(1) L’assessuria/L’assessur competënt por la mobilité aprovëia i prisc mascimai por iadi singui, les modalitês dl eserzize, tut fora ći che vëgn desponü dal articul 26, y sc’al va debojëgn, i orars.
(2) Ales lignes de furnadoies conzescionades che coliëia localitês abitades stabilmënter vëgnel apliché l’articul 1, coma 3, dla lege provinziala di 2 de dezëmber dl 1985, n. 16, y mudaziuns suandëntes.
(3) Les tofles cun les tarifes de trasport, i orars de sorvisc y les desposiziuns por i passajiers mëss gnì metüdes fora te na posiziun saurida da odëi por le publich.
(4) La titolara/le titolar dla conzesciun mëss ester curì da n’assiguraziun cuntra inzidënć y dagns che ëra o ël, o i dependënć o les dependëntes gaujëia ales porsones o ales cosses trasportades sciöche inće por dagns a porsones terzes y a cosses. Al vëgn stabilì cun regolamënt d’esecuziun la mosöra minima dla proteziun dl’assiguraziun aladô dla sort dl implant.
(5) Sc’al n’é degöna assiguraziun spo vëgn l’eserzize atira sospenü. Sce le titolar/la titolara dla conzesciun ne stlüj nia jö anter diesc dis dala contestaziun l’assiguraziun nezesciara, spo toma la conzesciun.