(1)Per pudëi dejëujer l’ativiteies ndichedes te chësta lege o te d’autra leges o fissedes dala Jonta provinziela vëniel istituì pra l Cunsëi provinziel la Cumiscion provinziela per la comunicazions, da tlo inant tlameda Cumiscion. La ie metuda adum da sies persones espertes tl ciamp dla comunicazion, dla nfurmazion, dla telecomunicazions y dla multimedialità. 4)
(2)La Cumiscion ie metuda adum dal Presidënt/dala Presidënta y dal Vizepresidënt/dala Vizepresidënta, che muessa fé pert de grupes linguistiches defrëntes y che vën numinei dala Jonta provinziela tl scumenciamënt d’uni legislatura, y da mo cater cumëmbri litei cun vela sucrëta dal Cunsëi provinziel. Uni cunselier/cunseliera possa dé ju de ndut al plu trëi preferënzes. La cumposizion dla Cumiscion muessa vester n raport ala cunsistënza dla grupes linguistiches aldò dl'ultima cumpededa generela dla populazion; la reprejentanza dla grupa linguistica ladina muessa vester segureda. Un n cumponënt/Una na cumponënta dla Cumiscion à da unì lità/liteda sun pruposta dla mendranza politica. I cumponënc/La cumponëntes dla Cumiscion ne possa nia resté tla ncëria per plu che doi legislatures. 5)
(3) Da secreter fej n dependënt dl Cunsëi provinziel che muessa vester almanco tla sesta cualifica funzionela.
(4) Per la partezipazion ala sentedes ti spieta ai cumëmbri dla Cumiscion chëi cumpënsc y chëla ndeniteies che ie a cëria dl bilanz dl Cunsëi provinziel aldò dla lege provinziela dl 19 de merz 1991, n. 6, y mudazions, per i cumëmbri dla cumiscions cun na funzion autonóma de relevanza oravier. A d'ëi ti spieta, oradechël, chëla ndenità de miscion ududa danora per l personal dla provinzia dala lege provinziela inant nunzieda.
(5) Al presidënt dla Cumiscion ti spieta uni mëns n cumpëns valif a chël determinà dala Jonta provinziela aldò dl articul 1/bis dla lege provinziela dl 19 de merz 1991, n. 6, njuntà dal articul 11 dla lege provinziela dl 11 d'agost dl 1994, n.6, per i presidënc - che ne fej nia pert dl'aministrazion provinziela - di ënc, di istituc y dl'aziendes cun urdinamënt autonóm dependënc dal'aministrazion provinziela.
(6) Tl cajo che la natura spezifica di temes da traté se l damanda, possa uní nviei ala sentedes dla Cumiscion nce esperc cun stima mé consultiva. Per la partezipazion ala sentedes ti spieta a chisc la medema ndeniteies, che ie ududes danora per i cumëmbri dla cumiscion.
(7) Acioche la sentedes dla Cumiscion sibe valeivles iel debujën dla prejënza de doi terzi di cumëmbri.
(8) La Cumiscion se dà si regulamënt cun la maiuranza de doi terzi di cumëmbri.6)
La verscion tudëscia dla sëurascrita dl articul 2 ie unida sostituida dal articul 2, coma 1 dla LP. di 29 de setëmber 2015, n. 13.
L articul 2, coma 1 ie unit sostituì nsci dal articul 2, coma dla LP. di 29 de setëmber 2015, n. 13.
L articul 2, coma 2 ie unit sostituì nsci tres l articul 2, coma 3 dla LP. di 29 de setëmber 2015, n. 13.
L articul 7/bis ie unit njuntà tres l articul 2 dla L.P. dl 26 de lugio 2002, nr. 11, y dadedò mudà dal articul 10, coma 3 dla L.P. dl 8 d’auril 2004, nr. 1.