f) Lege Provinziala di 18 de merz dl 2002, n. 61)
Normes sun la comunicazions y mesures tl ciamp dla radiodifujion

(1)La cumpensazions finanzieres ie cunzedudes a emitëntes radiotelevisives locales y a portai de nfurmazion online che realisea, lascia realisé o che trasmët cuntenuc da pudëi sustenì. Nia tlo leprò ne ie la emitëntes y i portai che

1. pervia de cuntenuc devulghei da d’ëi ie da raté sciche reprejentanc de grupes de nteres coche partic politics, urganisazions prufesciuneles, sindacheles o religëuses o che ne curespuend nia ala linia di prinzips y i fins dl articul 1;
   
2. ne respetea nia la normes sun la defendura di dërc dla infanzia y dl’adolescënza;
   
3. ne à nia respetà normes de basa dla legislazion n forza tla materia dl lëur, dla chëutes y di mesuns de nfurmazion;
   
4. à pruzedures de cuncordat preventif o de falimënt pendëntes;
   
5. devulghea dantaldut cuntenuc liëi al cumerz eletronich, ala televendudes, ala urganisazion de juesc a pesć, a sponsorisazions y ativiteies promozioneles o a ativiteies cumerzieles semientes.
   

(2) La esclujion ie delibereda dala Jonta provinziela do avëi audì la minonga dla Cumiscion.

(3) La Jonta provinziela definea cun deliberazion, che ie da publiché tl Buletin Ufiziel dla Region, i criteres y la manieres per la cunzescion dla cumpensazions finanzieres tenian cont de chisc aspec:

1. per la emitëntes radiotelevisives: i indesc de audida sun l teritore provinziel, determinei sun la basa di relevamënc che l Istitut provinziel de statistica fej periodicamënter y do avëi audì l’assoziazion de categoria plu reprejentativa dla emitëntes;
   
2. per i portai de nfurmazion online: i azesc o d’autri indicatores ogetifs per determiné l numer de azesc sun l teritore provinziel;
   
3. cosć de produzion y de defujion di cuntenuc da pudëi sustenì.
   

(4) Tla deliberazion nunzieda tl coma 3 vëniel determinà i cosć lascei pro a cumpensazion y stabilì duc i autri criteres ogetifs y sogetifs, per azeder al sustëni per l calcul curespundënt y la licuidazion curespundënta, cun la puscibltà de definì na defrenziazion di sustenimënc n basa ala sort di mesuns de nfurmazion y de preudëi nce cuntribuc de basa minims.

(5) La Provinzia autonoma de Bulsan recunësc la mpurtanza zentrela dla descuscion publica per la furmazion democratica dla minonga. Per schivé che l vënie, cun i cuntribuc cunzedui aldò de chësta lege, finanzià portai online ti forums de chëi che l vën publicà cumënc cun cuntenuc de relevanza penala, ufendënc, descriminënc o per d’autra rejons nia azetabli, y per purté pro a chësta maniera a miuré l livel dla descuscion, vëniel cunzedù cumpensazions finanzieres mé ai portai de nfurmazion online che ublieia si utënc per la partezipazion ai forums ala criazion de n cont utënc persunel nia trasferibl y prutejà da na password y che ti comunichea ala Cumiscion l inuem de na persona respunsabla di forums. La Jonta provinziela comunichea cun na si delibera, do avëi audì la Cumiscion, la normes d’atuazion che vën publichedes sun l Buletin Ufiziel dla Region. La Jonta provinziela possa udëi danora tl particuler cumpensazions finanzieres per la moderazion redaziunela di forums, per la istituzion de garanc y per l’aplicazion de sistems de criptografia per i conc di utënc. 21)