(1) La proprieté demaniala dl’Aziënda y i raiuns cun na spersa sot ai 25 hectars che alda pro la proprieté nominada é raiuns de sconanza, reproduziun y palsa por la salvarjina. 5)
(2) I confins de chisc raiuns vëgn amarscià cun tofles d’indicaziun aladô dla tabela A injuntada a chësta lege o cun marcaziuns de termo blanćes/fosces-blanćes dl’Aziënda.
(3) Chisc confins vëgn amarscià ti jon do ai confins dles parzeles dles proprietês demaniales; a öna cun i reviers dla ćiacia vijins, él poscibl da avalié i confins por na miù verda y gestiun dla ćiacia.
(4) La porsona a će dl consëi d’aministraziun, do avëi aldì le diretur, autorisëia ezezionalmënter da pié y copè salvarjina te chisc raiuns sce chësc va debojëgn por mantignì n popolamënt de salvarjina sann y rich de sorts y por schivé dagns ala cultura.
(5) La salvarjina vëgn piada y copada dal personal verdabosch y verdaćiacia dl’Aziënda o, cun l’autorisaziun dla porsona a će dl consëi d’aministraziun, da porsones adeguades che ne ciafa por chësc degun paiamënt; le personal dl’Aziënda controlëia chëstes porsones y à la responsabilité.
(6) Sce n valgönes proprietês demaniales n’é nia adatades sciöche raiuns de sconanza, reproduziun y palsa dla salvarjina pôres ti gnì dades en conzesciun ai reviers de ćiacia vijins, do avëi aldì le diretur dl’Aziënda y cun deliberaziun dl consëi d’aministraziun.
(7) Le control tecnich dla ćiacia ti raiuns dà en conzesciun resta de competënza dl’Aziënda.
(8) Sce les condiziuns stabilides tl at de conzesciun ne vëgn nia mantignides, spo vëgnera revocada.
(9) Por i fins preodüs tl articul 2, lëtra d) po l’Aziënda fà inrescides, stüdi y esperimentaziuns ti raiuns demaniai che reverda la fauna.