(1)La comunicazion istituzionela dla Provinzia autonoma de Bulsan y de si ënc se dejëuj tres canai de nfurmazion adatei. Tl respet dla despusizions tla materia de apalc publics sëurandà la Provinzia y i ënc che depënd da d’ëila ncëries per la realisazion de servijes de stampa, de nfurmazion y de redazion o per la devulgazion de chësta nfurmazions al publich. La comunicazion istituzionela vën fata tres la forma mediatica che ie da cajo a cajo plu adateda ala grupa de travert, tenian cont dl prinzip dla destribuzion balanzeda y valiva dla ncëries y tulan n cunscidrazion a na maniera particulera la pitla y scialdi pitla mprejes aldò dl dërt dla Union europeica y aldò dla destribuzion teritoriela, dla rujenedes dla provinzia sciche nce dla copies vendudes o partides ora. 9)
(2) Per realisé i fins nunziei tl articul 1 possa la Provinzia autonoma de Bulsan stipulé cunvenzions cun ënc radiotelevisifs, nce chëi nunziei tl articul 10 dl decret dl Presidënt dla Republica di prim de nuvëmber 1973, n. 691, cun zaites y revistes y cun portai online che à per oget la produzion de documentazions de valor particuler y de servijes y trasmiscions d’atualità de nteres provinziel. I dërc de nuzeda y de defujion de chësta produzion ie dla Provinzia.
(3) La Provinzia possa stipulé cunvenzions o cuntrac cun la cunzesciunera dl servisc publich radiotelevisif, acioche l servisc arjonje, sun dut l teritore provinziel, l livel de curidura preudù tl cuntrat de servisc nunzià tl articul 3 dla cunvenzion danter l Minister dla Postes y Telecomunicazions y la Rai, apurvà cun decret dl Presidënt dla Republica di 28 de merz 1994. 10)
