(1) La Jonta provinziela determinea cun na deliberazion che ie da publiché tl Buletin Ufiziel dla Region i criteres per la cunzescion de suvenzions, cuntribuc, finanziamënc ausilieres, stipendiums, premies, sustënies, aiuc finanzieres y vantajes economics d'uni sort a persones, sozieteies y a ënc publics y privac, y nce la modaliteies dl paië ora de chisc y dla documentazion che muessa unì prejenteda te chësc cuntest. Per i ënc y i sogec che lëura zënza fins de davani tl ciamp soziel, dl lëur, dla sanità, dl’istruzion, dla cultura, dl sport, dla defendura dla cuntreda y dl ambient possa la documentazion unì limiteda ala soma dl vantaje economich cunzedù; l’ublianza de atesté la realisazion de duta la scumenciadiva sustenida resta mpe y nce la prestazions di ënc y di sogec nstësc possa unì cuantifichedes. 5) 6)
(1/bis) L relevamënt dla situazion economica de persones fisiches per la cunzescion de suvenzions, cuntribuc, stipendiums, premies, sustenimënc, aiuc finanzieres y l’atribuzion de vantajes economics de cie sort che mei, vën fat sun la basa di criteres per la detlarazion unificheda dl davani y dl patrimone, stabilii cun regulamënt d’esecuzion. 7)
(1/ter) Al fin dl cuntrol y dl svilup di criteres per la detlarazion unificheda dl davani y dl patrimone aldò dl coma 1/bis, à la Provinzia azes ai dac che curespuend ai benefizienc y ala prestazions di ënc publics che se nuza di criteres nunziei per la gestion dla prestazions respetives. 8)
(2) La strutura aministrativa respunsabla dla pruzedura verifichea sce la scumenciadives suvenzionedes vën tenides aldò dla regules sun la basa de contes, de cuntrac o d’autra documentazions adatedes, che vën stabilides, setor per setor, tla deliberazions nunziedes tl coma 1, y nce n basa ala detlarazion dla persona che damanda l alesiramënt economich. Te chësta muessel unì detlarà che la cundizions y i recuisic scric dant dala lege vën adempìi y l muessa unì specificà i ufizies o ënc pra chëi che l ie unit fat o l unirà fat d'autra dumandes per n alesiramënt economich per la medema scumenciadiva.
(2/bis) Per i alesiramënc liei ai ntervënc de costruzion o ressanamënt possa i criteres per l’atribuzion de vantajes economics udëi danora che la licuidazion di cuntribuc per lëures de costruzion y de miuramënt dl terac vënie fata, ti lims dla spëisa lasceda pro, tres l’aplicazion, ala cuantità di lëures dejëuc, di priejes uniteres o dla somes pausciales, apurvei n ucajion dla cunzescion dl alesiramënt, cun la njonta, ulache udù danora dai criteres de setor curespundënc, de na cuota fisseda danora per spëises genereles y cëries defrëntes. La detlarazion dl’esecuzion regulera di lëures, data ora da n prufesciunist abilità n basa al stat parziel o finel di lëures, vel coche documentazion adateda per la licuidazion dl vantaje economich. 9)
(2/ter) Tl respet dl prinzip dla scemplificazion dla pruzedures aministratives possa i criteres per l’atribuzion di vantajes economics udëi danora che la documentazion de spëisa vënie sustituida da na lista ressuntiva dla spëises abudes. Ala lista, da chëla che l muessa vester da udëi i detai essenziei dla documentazion de spëisa, vëniel njuntà na detlarazion dl reprejentant legal de chi che se damanda l alesiramënt, che atestea che la spëises ie unides fates. 10)
(3) Uni strutura aministrativa respunsabla de paië ora i alesiramënc economics fej cuntroi a cajo tla mesura de almanco l sies percënt dla scumenciadives sustenides. La modaliteies vën determinedes dala Jonta provinziela aldò dl coma 1; la possa nce se jué de esperc da dedora. 5)
(4) Danter la spëises lascedes pro a cuntribut iel te uni cajo stlut ora chëles n referimënt ala chëutes sun l davani y sun l patrimone, ora che la chëuta sun l’ativiteies produtives. L vën oradechël lascià pro a cuntribut la cëries respidledes coche cuntribuc previdenziei. 11)
L articul 2 ie unit sustituì dal articul 2 dla lege provinziela di 19 de fauré dl 2001, n. 4; l coma 1 ie inò unì sustituì dal articul 24 dla lege provinziela di 23 de lugio dl 2007, n. 6.
iiL articul 2 coma 1 ie n iede unit sustituì tres l articul 24 dla L.P. di 23 de lugio 2007, n. 6, y ie dadedò unit mudà nsci tres l articul 15 coma 1 dla L.P. di 23 de dezëmber 2014, n. 11.
L articul 2, coma 1/bis, ie unit njuntà dal articul 7, coma 2, dla lege provinziela di 17 de jené 2011, n. 1.
L articul 2, coma 1/ter ie unit njuntà dal articul 4, coma 1, dla L.P. di 26 de setëmber 2014, n. 8.
L articul 2, coma 2/bis ie unit njuntà dal articul 15, coma 2, dla L.P. di 23 de dezëmber 2014, n. 11.
L articul 2, coma 2/ter ie unit njuntà dal articul 15, coma 2, dla L.P. 23 de dezëmber 2014, n. 11.
L articul 2, coma 4 ie unit njuntà dal articul 15, coma 3, dla L.P. di 23 de dezëmber 2014, n. 11.