c) Lege provinziala di 29 de jügn dl 2000, n. 121)
Autonomia dles scores

(1) La valutaziun dl laur dles direturies y di direturs dla scora s'orientëia ai fins y al'atuaziun dl plann trienal dl'oferta formativa sciöche ince al profil profescional dles direturies y di direturs dla scora. Ara tol ite la valutaziun dl sorvisc tl ann de proa, la valutaziun dl sorvisc anuala y la valutaziun dl sorvisc globala che vëgn fata n iade su tratan l'inciaria dirigenziala.

(2) Chisc é i ciamps da tó en conscidraziun canche al vëgn chirí fora i indicadus por la valutaziun:

1. competënzes de gestiun y d'organisaziun;
   
2. competënzes tl ciamp dla gestiun y dl svilup dl personal;
   
3. contribut al mioramënt dl suzes formatif y scolastich dles scolares y di scolars;
   
4. promoziun dla partezipaziun y dla colaboraziun di comëmbri desvalis dla comunité dla scora y di raporc cun le contest sozial y scolastich;
   
5. prozesc y mosöres de svilup che resultëia dal'evaluaziun interna y esterna.
   

(3) L'intendënta dles scores competënta o l'intendënt dles scores competënt fej la valutaziun dl sorvisc sön la basa de na proposta de valutaziun che vëgn laurada fora da na ispeturia o n ispetur dla scora o da n team de valutaziun. Por chësc fin vëgnel apliché chëstes desposiziuns:

1. la valutaziun dl sorvisc tl ann de proa se referësc al pröm ann de laur y reverda düc i ciamps preodüs dal coma 2. La proposta de valutaziun vëgn laurada fora da n team de valutaziun metü adöm da döes ispeturies o dui ispeturs dla scora; por les scores ladines é le team de valutaziun metü adöm da na ispeturia o n ispetur dla scora y da öna na dirigënta o un n dirigënt dl'Intendënza scolastica ladina;
   
2. la valutaziun dl sorvisc anuala é na valutaziun che vëgn a s'al dé man man tratan l'ann de scora; la proposta de valutaziun vëgn laurada fora da na ispeturia o n ispetur dla scora;
   
3. la valutaziun dl sorvisc globala vëgn fata un n iade tratan l'inciaria dirigenziala y reverda düc i ciamps preodüs dal coma 2. La proposta de valutaziun vëgn laurada fora da n team de valutaziun metü adöm da döes ispeturies o dui ispeturs dla scora.
   

(4) Sön domanda dla direturia o dl diretur dla scora pó l'intendënta dla scora competënta o l'intendënt dla scora competënt ince aprové na forma de valutaziun alternativa por la valutaziun dl sorvisc anuala y globala.

(5) Vigni Intendënza scolastica stabilësc cun referimënt a sües realtés desvalies i indicadus y i detais por la valutaziun dl sorvisc.

(6) L'amunta dl fonds por l'assegnaziun dla retribuziun de resultat sciöche ince i criters por chësta assegnaziun vëgn stabilis dal contrat coletif provinzial. 21)22)