a livel comunal al ombolt o al’ombolta, a livel raional y provinzial ti sotestai ales istruziuns y al control dl Presidënt dla Provinzia o dl assessur competënt o dl’assessuria competënta.

(4)  Intratan l’esecuziun dl sorvisc, tolon ite inće chël a paiamënt, ne respogn i o les stödafüch, y en particolar le comandant o la comandanta dl intervënt, nia personalmënter por dagns a porsones o cosses.

(1) Tut fora d’atres desposiziuns revardëntes le Corp di stödafüch de profesciun por le capolüch dla Provinzia é vigni aministraziun comunala responsabla te so raiun comunal dl sorvisc de stödafüch che é da regolè sön la basa dles desposiziuns de chësta lege y dles diretives dades fora dal assessur provinzial competënt en materia de proteziun cuntra le medefüch y proteziun zivila. 108)

(2)  Le Consëi de comun po dè fora regolamënć por se stravardè dal prigo da medefüch y scrî dant de mëte jö planns d’intervënt por i stödafüch. Sce l’ombolt o l’ombolta vëiga ite la nezescité y l’urgënza por l’utilité publica mëssel gnì tut i provedimënć adeguà por stravardè la popolaziun dal prigo da medefüch y da catastrofes publiches.

(3) Vigni comun mët sö, do avëi aldí l’Uniun raionala di stödafüch volontars y l'assessur provinzial competënt o l'assessuria provinziala competënta en materia de proteziun zivila, almanco un o plü corps di stödafüch volontars aladô dl numer di abitanc y dla nezescité dl post. Le comun stabilësc le raiun de competënza di singui corps di stödafüch y le numer minim de stödafüch.  109)

(4)  Le statut di Corps di stödafüch volontars vëgn elaborè dal’Uniun provinziala di Corps di stödafüch volontars en colauraziun cun le Consorz di comuns y vëgn aprovè cun decret dl Presidënt dla Provinzia; al vel por düć i Corps di stödafüch volontars y contëgn normes internes por l’organisaziun y por l’eserzize dl Sorvisc cuntra le medefüch.

(5)  Sce ara ne va nia da mëte sö a livel comunal n Corp di stödafüch volontars él poscibl afidé, tres na convenziun aposta, le sorvisc cuntra le medefüch a n Corp de n comun vijin.

(6) Le sorvisc cuntra le medefüch vëgn fat diretamënter dal Corp o dai Corps di stödafüch volontars y funzionëia, a desfarënzia de d’atri sorvisc comunai, a livel aministratif y finanziar te na forma autonoma. La gestiun economich-finanziara vëgn disciplinada tl regolamënt d’esecuziun dl ordinamënt di sorvisc cuntra le medefüch y dla proteziun zivila. 110)

(7)  Sce pro n Corp di stödafüch volontars vëgnel dant iregolaritês agravantes spo po le consëi de comun, do avëi aldì l’ombolt o l’ombolta y l’Uniun raionala di Corps di stödafüch volontars, despone la scomposiziun dl Corp di stödafüch volontars.

(1)  Le comandant o la comandanta y le vizecomandant o la vizecomandanta dl Corp di stödafüch volontars vëgn proponüs dal Corp instës y nominà dal ombolt o dal’ombolta. La proposta vëgn fata tres na lîta da pert di mëmbri atifs dl Corp di stödafüch volontars tignin cunt dl’idoneité y dla partezipaziun ai cursc d’adestramënt preodüs dala Scora di stödafüch provinziala. Tl caje de gran violaziuns di dovëis d’ofize po le consëi de comun trà zoruch cun na deliberaziun iustificada les funziuns de comandant o comandanta y de vizecomandant o de vizecomandanta dl Corp di stödafüch volontars.

(2)  Le comandant o la comandanta dl Corp di stödafüch volontars fej pert por dërt dla comisciun por le frabiché y olache ara esist dla comisciun cuntra le medefüch dl comun respetif y inće dl zënter operatif comunal. Sce al esist tl medemo comun plü Corps di stödafüch volontars spo po n comandant deleghè o na comandanta delegada o le comandant competënt o la comandanta competënta te chël raiun fà pert dles comisciuns nominades chilò dessura.

(1)  Tl caje de mort o invalidité temporana o por dagnora, porvia de n inzidënt sozedü o na maratia trata pro intratan le sorvisc de stödafüch o porvia dl sorvisc, ti paia l’Agenzia, sön la basa di criters determiná cun decret dl diretur dl’Agenzia, che é da publiché sön la tofla ofiziala online dl’Agenzia, n’indenisaziun ai interessá definis ti criters nominá dessura.   112)

(2)  La soma paiada ne vel nia sciöche tratamënt economich por maratia o inzidënt y é acomulabla cun les formes desvalies, volontares o obligatories, de previdënza o assistënza economica a chëres che ara vëgn injuntada.

(3) I imporć paià ne po nia ester mëndri di imporć che vëgn paià dal Istitut Nazional por l’Assiguraziun cuntra i Inzidënć sön le Laûr. 113)

(4)  Por podëi fà pert dl sorvisc atif di stödafüch adora düć i mëmbri dl Corp di stödafüch n zertificat de idoneité dl dotur; por podëi eserzité ativitês particolarmënter prigoroses sciöche l’adoranza de mascheres de respiraziun o cosses analoghes vëgnel scrit dant na vijita da n dotur spezialisé o da na doturia spezialisada inće cun analises de laboratore y/o analises stromentales.

(5)  Les porsones indicades ti articui 18 y 32, coma 10, é parificades ai mëmbri di stödafüch.

(6) De gran pordüdes de davagn o de paiamënt coliades a intervënc ti vëgn rembursades, sön domanda dla porsona interessada, ai stödafüch volontars dal comun y ai funzionars o ales funzionares dles uniuns preodüdes dal articul 2, coma 3, dal’Agenzia. Te chësc ultimo caje vëgn le rembursamënt fat aladô di criters y dles modalités determiná dala Junta provinziala.  114)

(1) Le comun mët a desposiziun di Corps di stödafüch volontars i locai adatà por che ai pois eserzité so sorvisc cuntra le medefüch te na manira adeguada, al se crüzia dl’istalaziun y dla manutenziun di idranć de strada, dl refornimënt dl’ega plü adatè ales nezescitês locales y inće d’arjigné ite implanć d’alarm en conformité ales normes diretives dades fora dala Junta provinziala. Por chësc fin po les aministraziuns de comun damanè alisiraziuns y contribuć odüs danfora da chësta lege y dales normes dla Provinzia. 115)

(2)  Tut fora desposiziuns desfarëntes, é düć i cosć nezesciars por l’ativité dl Corp di stödafüch volontars a ćiaria dl comun; al surantol inće les spëises por l’acuisiziun y la manutenziun dles atrezadöres y dl echipamënt.

(3)  Pro l’emisciun de conzesciuns, reconescimënć y renovamënć di dërć por l’utilisaziun d’eghes publiches mëssel gnì garantì la cuantité d’ega nezesciara por les operaziuns cuntra le medefüch.

(4)  Sön dötes les contestaziuns che vëgn fates por gauja dles spëises albüdes pro intervënć, che chësta lege mët a ćiaria di comuns o de privać, tol na dezijiun la Junta provinziala sön tru aministratif.

(5)  La partezipaziun al finanziamënt dles spëises ordinares di bilanc di Corps di stödafüch volontars istituida aladô dl articul 1 dla lege regionala di 14 de jenà dl 1978, n. 1, vëgn tuta jö y porchël resta les spëises ordinares che va sura les entrades ordinares fora a ćiaria dles aministraziuns de comun competëntes por le raiun.

(6)  I bilanc di singui Corps di stödafüch volontars che vëgn elaborà dai comandanć y dales comandantes vëgn aprovà dal consëi de comun competënt. Cun l’aprovaziun di bilanc aprovëia i comuns inće le finanziamënt dles spëises che é odüdes danfora por le consum, la manutenziun y inće por la sostituziun d’atrezadöres y dl echipamënt di Corps di stödafüch volontars.

(1) Le diretur dl'Agenzia pó, do avëi ciafé l’aprovaziun di programs dal assessur competënt, conzede chisc contribuc, sostëgns y finanziamënc: 117)

1. ai Corps di stödafüch volontars ti pol gnì conzedü contribuć por investiziuns ćina al 80 por cënt dles spëises reconesciüdes por l’acuisiziun y la manutenziun straordinara di injins en dotaziun; les atrezadöres cuntra sostanzes prigoroses y inće les atrezadöres speziales di singui punć de sostëgn raionai po gnì finanziades ćina al 100 por cënt;
   
2. al’Uniun provinziala di Corps di stödafüch volontars, ales Uniuns raionales di Corps di stödafüch volontars, ala Scora di stödafüch provinziala y ales sozietês cooperatives cun responsabilité limitada di Corps di stödafüch volontars ti pol gnì conzedü finanziamënć ćina al 100 por cënt dles spëises ordinares y straordinares sön presentaziun dl preventif dla spëisa;
   
3. ales Uniuns raionales y ai Corps di stödafüch volontars ti pol gnì conzedü sostëgns por la gestiun y manutenziun ordinara dles atrezadöres di punć de sostëgn raionai. 118)
   

(2)  Ai Corps di stödafüch volontars che à so raiun de competënza te na zona incadrada sciöche zona dejavantajada aladô dl regolamënt dla CEE n. 1257/99, y mudaziuns suandëntes, po les limitaziuns dl contribut preodü dal coma 1, lëtra a), gnì alzà dl 10 por cënt dles spëises reconesciüdes.

(3) 119)

(1)  Por garantì le coordinamënt y l’organisaziun dl sorvisc, por promöie le spirit de solidarieté, por aumentè l’interès general se mët adöm i Corps di stödafüch volontars te Uniuns raionales y tl’Uniun provinziala. Al é poscibl costituì na sozieté cooperativa.

(2)  Les modalitês d’istituziun, i organns, les competënzes dles singules strotöres y süa organisaziun vëgn stabilis tl statut respetif che vëgn elaborè dal’Uniun provinziala y aprovè cun decret dl Presidënt dla Provinzia.

(3)  La lîta di funzionars y dles funzionares dles Uniuns raionales y dl’Uniun provinziala vëgn fata aladô dl statut y la nominaziun vëgn fata dal Presidënt dla Provinzia o dal assessur competënt/dala assessuria competënta. Tl caje de de gran violaziuns di dovëis d’ofize po la Junta provinziala revochè cun deliberaziun motivada les funziuns di funzionars y dles funzionares dl’Uniun provinziala y dles Uniuns raionales. 120) 

(4)  Tl caje de bojëgn y sce al vëgn fora emergënzes che reverda de plü comuns coordinëia i presidënc o les presidëntes dles Uniuns raionales o les porsones delegades da d'ëi les ativités de socurs y pröm aiüt; por chësc fin pói consulté d'atri funzionars o funzionares, tecnics o tecniches dl'aministraziun provinziala o statala y porsones espertes competëntes ti scenars de risch desvalis. Tl cheder dl eserzize de chësta ativité coordinëia i presidënc o les presidëntes dles Uniuns raionales o les porsones delegades da d'ëi le personal, i mesi y les atrezadöres a desposiziun tl raiun. Ai ti mëna inant les domandes d'aiüt al Zënter operatif provinzial o al'aministraziun provinziala o statala y fej, en general da coliamënt costant cun le Zënter operatif provinzial. 121)

(5)  Les ativités de socurs di Corps di stödafüch volontars defora dala provinzia de Balsan vëgn coordinades dal’Uniun provinziala di Corps di stödafüch volontars, do avëi ciafé l’autorisaziun dal assessur provinzial competënt o dal’assessuria provinziala competënta. Les spëises sostignides en ocajiun di iadi da jí y gní dal post d’intervënt amiscibles por la retüda aladô dl articul 40, comesc 1 y 5 dl decret legislatif di 2 de jena dl 2018, n. 1, y mudaziuns suandëntes, é a ciaria dl’Uniun provinziala di Corps di stödafüch volontars. 122)

(1) La Junta provinziala stabilësc ći aziëndes, industries, magazinns y frabicać analogs che mëss avëi n so sorvisc de prevenziun dal medefüch y d’intervënt, la mosöra minima de chësc sorvisc, les carateristiches di implanć y di materiai y tan de mëmbri di stödafüch che mëss ester tresfora presënć tl’aziënda intratan i orars de laûr. I cosć relatifs é a ćiaria dl’aziënda. 123)

(2) Les scuadres é metüdes adöm dal personal dependënt dl stabilimënt che é adatè al sorvisc cuntra le medefüch. Ares depënn dal datur de laûr o dala daturia de laûr che à la responsabilité dan dal Comandant dl Corp permanënt di stödafüch, che fej le control tecnich. L'istruziun tecnica po gnì fata dala Scora di stödafüch provinziala preodüda dal articul 55. 124)

(3)  Pro intervënć particolarmënter ris vel le prinzip d’aiüt y de sostëgn reziproch preodü dal articul 32; porchël po le comandant o la comandanta dl intervënt o l’ombolt o l’ombolta damanè l’intervënt dles scuadres di stödafüch aziendales inće defora dal’aziënda. Les spëises relatives é te chësc caje a ćiaria dl comun olache al é stè l’intervënt. Al vëgn inće apliché l’articul 49, comes 1, 2 y 3.

(1)  La Junta provinziala é autorisada a inćiarié l’Uniun provinziala di Corps di stödafüch volontars o n ater ënt adatè ala gestiun dla Scora di stödafüch provinziala che organisëia y tëgn cursc de formaziun teoretics y pratics por i comëmbri di Corps di stödafüch.

(2)  La formaziun pó inće tó ite tëmps de formaziun te d’atres istituziuns, d’atres scores y d’atri zëntri de formaziun tla provinzia o foradecá. Chësta formaziun pó gní finanziada cina al 100 porcënt dala Scora provinziala di stödafüch.  125)

(3)  La Scora di stödafüch provinziala po inće tignì cursc cuntra le medefüch y de proteziun zivila y cursc de segurëza sön le laûr ti ćiamps desvalis preodüs dales leges varëntes en materia. 126)

(4)  Por les ativitês preodüdes dai comes 1, 2 y 3 é la Scora di stödafüch provinziala reconesciüda sciöche scora adatada a tignì les ativitês de formaziun aladô de chësta lege.

(5)  La Scora di stödafüch provinziala relascia zertificać de frecuënza y, do avëi dè jö i ejams, inće diploms legalmënter varënć.

(6)  La formaziun tla Scora provinziala di stödafüch é debann por i volontars y les volontares dles organisaziuns de sorvisc cuntra le medefüch y de proteziun zivila. 127)

(7) L’Agenzia se fistidiëia, do avëi ciafé l’autorisaziun dl assessur competënt, da finanzié i cursc de formaziun y controlëia süa realisaziun regolara. La Junta provinziala pó autorisé le desfiramënt de cursc a paiamënt, definësc les tarifes y stabilësc l'adoranza dl comples imobiliar, fissan les tarifes eventuales. 128) 

(8)  Por l’ativité de formaziun dla Scora di stödafüch provinziala á l’ënt inciarié le dërt de rembursamënt dles spëises che ti corespogn al preventif aprové dal assessur provinzial competënt o dal'assessuria provinziala competënta en materia de proteziun zivila. Tl tëmp de 30 dis dal mëteman dl ann de scora inant ti vëgnel dé al ënt inciarié n’antizipaziun dl 40 por cënt dl preventif de spëisa aprové. N’atra antizipaziun dl 30 por cënt vëgn conzedüda do sis mëisc. La licuidaziun dl import che resta gnará fata do la presentaziun dl cunt consuntif regolar che mëss gní aprové dal Agenzia. 129)

(9) Le program y le preventif dles spëises mëss gní presenté al'Agenzia cina al pröm de otober dl ann denant.   130) 

(10)  Por tignì les ativitês dla Scora di stödafüch provinziala y dles Uniuns di Corps di stödafüch volontars preodüs dal articul 2, coma 3, vëgnel metü debann a desposiziun dl ënt inćiarié i imobii cumprà por chësc fin dala Provinzia autonoma de Balsan.

(11)  La manutenziun ordinara dles strotöres aladô dl coma 10 ti speta al ënt inćiarié; la manutenziun straordinara y dötes les spëises che deröia dal’aplicaziun dl decret legislatif di 19 de setëmber dl 1994, n. 626, é a ćiaria dl bilanz dla Provinzia; i laûrs po gnì fać dal ënt inćiarié y les spëises albüdes ti gnarà retüdes.